La maman ressuscitée


Lecture en continu :

Transcription par phrase


Transcription du texte complet


Qōn̄ tä, n-atn̄wan tä, e pe n-lokven yön.
Koyo m-öttö e, koyo m-tö tēy n-susn̄wäy vētwa. Koyo m-tö / keytēl m-tö van, m-tö van, tö van…
Tö van van e, koyo m-tö tēy wyä n-susn̄wäy ttä wyä.
Sōwlē, n-yo ssën̄wäy ke e, ne ttä n’ ēssēgēt yöh, ne ttä man / ne ttä ne vëyvay löwö pah. Pe n-yo sun̄wäy qēt ne aplap. Koyo m-/
Key m-öttö van van e, tat yöy ke m-mat. Tege ttä m-da ke ke n-göm, e ke m-mat.
Ke m-mat, key m-hö ke; m-van tēy ke, van lē vätē / lē mösö ttä, m-tivi ke how en. M-tivi tat yöyo.
Sōwlō pe, key m-van ma ti m-tö, koyo m-tö mi mam yöyo. Yöyo tet tat son wēyä.
Keytēl m-tö, van, van e – Mam yöyo ke ne vanvan lē tqē, koyo ne ttö l-en̄.
Ke n-van – mi n-wuh; ke n-kal ila lē tqē, lē n̄wōt; n-kay ma n-mön… Si n-van yow lē yēk, n-kay ma nn-e… Ti n-vën̄än koyo yan.
Pe tōqōn̄ tä, ke m-van wēyä lē tqē e, kal ēla ma te n-wokwok e ke te n-tēytēy n-tēqē moytēl e, ke m-et e: n-lokven tä m-kal lo ma i ke e.
M-kal lo ma i ke: mēyēs ke de koyo le.
E pe ke m-hö n-lokven e koyo m-n̄wol lek. N̄wol lek ma l-en̄.
Ma ti, key m-tö inen l-en̄, nan ne ke m-hö ke, pah nan nen. N-aplap yön!
Key m-tö van, tö van pe– n-lokven ne ke, ke tet ne itōk tä, i n-yo ssun̄wäy ne in n-lokven ne man mat.
Lē mak ne mam yöyo wō n-van lē n̄wōt ti n-hö ma n-mön, si de nn-e, ti n-van ma ti de n-da mmönö ti key de gän e, ke tet hö tä van i këyo.
Ti ke n-hö n-tun̄ e, si de n-tun̄ mön, pēn̄pēn̄ ewwe koyo yan – Ale, n-huyvēt van i mam in n-yo ssën̄wäy de: “N-yo ssën̄wäy ke man gēngän!”
Täkäl qōn̄, koyo gän ammas ewwe n-sëna, pe mutuy.
Vëga e, ke ne da nen van i n-yo ssën̄wäy kehei…
Këyo m-tö van van e, këyo m-et van e, ne sät. Ke te / N-lön te n-sät këyo, ke te n-li koyo.
Sōwlō pe – koyo m-tö van e këyo m-den sēgēt lek tat moyo.
E, ne llam e m-huyvēt van i ne ssēgēt e de: “Qiyi, gonyo mas van lek ti et tat munyo.”
Koyo m-van huy.
Lē mtap, key m-öttö pah e këyo m-van huy.
Këyo m-van huy. Van van van van e, van ma lē msö ttä, gel möksä how.
Gel möksä how e wa: ne ne llam e, e n-huy n-äh.
N-huyhuy qēt pah n-äh how e, koyo van huy lek.
Koyo m-van van van van, van was ma e: mösö ttä wyä koyo gel huy, ti möksä.
Ewa ke n-huyhuy wēyä nn-äh.
E këyo van huy wyä. Këyo m-van wēyä ma ti ke m-huy wēyä n-äh kene: tat yöyo v-en lē qëyan̄ e, m-yen̄ n-äh tev van ma – e ke m-yen̄ velal de: “N-äh ke, van ma ke, de n-yo ssun̄wäy muk!”
N-äh m-qēt how kene, ke m-vulu!
Ke m-vulu: Ale, tat yöyo m-vulu kene e, ne llam e m-yen̄!
M-yen̄, ke de: “O! Tat munyo nen! Ke m-vulu en! Sōwlō – Ale, gonyo van wēyä!”
Koyo m-van, koyo m-van, van van – Van wēyä ma e, ke m-huy wēyä nn-äh.
M-huy qēt how kene e, yen̄ e: tat yöyo m-vulu wyä.
E m-pah, n-uvvulu e man löwö!
Koyo m-van van, van was ma ti ke m-huy wēyä kene: koyo m-yen̄ e, n-uvvulu ke m-löwö!
M-löwö, ke m-huyvēt van i ne ssēgēt de: “Nek tö eyyen̄! Nek ne yen̄ ti? Tat munyo nen! Tev vulu en! Gonyo was ke iyen!”
E këyo m-van, van van – van was ma vētē key m-tivi ti tat moyo e: tat yöyo m-tiyak dän n-qëyan̄!
Tiyak dän n-qëyan̄: kal yäm vēn yow ma yē mëtä qēyan̄ e m-gel how en.
Gel how kene wa koyo was ma!
E ke m-huyvēt: huyvēt van i këyo de: “E, n-yo ssën̄wäy! Pe moyo m-van wēyä ma e pē hap? Nö man mat! Pē ha ti moyo m-van ma ti m-sey wēyä nö?”
E pe ne llam tiyak vēn e, m-akka inen. M-akka de: “Ow! Mam yimäyo m-et sēgēt n-aplap tgaha. M-van ma, m-tö mi kēmäm, pe n-aplap ne kene ne sät! Ke n-da i mäyo nan kene, tet ne hö tä ma n-sëna i mäyo… Ke te n-lös mi mäyo, ke m-da i mäyo ne sät ne sät! Mäyo tet ne gēngän tä…”
Ke m-/ Tat yöyo m-gel e, tev yen̄ n-akka, m-yen̄ qēt pah how e, m-huy de: “Ne itōk. Moyo gelgel dēyä: nö k-da yimyo van n-sana.”
Ke m-läk n-äp; pah e, m-hö n-dön̄, m-suyäp. N-dön̄ vēyo.
Suyäp, suyäp ömmönö n-dön̄ e: m-hö yak ne ttä ti m-toklet, m-hö van i këyo ti këyo m-gän.
Ke m-gel, m-vën̄än n-susn̄wäy ne ssēgēt.
Vën̄än n-sun̄wäy ne ssēgēt, m-vën̄än ke, vën̄än ke – Vën̄än ke van van: n-toqan m-sis.
M-hö n-pē van ti ke m-un.
Ne llam e m-gëngän…
Sōwlō n-toqayo m-sis; e ke n-huy van i këyo de: “Yogo, moyo tet tö vēstä mi nö. Weläke ne keke, n-mösö ne nö v-öttö lön ke, n-mösö in qöy tëmat. Moyo mas n̄wol lek.”
Sōwlō, ke de: “Qiyi lē qōn̄, nö t-van ma. Moyo wō m-yen̄ tën̄wäy tä wō m-van annah ma yow silil, moyo ne glal de nö nen. Moyo t-en eyyen̄ yöh! Moyo sev ittiyak, moyo sev adda n-tege ttä, moyo t-en eyyen̄ yöh!”
Sōwlō ke m-valvalga qēt pah mi koyo e: ke m-van ke m-hö n-wöti-vöy, vēyo.
M-van ma, m-hö yak n-vinin, m-hö van i kēyo.
M-hö van i kēyo: sōw, pe n-dön̄ ne ttä ne m-en yöh e, ke m-hö van i këyo.
Sōwlō ke m-huyvēt van i ne llam e de: “Nek qon̄ yak lek wyä ne ssēgēt ke, pe moyo n̄wol lek. Qiyi lē qōn̄, nek wō m-/ nek wō m-/ nö wō m-van ma ti ke wō m-su tën̄tän̄, e nek vap tö yyen̄ ke, weläke nö nen! Nö tev van ma en.”
Koyo m-hö n-dön̄, van huy. M-van van van van van mi n-wöti-vöy.
Koyo m-van van van, n̄wol was lek wyä ma l-en̄.
Te dun hil ma lē mtägey e, m-säy yak n-wötivöy e vēn yē ssa en, e ke m-ti en.
N-lokven ne mam yöyo m-hö ma e, n-lön m-sät kēyo!
De “Ēi! Moyo m-van ti vä? Pē ha ti moyo tev van evvelekyä en? E moyo sud / moyo de ttö eyyen̄ ma l-en̄ nei!”
Sōwlō – ke m-tiyak vēn e m-vap pah i këyo e: këyo m-dun eyyen̄ hil l-en̄ e – m-tö yyen̄ hil l-en̄ ne këyo v-öttö lön. N-mösö m-qōn̄ –
Ne ne llam e m-hö yak n-dön̄; n-toklet; m-vën̄än n-susn̄wäy ne ssēgēt.
Vën̄än galgalsä ke, m-hö van n-pē ti ke m-un. Koyo m-kal ila ti m-en how, ti m-mutuy.
Key qētqēt mutuy. Key mutuy, pah n̄e van –
N-susn̄wäy ke m-tiyak vēn e m-tën̄tän̄.
Ke m-tiyak vēn nan ne, ke m-yowtuqut: e n-tege ttä nan ne tev van ma, nan n-tëmat!
E n-susn̄wäy ne ne llam e m-huyvēt van i ke de “Nek tö eyyen̄! Tat munyo nen! Ke tev van ma en!”
E ke m-en how. M-en lek wyä how ti kēyo m-mutuy.
E këyo yen̄ yow silil e: ke tev / ke m-was ma lē mtägey! Koyo m-en eyyen̄ yöh.
Tet ne mul tä, koyo yen̄ vēn e, ke m-hö yak n-wötivöy ne vi-ti vēn yē ssa.
Ke m-hö yak n-wötivöy kene, m-van hil lē msö ne n-lokven e v-en, ne mam yöyo yak hö ’wwe ti ma.
M-sëlan̄ n-wötivöy e van n-dälman, e pe m-ippin̄! M-ippin̄ n-dälman.
M-ippin̄ van van e: n-lokven ke, n-dälman m-melet!
N-dälman m-melet, n-dälman m-n̄wōt. E ke m-mat.
Ke m-mat, ke m-van ma, m-säy yak eyyen̄ lek wyä vēn n-wötivöy e; m-kal lo ti m-qëlän̄ inen.
Key matyak ma lē mtap e: ne v-en geh pah e n-day – pe n-lokven v-en ne ne mat.
Pah en, n-akka m-qēt how en.
S1 stop écouter
Qōn̄ tä, n-atn̄wan tä, e pe n-lokven yön.

S2 stop écouter
Koyo m-öttö e, koyo m-tö tēy n-susn̄wäy vētwa. Koyo m-tö / keytēl m-tö van, m-tö van, tö van…

S3 stop écouter
Tö van van e, koyo m-tö tēy wyä n-susn̄wäy ttä wyä.

S4 stop écouter
Sōwlē, n-yo ssën̄wäy ke e, ne ttä n’ ēssēgēt yöh, ne ttä man / ne ttä ne vëyvay löwö pah. Pe n-yo sun̄wäy qēt ne aplap. Koyo m-/

S5 stop écouter
Key m-öttö van van e, tat yöy ke m-mat. Tege ttä m-da ke ke n-göm, e ke m-mat.

S6 stop écouter
Ke m-mat, key m-hö ke; m-van tēy ke, van lē vätē / lē mösö ttä, m-tivi ke how en. M-tivi tat yöyo.

S7 stop écouter
Sōwlō pe, key m-van ma ti m-tö, koyo m-tö mi mam yöyo. Yöyo tet tat son wēyä.

S8 stop écouter
Keytēl m-tö, van, van e – Mam yöyo ke ne vanvan lē tqē, koyo ne ttö l-en̄.

S9 stop écouter
Ke n-van – mi n-wuh; ke n-kal ila lē tqē, lē n̄wōt; n-kay ma n-mön… Si n-van yow lē yēk, n-kay ma nn-e… Ti n-vën̄än koyo yan.

S10 stop écouter
Pe tōqōn̄ tä, ke m-van wēyä lē tqē e, kal ēla ma te n-wokwok e ke te n-tēytēy n-tēqē moytēl e, ke m-et e: n-lokven tä m-kal lo ma i ke e.

S11 stop écouter
M-kal lo ma i ke: mēyēs ke de koyo le.

S12 stop écouter
E pe ke m-hö n-lokven e koyo m-n̄wol lek. N̄wol lek ma l-en̄.

S13 stop écouter
Ma ti, key m-tö inen l-en̄, nan ne ke m-hö ke, pah nan nen. N-aplap yön!

S14 stop écouter
Key m-tö van, tö van pe– n-lokven ne ke, ke tet ne itōk tä, i n-yo ssun̄wäy ne in n-lokven ne man mat.

S15 stop écouter
Lē mak ne mam yöyo wō n-van lē n̄wōt ti n-hö ma n-mön, si de nn-e, ti n-van ma ti de n-da mmönö ti key de gän e, ke tet hö tä van i këyo.

S16 stop écouter
Ti ke n-hö n-tun̄ e, si de n-tun̄ mön, pēn̄pēn̄ ewwe koyo yan – Ale, n-huyvēt van i mam in n-yo ssën̄wäy de: “N-yo ssën̄wäy ke man gēngän!”

S17 stop écouter
Täkäl qōn̄, koyo gän ammas ewwe n-sëna, pe mutuy.

S18 stop écouter
Vëga e, ke ne da nen van i n-yo ssën̄wäy kehei…

S19 stop écouter
Këyo m-tö van van e, këyo m-et van e, ne sät. Ke te / N-lön te n-sät këyo, ke te n-li koyo.

S20 stop écouter
Sōwlō pe – koyo m-tö van e këyo m-den sēgēt lek tat moyo.

S21 stop écouter
E, ne llam e m-huyvēt van i ne ssēgēt e de: “Qiyi, gonyo mas van lek ti et tat munyo.”

S22 stop écouter
Koyo m-van huy.

S23 stop écouter
Lē mtap, key m-öttö pah e këyo m-van huy.

S24 stop écouter
Këyo m-van huy. Van van van van e, van ma lē msö ttä, gel möksä how.

S25 stop écouter
Gel möksä how e wa: ne ne llam e, e n-huy n-äh.

S26 stop écouter
N-huyhuy qēt pah n-äh how e, koyo van huy lek.

S27 stop écouter
Koyo m-van van van van, van was ma e: mösö ttä wyä koyo gel huy, ti möksä.

S28 stop écouter
Ewa ke n-huyhuy wēyä nn-äh.

S29 stop écouter
E këyo van huy wyä. Këyo m-van wēyä ma ti ke m-huy wēyä n-äh kene: tat yöyo v-en lē qëyan̄ e, m-yen̄ n-äh tev van ma – e ke m-yen̄ velal de: “N-äh ke, van ma ke, de n-yo ssun̄wäy muk!”

S30 stop écouter
N-äh m-qēt how kene, ke m-vulu!

S31 stop écouter
Ke m-vulu: Ale, tat yöyo m-vulu kene e, ne llam e m-yen̄!

S32 stop écouter
M-yen̄, ke de: “O! Tat munyo nen! Ke m-vulu en! Sōwlō – Ale, gonyo van wēyä!”

S33 stop écouter
Koyo m-van, koyo m-van, van van – Van wēyä ma e, ke m-huy wēyä nn-äh.

S34 stop écouter
M-huy qēt how kene e, yen̄ e: tat yöyo m-vulu wyä.

S35 stop écouter
E m-pah, n-uvvulu e man löwö!

S36 stop écouter
Koyo m-van van, van was ma ti ke m-huy wēyä kene: koyo m-yen̄ e, n-uvvulu ke m-löwö!

S37 stop écouter
M-löwö, ke m-huyvēt van i ne ssēgēt de: “Nek tö eyyen̄! Nek ne yen̄ ti? Tat munyo nen! Tev vulu en! Gonyo was ke iyen!”

S38 stop écouter
E këyo m-van, van van – van was ma vētē key m-tivi ti tat moyo e: tat yöyo m-tiyak dän n-qëyan̄!

S39 stop écouter
Tiyak dän n-qëyan̄: kal yäm vēn yow ma yē mëtä qēyan̄ e m-gel how en.

S40 stop écouter
Gel how kene wa koyo was ma!

S41 stop écouter
E ke m-huyvēt: huyvēt van i këyo de: “E, n-yo ssën̄wäy! Pe moyo m-van wēyä ma e pē hap? Nö man mat! Pē ha ti moyo m-van ma ti m-sey wēyä nö?”

S42 stop écouter
E pe ne llam tiyak vēn e, m-akka inen. M-akka de: “Ow! Mam yimäyo m-et sēgēt n-aplap tgaha. M-van ma, m-tö mi kēmäm, pe n-aplap ne kene ne sät! Ke n-da i mäyo nan kene, tet ne hö tä ma n-sëna i mäyo… Ke te n-lös mi mäyo, ke m-da i mäyo ne sät ne sät! Mäyo tet ne gēngän tä…”

S43 stop écouter
Ke m-/ Tat yöyo m-gel e, tev yen̄ n-akka, m-yen̄ qēt pah how e, m-huy de: “Ne itōk. Moyo gelgel dēyä: nö k-da yimyo van n-sana.”

S44 stop écouter
Ke m-läk n-äp; pah e, m-hö n-dön̄, m-suyäp. N-dön̄ vēyo.

S45 stop écouter
Suyäp, suyäp ömmönö n-dön̄ e: m-hö yak ne ttä ti m-toklet, m-hö van i këyo ti këyo m-gän.

S46 stop écouter
Ke m-gel, m-vën̄än n-susn̄wäy ne ssēgēt.

S47 stop écouter
Vën̄än n-sun̄wäy ne ssēgēt, m-vën̄än ke, vën̄än ke – Vën̄än ke van van: n-toqan m-sis.

S48 stop écouter
M-hö n-pē van ti ke m-un.

S49 stop écouter
Ne llam e m-gëngän…

S50 stop écouter
Sōwlō n-toqayo m-sis; e ke n-huy van i këyo de: “Yogo, moyo tet tö vēstä mi nö. Weläke ne keke, n-mösö ne nö v-öttö lön ke, n-mösö in qöy tëmat. Moyo mas n̄wol lek.”

S51 stop écouter
Sōwlō, ke de: “Qiyi lē qōn̄, nö t-van ma. Moyo wō m-yen̄ tën̄wäy tä wō m-van annah ma yow silil, moyo ne glal de nö nen. Moyo t-en eyyen̄ yöh! Moyo sev ittiyak, moyo sev adda n-tege ttä, moyo t-en eyyen̄ yöh!”

S52 stop écouter
Sōwlō ke m-valvalga qēt pah mi koyo e: ke m-van ke m-hö n-wöti-vöy, vēyo.

S53 stop écouter
M-van ma, m-hö yak n-vinin, m-hö van i kēyo.

S54 stop écouter
M-hö van i kēyo: sōw, pe n-dön̄ ne ttä ne m-en yöh e, ke m-hö van i këyo.

S55 stop écouter
Sōwlō ke m-huyvēt van i ne llam e de: “Nek qon̄ yak lek wyä ne ssēgēt ke, pe moyo n̄wol lek. Qiyi lē qōn̄, nek wō m-/ nek wō m-/ nö wō m-van ma ti ke wō m-su tën̄tän̄, e nek vap tö yyen̄ ke, weläke nö nen! Nö tev van ma en.”

S56 stop écouter
Koyo m-hö n-dön̄, van huy. M-van van van van van mi n-wöti-vöy.

S57 stop écouter
Koyo m-van van van, n̄wol was lek wyä ma l-en̄.

S58 stop écouter
Te dun hil ma lē mtägey e, m-säy yak n-wötivöy e vēn yē ssa en, e ke m-ti en.

S59 stop écouter
N-lokven ne mam yöyo m-hö ma e, n-lön m-sät kēyo!

S60 stop écouter
De “Ēi! Moyo m-van ti vä? Pē ha ti moyo tev van evvelekyä en? E moyo sud / moyo de ttö eyyen̄ ma l-en̄ nei!”

S61 stop écouter
Sōwlō – ke m-tiyak vēn e m-vap pah i këyo e: këyo m-dun eyyen̄ hil l-en̄ e – m-tö yyen̄ hil l-en̄ ne këyo v-öttö lön. N-mösö m-qōn̄ –

S62 stop écouter
Ne ne llam e m-hö yak n-dön̄; n-toklet; m-vën̄än n-susn̄wäy ne ssēgēt.

S63 stop écouter
Vën̄än galgalsä ke, m-hö van n-pē ti ke m-un. Koyo m-kal ila ti m-en how, ti m-mutuy.

S64 stop écouter
Key qētqēt mutuy. Key mutuy, pah n̄e van –

S65 stop écouter
N-susn̄wäy ke m-tiyak vēn e m-tën̄tän̄.

S66 stop écouter
Ke m-tiyak vēn nan ne, ke m-yowtuqut: e n-tege ttä nan ne tev van ma, nan n-tëmat!

S67 stop écouter
E n-susn̄wäy ne ne llam e m-huyvēt van i ke de “Nek tö eyyen̄! Tat munyo nen! Ke tev van ma en!”

S68 stop écouter
E ke m-en how. M-en lek wyä how ti kēyo m-mutuy.

S69 stop écouter
E këyo yen̄ yow silil e: ke tev / ke m-was ma lē mtägey! Koyo m-en eyyen̄ yöh.

S70 stop écouter
Tet ne mul tä, koyo yen̄ vēn e, ke m-hö yak n-wötivöy ne vi-ti vēn yē ssa.

S71 stop écouter
Ke m-hö yak n-wötivöy kene, m-van hil lē msö ne n-lokven e v-en, ne mam yöyo yak hö ’wwe ti ma.

S72 stop écouter
M-sëlan̄ n-wötivöy e van n-dälman, e pe m-ippin̄! M-ippin̄ n-dälman.

S73 stop écouter
M-ippin̄ van van e: n-lokven ke, n-dälman m-melet!

S74 stop écouter
N-dälman m-melet, n-dälman m-n̄wōt. E ke m-mat.

S75 stop écouter
Ke m-mat, ke m-van ma, m-säy yak eyyen̄ lek wyä vēn n-wötivöy e; m-kal lo ti m-qëlän̄ inen.

S76 stop écouter
Key matyak ma lē mtap e: ne v-en geh pah e n-day – pe n-lokven v-en ne ne mat.

S77 stop écouter
Pah en, n-akka m-qēt how en.