Pushing my canoe to the sea


Continuous playing:

Transcription by sentence


Whole text transcription


Io, na n-atevo, ae, piene peini pe li-bo kuo i-le i-le i-vagasi basavono po kape li-elele li-abu, me i-le i-wene vitoko ne kulumoe me kape le-bo awoiu.
Io, noma, ae, dapa noma vana li-bo kuo ne ngogoro, kape le-toe oie kuo. Ka li-bo oie kuo.
Li-bo oie kuo pe li-ko, ae, wako pe le-bo kiane, ka iote, mimione.
Pe nga le-vilu ñi, le-to, we le-vesu bavede ñi nga ponu, wako pe mimione.
Ngele nga, i-le i-toe kuo iape ne ngogoro: kape i-toe i-abu i-wene, i-toe mengela mina awoiu, ka li-la longe mina.
Li-la longe mina, kape i-ejau ae, tiaume peini tev’ tilu pon me i-vio, awoiu;
i-romo i-ko “K’ awoiu, kape /” i-rom’ i-ko ka votobo pe i-ioi i-abu, kape i-/ nga mwaliko pe i- / kata i-kila emele, kape i-viñi emele iape me la-le lai-odo ngaten’ mijaka ne sekele.
Ngaten’ ae? lai-au jebute we ngaten’ ae?
La-kamai, lai-apilo vekai nga ponu;
me kape, ngele, dapa gete we dapa wopine po li-le li-katei kuo iadapa pe n’ adie po li-katei i-ka i-vagasi kulumoe, ka li-womanga dapa.
Io, nga ne moro po kape le-le le-katei kuo ponu, kape le-le le-koie ne ngogoro ponu, dapa gete, ka dapa wopine, ngele po i-le kape i-katei kuo, *na vi* i-tabulu ebel’ ini ne ae, ngogoro.
Kape i-vokoi’ iebe. Iebe kula kuledi pon, kape i-vokoi’ i-vio ne webwe ne ma ini.
Ka kape le-go dapa: dapenuo kape le-go dapa. Le-go dapa.
Pon li-tobo ñi, li-ko, pon basavono pon basavono peini pe li-pei idi.
Ka ponu, kape le-le / ne moro po kape le-le le-katei kuo ene, le-le le-vagasi kuo / temaka pe kuo i-wene ponu,
kape le-ngago, ae, ngatene?, moboro se tiaume peini kuo ponu: ka awoiu, kape le-katei i-ab’ i-le pon.
Dapa kula, noma, kape le-/ le-tau / dapa noma, dapa / uro we tongolukilo peini ngaten’ motoro i-wen’ tev’ dapa —
Moro kula nga mwaliko ponu, tongolukilo peini ngaten’ motoro, i-wen tev’ ini, kape i-iumu i-le.
I-ium’ i-le, i-tau uro i-wene ne basa kuo iape teve tilu pon;
Awoiu i-pidi ne tongolukilo, awoiu, ka i-wene, me dapa / idi le-le le-katei ponu,
kape le-katei le-lengi motoro tae.
Ka pon, le-katei pon, kape mwaliko pe i-vio ne teviri pon i-labu ae, tevokowo pon – kape / ebele nga / i-tedie dapa ne vesepiene kula, vesepiene iote.
Awoiu, buro kata kape i-le pon. Ngele nga i-ko i-oburo buro ae pon, kape i-obur’ i-le.
Mwaliko po i-labu tevokowo ponu, kape i-woi ne (ae?) teviri peini kuo ponu, awoiu kap’ i-ko “Ia! Takoli! Ia ia, takoli ! ia ia!”
Pive donga awo p’ne no ma viao pive donga awo p’ne no ma viao / pive donga awo p’ne no ma viao / / Pi-katau ole, pi-ke vatemo /
Pon. Katae pon. Buro abia, i-wene. I-kae? Tab’ n-oburo iote?
Pive donga awo p’ne no ma viao pive donga awo p’ne no ma viao / Wo wa deda, wo wa deda /
Katae pon.
Pon. Kape l-oburo buro nga ponu, ’bele ko li-oburo buro tilu ponu, ia idi ponu. Ka li-kotu ñe kuo pon, li-abu li-lui.
Kape i-le i-le i-le– nga mevia dapa tae, ka le-re mevia dapa.
Le-re mevia dapa awoiu, mwaliko pon kap’ i-tabo i-vete:
“Ia! Takoli! Ia ia, takoli ! ia ia!”
Ini, idi ka / vesepiene pon ebele ko nga i-tedie dapa, li-aiu ka li-labu moboro, awoiu pon, buro iote kape i-tab’ i-le, ini kape le-katei kuo le-le.
Le-katei kuo le-lui le-lui le-lui le-lui i-le i-le – i-ke ne kulumoe.
Nga kulumoe somu, kape i-ke i-le, i-ke ne revo, ka revo i-koie ka le-gulei kuo pon le-lui.
Le-lui i-vagasi kulumoe, ka le-katei kuo ie mwaliko pon i-ven’ ne kulumoe,
ne (vele?) pe ini i-ko i-wen’ ene, me vitoko teve me kape i-bo:
ponu, ka li-venei, ka i-wene.
Kape le-lui i-wene awoiu, ka momoso ie mwaliko ponu, kape i-la mawene i-kamai i-tate, awoiu ka i-ejau (ae) none, po la-ko me peini kuo iada ponu;
kape i- ajau i-wene awoiu ka la-wamanga ne dapa pe li-katei kuo iada pon.
Awoiu ka, l-anu ero. Awoiu ka le-te le-kanu.
Awoiu kape le-tabo le-le i-katau uña mwoe iadapa.
Ponu, piene mijaka peini li-katei kuo katae pon. Awis.
S1 stop écouter
Io, na n-atevo, ae, piene peini pe li-bo kuo i-le i-le i-vagasi basavono po kape li-elele li-abu, me i-le i-wene vitoko ne kulumoe me kape le-bo awoiu.

S2 stop écouter
Io, noma, ae, dapa noma vana li-bo kuo ne ngogoro, kape le-toe oie kuo. Ka li-bo oie kuo.

S3 stop écouter
Li-bo oie kuo pe li-ko, ae, wako pe le-bo kiane, ka iote, mimione.

S4 stop écouter
Pe nga le-vilu ñi, le-to, we le-vesu bavede ñi nga ponu, wako pe mimione.

S5 stop écouter
Ngele nga, i-le i-toe kuo iape ne ngogoro: kape i-toe i-abu i-wene, i-toe mengela mina awoiu, ka li-la longe mina.

S6 stop écouter
Li-la longe mina, kape i-ejau ae, tiaume peini tev’ tilu pon me i-vio, awoiu;

S7 stop écouter
i-romo i-ko “K’ awoiu, kape /” i-rom’ i-ko ka votobo pe i-ioi i-abu, kape i-/ nga mwaliko pe i- / kata i-kila emele, kape i-viñi emele iape me la-le lai-odo ngaten’ mijaka ne sekele.

S8 stop écouter
Ngaten’ ae? lai-au jebute we ngaten’ ae?

S9 stop écouter
La-kamai, lai-apilo vekai nga ponu;

S10 stop écouter
me kape, ngele, dapa gete we dapa wopine po li-le li-katei kuo iadapa pe n’ adie po li-katei i-ka i-vagasi kulumoe, ka li-womanga dapa.

S11 stop écouter
Io, nga ne moro po kape le-le le-katei kuo ponu, kape le-le le-koie ne ngogoro ponu, dapa gete, ka dapa wopine, ngele po i-le kape i-katei kuo, *na vi* i-tabulu ebel’ ini ne ae, ngogoro.

S12 stop écouter
Kape i-vokoi’ iebe. Iebe kula kuledi pon, kape i-vokoi’ i-vio ne webwe ne ma ini.

S13 stop écouter
Ka kape le-go dapa: dapenuo kape le-go dapa. Le-go dapa.

S14 stop écouter
Pon li-tobo ñi, li-ko, pon basavono pon basavono peini pe li-pei idi.

S15 stop écouter
Ka ponu, kape le-le / ne moro po kape le-le le-katei kuo ene, le-le le-vagasi kuo / temaka pe kuo i-wene ponu,

S16 stop écouter
kape le-ngago, ae, ngatene?, moboro se tiaume peini kuo ponu: ka awoiu, kape le-katei i-ab’ i-le pon.

S17 stop écouter
Dapa kula, noma, kape le-/ le-tau / dapa noma, dapa / uro we tongolukilo peini ngaten’ motoro i-wen’ tev’ dapa —

S18 stop écouter
Moro kula nga mwaliko ponu, tongolukilo peini ngaten’ motoro, i-wen tev’ ini, kape i-iumu i-le.

S19 stop écouter
I-ium’ i-le, i-tau uro i-wene ne basa kuo iape teve tilu pon;

S20 stop écouter
Awoiu i-pidi ne tongolukilo, awoiu, ka i-wene, me dapa / idi le-le le-katei ponu,

S21 stop écouter
kape le-katei le-lengi motoro tae.

S22 stop écouter
Ka pon, le-katei pon, kape mwaliko pe i-vio ne teviri pon i-labu ae, tevokowo pon – kape / ebele nga / i-tedie dapa ne vesepiene kula, vesepiene iote.

S23 stop écouter
Awoiu, buro kata kape i-le pon. Ngele nga i-ko i-oburo buro ae pon, kape i-obur’ i-le.

S24 stop écouter
Mwaliko po i-labu tevokowo ponu, kape i-woi ne (ae?) teviri peini kuo ponu, awoiu kap’ i-ko “Ia! Takoli! Ia ia, takoli ! ia ia!”

S25 stop écouter
Pive donga awo p’ne no ma viao pive donga awo p’ne no ma viao / pive donga awo p’ne no ma viao / / Pi-katau ole, pi-ke vatemo /

S26 stop écouter
Pon. Katae pon. Buro abia, i-wene. I-kae? Tab’ n-oburo iote?

S27 stop écouter
Pive donga awo p’ne no ma viao pive donga awo p’ne no ma viao / Wo wa deda, wo wa deda /

S28 stop écouter
Katae pon.

S29 stop écouter
Pon. Kape l-oburo buro nga ponu, ’bele ko li-oburo buro tilu ponu, ia idi ponu. Ka li-kotu ñe kuo pon, li-abu li-lui.

S30 stop écouter
Kape i-le i-le i-le– nga mevia dapa tae, ka le-re mevia dapa.

S31 stop écouter
Le-re mevia dapa awoiu, mwaliko pon kap’ i-tabo i-vete:

S32 stop écouter
“Ia! Takoli! Ia ia, takoli ! ia ia!”

S33 stop écouter
Ini, idi ka / vesepiene pon ebele ko nga i-tedie dapa, li-aiu ka li-labu moboro, awoiu pon, buro iote kape i-tab’ i-le, ini kape le-katei kuo le-le.

S34 stop écouter
Le-katei kuo le-lui le-lui le-lui le-lui i-le i-le – i-ke ne kulumoe.

S35 stop écouter
Nga kulumoe somu, kape i-ke i-le, i-ke ne revo, ka revo i-koie ka le-gulei kuo pon le-lui.

S36 stop écouter
Le-lui i-vagasi kulumoe, ka le-katei kuo ie mwaliko pon i-ven’ ne kulumoe,

S37 stop écouter
ne (vele?) pe ini i-ko i-wen’ ene, me vitoko teve me kape i-bo:

S38 stop écouter
ponu, ka li-venei, ka i-wene.

S39 stop écouter
Kape le-lui i-wene awoiu, ka momoso ie mwaliko ponu, kape i-la mawene i-kamai i-tate, awoiu ka i-ejau (ae) none, po la-ko me peini kuo iada ponu;

S40 stop écouter
kape i- ajau i-wene awoiu ka la-wamanga ne dapa pe li-katei kuo iada pon.

S41 stop écouter
Awoiu ka, l-anu ero. Awoiu ka le-te le-kanu.

S42 stop écouter
Awoiu kape le-tabo le-le i-katau uña mwoe iadapa.

S43 stop écouter
Ponu, piene mijaka peini li-katei kuo katae pon. Awis.