The origin of kava


Continuous playing:

Transcription by sentence


Whole text transcription


Tog tog i van en, le-myam en, tateh ga.
Nē-tētēnge vitwag kēy ōl so na-ga, tateh hōn qal a le-myam.
Ba– qōn̄ vitwag, yoge matag noyō, kōyō tog van i tog i tog en: kōyō na-tam kōyō a– na-tam kōyō!
Mey na-tm̄an na-tam mey na-lqōvēn, wa tō– mey na-lqōvēn na-tam mey na-tm̄an.
Vaga, lo-togtog noyō e, kōyō qeneqneg goy kōyō. Mey na-tm̄an wo ni-van qiyig ave, na-lqōvēn mas sok kē; mey na-tm̄an wo ni-van qiyig ave, kōyō mas sok kē.
Tō, vel vanvan noyō, kōyō vēlēs a– kōyō nu-qul tiwag vēlēs. Kōyō van hēyēt, van tiwag; van qotmet, van tiwag… Kōyō et su vēlvēlwoy hōn te!
Kōyō mo-tog qele nen i tog i tog i tog i tog en – mey na-lqōvēn kē ni-vap van hiy mey na-tm̄an wo / so kē ni-yon̄teg so kē ni-su gomgom.
Bastō mey na-tm̄an, kē wo “Nēk gomgom qele nen ba-hap?” Amtan wo “Isi! Ba…”
Mey na-lqōvēn ni-vēyvēyne van ēgēn. Kē wo “Nok vap dayday ēwē van, sowo no wo ma-mat, ba, no n-etbuste so nēk leg leh! No ne-myōs so nēk togtog lap hōw qele anen. Nēk togtog lap qele nen a nēk tit-leg leh te! ”
Bastō mey na-tm̄an wo “Wō nēk vavap qele nen ba-hap?! Nēk hohole qele nen ba-hap?” Amtan wo “Oo! Nok gomgom e ba nok yon̄yon̄teg so – wun sisqet nok mat veteg nēk.”
Tō mey na-tm̄an en kē ni-lololwon veg kē. Veg a so mey na-lqōvēn vēyvēyne van hiy kē en.
E kōyō tog van. Tog van e, mey na-lqōvēn e ni-gomgom e – vel yēpyep a kōyō hayveg hay, mitimtiy hōw en, mey na-lqōvēn e ni-vap van “Dō togtog van e, nok yon̄teg no-gom mino kē ni-lililwo geh me. Ba sowo – qōn̄ vitwag sowo nēk wo m-et qelen̄ no, sowo no wo ma-mat veteg nēk, ba no et-buste so nēk leg leh. No ne-myōs so nēk togtog lap hōw qele anen.”
E mey na-tm̄an wo “Wō nēk hohole qele nen ba-hap, ay?! hoho/ Tiy hohole te a nēk hole tō anen!” Mey na-lqōvēn so “E, nok hohole ēwē van! Nok yon̄yon̄teg no-gom mino kē ni-lililwo me e tō, nok hohole van.”
Bastō, mey na-tm̄an en ni-dēmdēm liwo aē tō, mey na-lqōvēn e kē mal vap vag hip me no-gom nonon, wa kē may vēyvēyne… Ba so kē ni-vavap qele gōh ba-hap?
Bastō kōyō togtog se van –
Vag-tiwag, kōyō hayveg se hay l-ēm̄ noyō, wa mey na-lqōvēn e ni-vap se hag: “Dō wo togtog van, no wo ma-mat, ba no et-buste so nēk leg leh.”
Wa vag-tēlnegi, bastō kē wo “Nēk to-togtog mahgē gēn; ba no et-buste so nēk leg leh. Ba, nēk wo mo-togtog van a no wo mal mat veteg nēk, tōqōn̄ a nok mat en, no ne-myōs so nēk tivig no a hōw le-mtēgtap nondō. No et-buste so nēk tivig no ave / ave te a so aslil, so ave…
No ne-myōs so nēk gil na-qyan̄ hōw le-mtēgtap nondō nōk: nēk tivig no a hōw le-mtēgtap agōh. Tō nē-dēmdēm nan e so – vel-matap a nēk kalō, vel-yēpyep nēk hayveg me en: nēk hal lege no ewa nēk van, nēk hal lege no e nēk hayveg me. Tō, nok ēglal aē.”
O, mey na-tm̄an e et-wēhgoygoy te kē van, kē ni-hohole: “Bastō nēk togtog van en: nēk t-ekas te iplu vitwag a kē ta-van me e, t-ak malaklak nēk velqōn̄. Tō galeg tō nēk ekas kē, qele so iplu, tō nēk tē-dēmdēm meh vēste.
Ba nēk mōgmōgteg goy n-ēm̄ nondō, nēk tagtaghiy goy; ba sowo nēk wo m-ekas nē-tētēnge vitwag wo me-mtow hag lu-quy mino, ba nēk ukēg nē-tētēnge nan, veg kē qele so nē-tētēnge vitwag kē te-myin̄ nēk.
Kē so me-mtow hag me, nēk mōgmōgteg goy, nēk tagtaghiy goy kē. Nōnōm anen, kē te-myin̄ nēk.” Kē ni-vap van hiy kē qele gēn.
Bastō – Tōqōn̄ a kē n-/ Tōqōn̄ a ni-vanvan me nen, wah tō, mey na-lqōvēn en, kē ni-mat.
Kē ni-mat nen etō, mey na-tm̄an en kē ni-ten̄ten̄ goy magaysēn kē van tō ni-dēmdēm ēgēn.
Kē mē-dēm van i dēm: dēmsas lok na-ln̄e vēyvēyne nonon. “Kēh! Nēk / Kē ma-mat veteg no gōh, et-ēal te so no t-ak qele ave!” Wa tō, dēm lok na-ln̄an ēgnōn.
Dēm lok na-ln̄an ēgnōn, so: “Ignik vēyvēyne veteg hōw: am̄ag den kē ni-mat e kē mē-vēyvēyne veteg hōw qele gēn, so wa: no te-tvig kē a le-mtēgtap ōk; bastō, lu-quy nonon e nok mōgmōgteg goy velqōn̄, ba so nē-tētēnge vitwag te-mtow aē.”
Ba tō kē m-ak tatag qele a– na-ln̄an ēgnōn anen.
Kē m-ak tatag qele nen: kē mi-gil na-qyan̄ le-mtēgtap; kē ni-tvig kē; kē ni-luw goy; bastō kē ni-tog van ēgēn.
Kē ni-tog van i tog i tog en –
Na-plih ni-mtomtow aē ewa kē ni-dow goy, kē ni-koko goy; na-plih ni-mtow ewa kē ni-ko.
Bastō, kē n-et van qele kē: nē-tētēnge vitwag ni-mtow hag me a– a lu-quy nonon en!
Ba tō kē ni-dēmdēm aē, so: “Na-lqōvēn e mē-vēyvēyne si tō hōw, so nē-tētēnge vitwag te-mtow me agōh. Ba no et-ēal te so na-hap? Bastō – Wun ikē agōh: nok traēm/ nok ukēg tog!” So nē-tētēnge a wun yo-/ na-lqōvēn nonon e wun vasem me, kē wun agōh. Bastō kē ni-ukēg ēgēn.
Ba nē-tētēnge nan me-mtow hag me e kē me-mtow tenenen a– a la-tayben ige lōqōvēn en. Kē et-motow te lē-qtēn, so le-hap – Nu-quy nonon en tō e ba kē me-mtow yak togolgol a– la-tayben ige lōqōvēn en. A la-halgoy non ige lōqōvēn.
Bastō– kē ni-ukēg nen e: na-ga e ni-suwyeg na-yon hag me tō, kē ni-mtow liwo ēgēn.
Kē m-ukēg ēwē qele anen, be-ln̄e vēyvēyne non ēgnōn etō– Kē mo-tog van, m-etgoy van – Nē-tēnge e / na-hap en? na-ga e mi-lwo –
Kē mi-lwo hag nen tō, kē ni-dēmdēm sosok aē, so: “Ignik vap so n-age gōh / nē-qētēnge vitwag gōh so te-myin̄ no, ba no et-ēglal hōn te so ba-hap. So kē te-myin̄ no qele ave?”
Bastō, na-ga e van hag tō, mi-lwo; me-hyo kal hag; nō-gōygōyēn ma-van; bastō kē / mi-lwo ēgēn.
Ba kē ni-dēmdēm liwo aē a so na-ga nan so te-myin̄ kē qele ave, la-han metehal. So kē ni-mtiy ēwē kē ni-qoyqoy aē? so kē so n-akteg?
̄Kē et-ēglal hōn qete a so wun kē so n-in e tō na-ga ni-wuh kē. Tō kē ni-mtiy veteg nē-dēmdēm meh.
Bas vag-tiwag nen, lemyēpyep nen en, kē ni-m̄ōl lok me den hēyēt tō ni-haghag le-mtēgtap nonon en; ba kē n-et van a– na-ghōw ni-gityak vagēh.
Kē ni-gityak kal vagēh me a– lu-quy en, bastō ni-siseg van a lē-wti ga en.
Kē ni-siseg van, sise–g e, ni-sam̄sam̄ a n-age / nō-gōygōyi ga en.
E– kē ni-vōy kē. E na-ghōw e ni-van.
E– tō qōn̄ tegha, lemyēpyep se nen en, na-ghōw e ni-van se me. Bastō na-ghōw ni-vanvan me lō-tōti ga, ni-sam̄sam̄ nen en bastō– dēmdēm nonon ni-plaplag aē ēgēn, so: “Na-ghōw van me sam̄sam̄ tō n-age agōh! Wa kē so ni-sam̄ bah e kē so ni-git-/ m̄ōl lok ewa kē ni-/ kē ni-taswul m̄ōl ēwē.”
Bastō, lemyēpyep vitwag se nen, kē ni-haghag se nen wa tō na-ghōw e ni-van se me. Ni-plag van me tō– ni-sam̄sam̄ se nō-gōygōyi ga en –
Bastō, kē n-et qele kē a kē ni-sam̄ bah nen e bastō, so ni-m̄ōl lok nen en: kē ni- kalō van nōk e– ni-qēsdi van; kalō van nōk e ni-qēsdi van…
Bastō, dēmdēm nonon kē ni-plaplag aē tō– kē ni-dēmsas ēgēn, so: “Qeso nē-tētēn- / Qeso nē-tēnge gōh qeso n-et ta-sam̄ vēh!”
Bastō – Taval meyen nan hag nen e tō – amtan wo “Nok lep egal tog, nok kuykuy egal te kis tog!”
Tō kē ni-hel m̄ēt / kē ni-tep m̄ēt nō-gōygōyēn vitwag tō– kē n-in ēgēn. / Óòó kē ni-sam̄.
Kē ni-sam̄ nen, bastō kē ni-yon̄teg a qeso nē-qtēn ni-m̄ōlm̄ōl aē tō– kē ni-mtiy galsi. An̄qōn̄ ewa kē ni-mtiy galsi.
Kē mo-wow van qele nen – Wow van i wow en: kē ni-sam̄sam̄ gōygōyi ga en.
Bastō, vag-tiwag nen en, kē ni-dēmdēm lōlhiy van so “Nē-tēnge a– ēgnōn vasem tō van en, so nok so ukēg hōw en, kē so ni-myin̄ no en, nē-tēnge nan agōh!”
Bastō – kē ni-vētleg no-yoy hiy ige nonon ēgēn. / ige nonon, so “No ne-myōs so kimi van me, gēn so gen nō-qōn̄ m̄eldēl non… (na-lqōvēn nonon en)!”
Tō, kēy van me tō, kēy galeg ne-gengen liwo hag; bastō kē so “No ne-myōs so / No m-ōlōl kimi me, so gēn so sam̄ nō-gōygōyi qētēnge agōh.”
Kēy so “Wō na-han qētēnge qele nen?” Kē wo “Óòó nē-qētēnge gōh me-mtow me agōh, ba no ne-myōs so gēn so sam̄ so dēm lok (na-lqōvēn nonon) aē en.”
Bastō kēy van tiwag me tō – kēy goy gōygōyi ga e tō, sam̄ ēgēn.
Kēy et-ēglal qete so wiyiy qele ave e tō kēy sam̄. Kēy sam̄ yosveg hag nen tō– na-ga e ni-wuh yosveg kēy tō– kēy mitimtiy.
Ba vaga e, kē ni-van bah hēyēt, m̄ōl lok me en, kē ni-dēmdēm veg ēgnōn a ni-dēmdēm!
Wele, na-lqōvēn / yoge matag noyō e so kōyō so leg van tō so kōyō so qeneqneg goy kōyō en aa, kē ne-meh a so vitwag so ni-qlen̄ lō van nōk e – ēgnōn mas sok kē.
Bastō– kē m-ekas van so / Ige nonon so “Hiywē! Na-kaka non igni e, na-hap a kē vasem tō en aa, nē-tētēnge nan agōh.” Tō– kēy ēglal van ēgēn.
Tō so, na-ga en, kē bu-wuwuh dēmdēm.
Bastō, kē ni-tig tēy a– n-inin / sam̄sam̄ gōygōyi ga, vel yēpyep en, ewa kē ni-mtiy galsi.
Kē mo-tog van qele nen i tog en – tō, kē me-tmayge tō– kē et-leg leh te qele ēgnōn vasem en.
Tō, kē me-mlaklak tasga qele anen. A kē et-leg hōn te / lok te; bastō / veg na-ga me-myin̄ kē en: tō kē tē-dēmdēm meh vēste –
Bastō ige nonon e kēy / kēy van sororo tō: hē nōk ni-m̄ōl ewa ni-tot nē-wtēn tō ni-van; hē nōk ni-m̄ōl e, ni-tot nē-wtēn, tō kēy van tō, vah tō –
Ige hip ēglal van ēgēn, so: na-ga, totogyeg a kēy eksas van en, a l-ēm̄ non mey nan en. Tō kēy lep tō, van vavah tō, kēy sororo tō na-ga tō, kē ni-van vel mahē ēgēn.
Ba na-kaka gōh kē e, na-kaka te-le-pnō Qo e a hōw Pentēkos tō –
Wa ige ta-Tana m̄ōl ewa lep namuy; ige nōk van, t-Ēpi, lep ewa van lep…
Tō van tō na-ga ni-lil hōw del le-pnō hōw Vanuatu ēgēn.
Tō qiyig gōh kē e, gēn ta-vap vēh so na-ga, wun Vanuatu kēy qēt aē, na-ga qēt aē; ba totogyeg a kēy m-ekas na-ga en, hōw a le-pnō Qo en.
Ba veg kē ma-kalō den taqn̄ē lōqōvēn en.
Tō– na-/ Nēk ne-myōs ēglal a sowo na-ga ma-kalō hēywē den na-lqōvēn en? na-ga, vaga hip a ige hip ne-myōs e lep e, kēy lep vēlēs a an̄qōn̄. Veg a kē ma-kalō den taqn̄ē lōqōvēn en.
Bastō, totogyeg a nēk ne-myōs so et na-ga ni-mtow a so nēk wo tivig na-ga en: kē ni-mtow hag me e, na-yon, kē ni-mtow hag me am̄ag, nēk et a qeso na-taqn̄ē lōqōvēn.
Tō, na-kaka nan a kēy vap a so na-ga ma-kalō den na-lqōvēn en, kē gēn! Na-kaka ne ga e, kē m-/ qele ave tō kē ma-kalō me e, kē ma-kalō me qele anen.
Tō qiyig gōh kē tō– na-ga mi-hip tō, m-aē le-myam, tō ige sil m-ēglal qēt ēgēn so na-ga, nō-tōti qētēnge vitwag, na-han na-ga, ba tō, kē et-inin soloteg te.
Kē me-mtow hag me e, bē-dēmdēm gēn.
Tō, bah hōw anen. Vēwē nēk.
S1 stop écouter
Tog tog i van en, le-myam en, tateh ga.

S2 stop écouter
Nē-tētēnge vitwag kēy ōl so na-ga, tateh hōn qal a le-myam.

S3 stop écouter
Ba– qōn̄ vitwag, yoge matag noyō, kōyō tog van i tog i tog en: kōyō na-tam kōyō a– na-tam kōyō!

S4 stop écouter
Mey na-tm̄an na-tam mey na-lqōvēn, wa tō– mey na-lqōvēn na-tam mey na-tm̄an.

S5 stop écouter
Vaga, lo-togtog noyō e, kōyō qeneqneg goy kōyō. Mey na-tm̄an wo ni-van qiyig ave, na-lqōvēn mas sok kē; mey na-tm̄an wo ni-van qiyig ave, kōyō mas sok kē.

S6 stop écouter
Tō, vel vanvan noyō, kōyō vēlēs a– kōyō nu-qul tiwag vēlēs. Kōyō van hēyēt, van tiwag; van qotmet, van tiwag… Kōyō et su vēlvēlwoy hōn te!

S7 stop écouter
Kōyō mo-tog qele nen i tog i tog i tog i tog en – mey na-lqōvēn kē ni-vap van hiy mey na-tm̄an wo / so kē ni-yon̄teg so kē ni-su gomgom.

S8 stop écouter
Bastō mey na-tm̄an, kē wo “Nēk gomgom qele nen ba-hap?” Amtan wo “Isi! Ba…”

S9 stop écouter
Mey na-lqōvēn ni-vēyvēyne van ēgēn. Kē wo “Nok vap dayday ēwē van, sowo no wo ma-mat, ba, no n-etbuste so nēk leg leh! No ne-myōs so nēk togtog lap hōw qele anen. Nēk togtog lap qele nen a nēk tit-leg leh te! ”

S10 stop écouter
Bastō mey na-tm̄an wo “Wō nēk vavap qele nen ba-hap?! Nēk hohole qele nen ba-hap?” Amtan wo “Oo! Nok gomgom e ba nok yon̄yon̄teg so – wun sisqet nok mat veteg nēk.”

S11 stop écouter
Tō mey na-tm̄an en kē ni-lololwon veg kē. Veg a so mey na-lqōvēn vēyvēyne van hiy kē en.

S12 stop écouter
E kōyō tog van. Tog van e, mey na-lqōvēn e ni-gomgom e – vel yēpyep a kōyō hayveg hay, mitimtiy hōw en, mey na-lqōvēn e ni-vap van “Dō togtog van e, nok yon̄teg no-gom mino kē ni-lililwo geh me. Ba sowo – qōn̄ vitwag sowo nēk wo m-et qelen̄ no, sowo no wo ma-mat veteg nēk, ba no et-buste so nēk leg leh. No ne-myōs so nēk togtog lap hōw qele anen.”

S13 stop écouter
E mey na-tm̄an wo “Wō nēk hohole qele nen ba-hap, ay?! hoho/ Tiy hohole te a nēk hole tō anen!” Mey na-lqōvēn so “E, nok hohole ēwē van! Nok yon̄yon̄teg no-gom mino kē ni-lililwo me e tō, nok hohole van.”

S14 stop écouter
Bastō, mey na-tm̄an en ni-dēmdēm liwo aē tō, mey na-lqōvēn e kē mal vap vag hip me no-gom nonon, wa kē may vēyvēyne… Ba so kē ni-vavap qele gōh ba-hap?

S15 stop écouter
Bastō kōyō togtog se van –

S16 stop écouter
Vag-tiwag, kōyō hayveg se hay l-ēm̄ noyō, wa mey na-lqōvēn e ni-vap se hag: “Dō wo togtog van, no wo ma-mat, ba no et-buste so nēk leg leh.”

S17 stop écouter
Wa vag-tēlnegi, bastō kē wo “Nēk to-togtog mahgē gēn; ba no et-buste so nēk leg leh. Ba, nēk wo mo-togtog van a no wo mal mat veteg nēk, tōqōn̄ a nok mat en, no ne-myōs so nēk tivig no a hōw le-mtēgtap nondō. No et-buste so nēk tivig no ave / ave te a so aslil, so ave…

S18 stop écouter
No ne-myōs so nēk gil na-qyan̄ hōw le-mtēgtap nondō nōk: nēk tivig no a hōw le-mtēgtap agōh. Tō nē-dēmdēm nan e so – vel-matap a nēk kalō, vel-yēpyep nēk hayveg me en: nēk hal lege no ewa nēk van, nēk hal lege no e nēk hayveg me. Tō, nok ēglal aē.”

S19 stop écouter
O, mey na-tm̄an e et-wēhgoygoy te kē van, kē ni-hohole: “Bastō nēk togtog van en: nēk t-ekas te iplu vitwag a kē ta-van me e, t-ak malaklak nēk velqōn̄. Tō galeg tō nēk ekas kē, qele so iplu, tō nēk tē-dēmdēm meh vēste.

S20 stop écouter
Ba nēk mōgmōgteg goy n-ēm̄ nondō, nēk tagtaghiy goy; ba sowo nēk wo m-ekas nē-tētēnge vitwag wo me-mtow hag lu-quy mino, ba nēk ukēg nē-tētēnge nan, veg kē qele so nē-tētēnge vitwag kē te-myin̄ nēk.

S21 stop écouter
Kē so me-mtow hag me, nēk mōgmōgteg goy, nēk tagtaghiy goy kē. Nōnōm anen, kē te-myin̄ nēk.” Kē ni-vap van hiy kē qele gēn.

S22 stop écouter
Bastō – Tōqōn̄ a kē n-/ Tōqōn̄ a ni-vanvan me nen, wah tō, mey na-lqōvēn en, kē ni-mat.

S23 stop écouter
Kē ni-mat nen etō, mey na-tm̄an en kē ni-ten̄ten̄ goy magaysēn kē van tō ni-dēmdēm ēgēn.

S24 stop écouter
Kē mē-dēm van i dēm: dēmsas lok na-ln̄e vēyvēyne nonon. “Kēh! Nēk / Kē ma-mat veteg no gōh, et-ēal te so no t-ak qele ave!” Wa tō, dēm lok na-ln̄an ēgnōn.

S25 stop écouter
Dēm lok na-ln̄an ēgnōn, so: “Ignik vēyvēyne veteg hōw: am̄ag den kē ni-mat e kē mē-vēyvēyne veteg hōw qele gēn, so wa: no te-tvig kē a le-mtēgtap ōk; bastō, lu-quy nonon e nok mōgmōgteg goy velqōn̄, ba so nē-tētēnge vitwag te-mtow aē.”

S26 stop écouter
Ba tō kē m-ak tatag qele a– na-ln̄an ēgnōn anen.

S27 stop écouter
Kē m-ak tatag qele nen: kē mi-gil na-qyan̄ le-mtēgtap; kē ni-tvig kē; kē ni-luw goy; bastō kē ni-tog van ēgēn.

S28 stop écouter
Kē ni-tog van i tog i tog en –

S29 stop écouter
Na-plih ni-mtomtow aē ewa kē ni-dow goy, kē ni-koko goy; na-plih ni-mtow ewa kē ni-ko.

S30 stop écouter
Bastō, kē n-et van qele kē: nē-tētēnge vitwag ni-mtow hag me a– a lu-quy nonon en!

S31 stop écouter
Ba tō kē ni-dēmdēm aē, so: “Na-lqōvēn e mē-vēyvēyne si tō hōw, so nē-tētēnge vitwag te-mtow me agōh. Ba no et-ēal te so na-hap? Bastō – Wun ikē agōh: nok traēm/ nok ukēg tog!” So nē-tētēnge a wun yo-/ na-lqōvēn nonon e wun vasem me, kē wun agōh. Bastō kē ni-ukēg ēgēn.

S32 stop écouter
Ba nē-tētēnge nan me-mtow hag me e kē me-mtow tenenen a– a la-tayben ige lōqōvēn en. Kē et-motow te lē-qtēn, so le-hap – Nu-quy nonon en tō e ba kē me-mtow yak togolgol a– la-tayben ige lōqōvēn en. A la-halgoy non ige lōqōvēn.

S33 stop écouter
Bastō– kē ni-ukēg nen e: na-ga e ni-suwyeg na-yon hag me tō, kē ni-mtow liwo ēgēn.

S34 stop écouter
Kē m-ukēg ēwē qele anen, be-ln̄e vēyvēyne non ēgnōn etō– Kē mo-tog van, m-etgoy van – Nē-tēnge e / na-hap en? na-ga e mi-lwo –

S35 stop écouter
Kē mi-lwo hag nen tō, kē ni-dēmdēm sosok aē, so: “Ignik vap so n-age gōh / nē-qētēnge vitwag gōh so te-myin̄ no, ba no et-ēglal hōn te so ba-hap. So kē te-myin̄ no qele ave?”

S36 stop écouter
Bastō, na-ga e van hag tō, mi-lwo; me-hyo kal hag; nō-gōygōyēn ma-van; bastō kē / mi-lwo ēgēn.

S37 stop écouter
Ba kē ni-dēmdēm liwo aē a so na-ga nan so te-myin̄ kē qele ave, la-han metehal. So kē ni-mtiy ēwē kē ni-qoyqoy aē? so kē so n-akteg?

S38 stop écouter
̄Kē et-ēglal hōn qete a so wun kē so n-in e tō na-ga ni-wuh kē. Tō kē ni-mtiy veteg nē-dēmdēm meh.

S39 stop écouter
Bas vag-tiwag nen, lemyēpyep nen en, kē ni-m̄ōl lok me den hēyēt tō ni-haghag le-mtēgtap nonon en; ba kē n-et van a– na-ghōw ni-gityak vagēh.

S40 stop écouter
Kē ni-gityak kal vagēh me a– lu-quy en, bastō ni-siseg van a lē-wti ga en.

S41 stop écouter
Kē ni-siseg van, sise–g e, ni-sam̄sam̄ a n-age / nō-gōygōyi ga en.

S42 stop écouter
E– kē ni-vōy kē. E na-ghōw e ni-van.

S43 stop écouter
E– tō qōn̄ tegha, lemyēpyep se nen en, na-ghōw e ni-van se me. Bastō na-ghōw ni-vanvan me lō-tōti ga, ni-sam̄sam̄ nen en bastō– dēmdēm nonon ni-plaplag aē ēgēn, so: “Na-ghōw van me sam̄sam̄ tō n-age agōh! Wa kē so ni-sam̄ bah e kē so ni-git-/ m̄ōl lok ewa kē ni-/ kē ni-taswul m̄ōl ēwē.”

S44 stop écouter
Bastō, lemyēpyep vitwag se nen, kē ni-haghag se nen wa tō na-ghōw e ni-van se me. Ni-plag van me tō– ni-sam̄sam̄ se nō-gōygōyi ga en –

S45 stop écouter
Bastō, kē n-et qele kē a kē ni-sam̄ bah nen e bastō, so ni-m̄ōl lok nen en: kē ni- kalō van nōk e– ni-qēsdi van; kalō van nōk e ni-qēsdi van…

S46 stop écouter
Bastō, dēmdēm nonon kē ni-plaplag aē tō– kē ni-dēmsas ēgēn, so: “Qeso nē-tētēn- / Qeso nē-tēnge gōh qeso n-et ta-sam̄ vēh!”

S47 stop écouter
Bastō – Taval meyen nan hag nen e tō – amtan wo “Nok lep egal tog, nok kuykuy egal te kis tog!”

S48 stop écouter
Tō kē ni-hel m̄ēt / kē ni-tep m̄ēt nō-gōygōyēn vitwag tō– kē n-in ēgēn. / Óòó kē ni-sam̄.

S49 stop écouter
Kē ni-sam̄ nen, bastō kē ni-yon̄teg a qeso nē-qtēn ni-m̄ōlm̄ōl aē tō– kē ni-mtiy galsi. An̄qōn̄ ewa kē ni-mtiy galsi.

S50 stop écouter
Kē mo-wow van qele nen – Wow van i wow en: kē ni-sam̄sam̄ gōygōyi ga en.

S51 stop écouter
Bastō, vag-tiwag nen en, kē ni-dēmdēm lōlhiy van so “Nē-tēnge a– ēgnōn vasem tō van en, so nok so ukēg hōw en, kē so ni-myin̄ no en, nē-tēnge nan agōh!”

S52 stop écouter
Bastō – kē ni-vētleg no-yoy hiy ige nonon ēgēn. / ige nonon, so “No ne-myōs so kimi van me, gēn so gen nō-qōn̄ m̄eldēl non… (na-lqōvēn nonon en)!”

S53 stop écouter
Tō, kēy van me tō, kēy galeg ne-gengen liwo hag; bastō kē so “No ne-myōs so / No m-ōlōl kimi me, so gēn so sam̄ nō-gōygōyi qētēnge agōh.”

S54 stop écouter
Kēy so “Wō na-han qētēnge qele nen?” Kē wo “Óòó nē-qētēnge gōh me-mtow me agōh, ba no ne-myōs so gēn so sam̄ so dēm lok (na-lqōvēn nonon) aē en.”

S55 stop écouter
Bastō kēy van tiwag me tō – kēy goy gōygōyi ga e tō, sam̄ ēgēn.

S56 stop écouter
Kēy et-ēglal qete so wiyiy qele ave e tō kēy sam̄. Kēy sam̄ yosveg hag nen tō– na-ga e ni-wuh yosveg kēy tō– kēy mitimtiy.

S57 stop écouter
Ba vaga e, kē ni-van bah hēyēt, m̄ōl lok me en, kē ni-dēmdēm veg ēgnōn a ni-dēmdēm!

S58 stop écouter
Wele, na-lqōvēn / yoge matag noyō e so kōyō so leg van tō so kōyō so qeneqneg goy kōyō en aa, kē ne-meh a so vitwag so ni-qlen̄ lō van nōk e – ēgnōn mas sok kē.

S59 stop écouter
Bastō– kē m-ekas van so / Ige nonon so “Hiywē! Na-kaka non igni e, na-hap a kē vasem tō en aa, nē-tētēnge nan agōh.” Tō– kēy ēglal van ēgēn.

S60 stop écouter
Tō so, na-ga en, kē bu-wuwuh dēmdēm.

S61 stop écouter
Bastō, kē ni-tig tēy a– n-inin / sam̄sam̄ gōygōyi ga, vel yēpyep en, ewa kē ni-mtiy galsi.

S62 stop écouter
Kē mo-tog van qele nen i tog en – tō, kē me-tmayge tō– kē et-leg leh te qele ēgnōn vasem en.

S63 stop écouter
Tō, kē me-mlaklak tasga qele anen. A kē et-leg hōn te / lok te; bastō / veg na-ga me-myin̄ kē en: tō kē tē-dēmdēm meh vēste –

S64 stop écouter
Bastō ige nonon e kēy / kēy van sororo tō: hē nōk ni-m̄ōl ewa ni-tot nē-wtēn tō ni-van; hē nōk ni-m̄ōl e, ni-tot nē-wtēn, tō kēy van tō, vah tō –

S65 stop écouter
Ige hip ēglal van ēgēn, so: na-ga, totogyeg a kēy eksas van en, a l-ēm̄ non mey nan en. Tō kēy lep tō, van vavah tō, kēy sororo tō na-ga tō, kē ni-van vel mahē ēgēn.

S66 stop écouter
Ba na-kaka gōh kē e, na-kaka te-le-pnō Qo e a hōw Pentēkos tō –

S67 stop écouter
Wa ige ta-Tana m̄ōl ewa lep namuy; ige nōk van, t-Ēpi, lep ewa van lep…

S68 stop écouter
Tō van tō na-ga ni-lil hōw del le-pnō hōw Vanuatu ēgēn.

S69 stop écouter
Tō qiyig gōh kē e, gēn ta-vap vēh so na-ga, wun Vanuatu kēy qēt aē, na-ga qēt aē; ba totogyeg a kēy m-ekas na-ga en, hōw a le-pnō Qo en.

S70 stop écouter
Ba veg kē ma-kalō den taqn̄ē lōqōvēn en.

S71 stop écouter
Tō– na-/ Nēk ne-myōs ēglal a sowo na-ga ma-kalō hēywē den na-lqōvēn en? na-ga, vaga hip a ige hip ne-myōs e lep e, kēy lep vēlēs a an̄qōn̄. Veg a kē ma-kalō den taqn̄ē lōqōvēn en.

S72 stop écouter
Bastō, totogyeg a nēk ne-myōs so et na-ga ni-mtow a so nēk wo tivig na-ga en: kē ni-mtow hag me e, na-yon, kē ni-mtow hag me am̄ag, nēk et a qeso na-taqn̄ē lōqōvēn.

S73 stop écouter
Tō, na-kaka nan a kēy vap a so na-ga ma-kalō den na-lqōvēn en, kē gēn! Na-kaka ne ga e, kē m-/ qele ave tō kē ma-kalō me e, kē ma-kalō me qele anen.

S74 stop écouter
Tō qiyig gōh kē tō– na-ga mi-hip tō, m-aē le-myam, tō ige sil m-ēglal qēt ēgēn so na-ga, nō-tōti qētēnge vitwag, na-han na-ga, ba tō, kē et-inin soloteg te.

S75 stop écouter
Kē me-mtow hag me e, bē-dēmdēm gēn.

S76 stop écouter
Tō, bah hōw anen. Vēwē nēk.