The origin of Tamate masks


Continuous playing:

Transcription by sentence


Whole text transcription


Li-ko Tamate ponu: mwaliko iote da emel’ iape. Pe da-tilu pe Teanu. Kulumoe iada Aneve.
Li-te li-te ra, ka la-ko kape la-le ne basakulumoe iote re, Tetevo. La-l’ la-romo dapa iada, dapa ne da: ai’ ada dapa, tili’ adapa dapa, gi’ adapa dapa, nga pon –
La-ko kape la-le ponu, nga nanana: la-le, lai-odo ngaten’ ada.
Lai-au jebute, la-kidi puluko ada, lai-ali buioe ada, la-kamai ponu.
Vono i-sodo, lai-ejau / mwalik’ iape i-ven’ i-la vongoro ne belemele i-abu i-vo. Emel’ iape i-maili iawo i-tau jebute.
I-tau jebute awoiu ponu, i-lu; mwalik’ iape i-vo vongoro awoiu pon i-wete.
Awoiu pon, emel’ iape i-tau jebute moioe ponu, i-loko i-ka i-le ne monone ka i-wete. I-wete awoiu ka i-ejau mama ada.
Awoiu ponu, ka emel’ iape ka i-wapono.
Vono i-sodo, kape la-le Tetevo pon.
Vono i-sodo pon, la-/ i-elele kuo iada i-abu, la-loko ngatene ada i-le: namolo iada, buioe ada me puluko, none ada, pon, mama po lai-ejau.
Wako po ka la-viñi dapa iada pon, Aneve, la-ko “Keba ba-le Tetevo na!”
La-la bavede i-vio pon, ka la-vesu bavede i-le.
I-le, la-koie Tetevo. Kulumoe / La-l’ la-koie ne kulumoe pon, Tetevo.
La-koie ka la-le teve dapa iada pon –
La-te ra ra, bwara kata kape ebieve iune bwara metele tuo, nga pon.
Pe ngiro mamote i-ka ne tevie ne / i-aka i-lui, li-ko ne ngiro Tangake *ma* i-vio tevie na.
Lai-te Tetevo ra ra ra ra – ka i-le ne velesebe: ngiro ka i-kamai tevie ne Palapu.
Ka la-vete la-viñi dapa iada pon Tetevo “Ia keba ka ba-tab’ ba-le na.” Dapa li-ko “O, wako.”
Ponu ka li-le ne sekele li-au jebute, li-kidi puluko, li-ali buioe ada –
Li-kamai ponu, li-wete mama ada. Wako li-wapono.
Von’ i-sodo ponu pon, la-ko “O, keba na ka ba-tab’ ba-le kulumoe iaba na.” Li-ko “Wako.”
Ponu. Li-loko ngaten’ ada i-le ne kuo wako ponu; la-la bavede iada i-vio, la-vesu ka la-ka.
La-vesu bavede kape i-ka / la-ka la-ka la-ka –
La-kovi vono basakulumoe na, ka la-kovi basakulumoe iot’ aplaka Teanu re la-ka la-ko “E! Kia na ka la-kovi basakulumoe iakia na ta!”
La-le, mamote somu tae, bwara nga ne to ñe na ka Tekupie. Ka la-romo temotu iote apilaka.
Ka pon. La-ko “E! Temotu iote apilaka pon!”
Pon, ka kuo iada ka susuko se. I-le i-le i-le, kape la-koie / ka vitoko pe la-koie ponu la-lengi dapa.
Pe kulumoe ponu, kulumoe iaidi mwaliko tae: ponu ngatene pon ñoko Tamate.
Ia pon tadoe tae. Pon i-ovei pe i-vete piene samame idi mwaliko.
Ponu kulumoe iadapa ñoko, temotu pon.
La-ka la-koie *ka* vitoko pon, mwaliko iape ka i-madau i-ko “E, kape la-koie, dapa na kap’ li-abu kia!”
Pon i-la visone iape i-ka i-ngago.
I-ngago wako, i-la puro kula i-vio ne waluko. Tilu i-labu sam’ visone.
Ka bavede iada, ka la-bu / lai-bu / la-bu.
Ka i-la i-le i-abu i-wene, ne kuo.
Ka i-viñ’ emel’ iape i-ko “U-wai i-ka! U-wai u-mabui! Kiane ’tapu!
La-koie nga dapa li-ko li-abu kia, ene kap’ ne-korone n-abu iune we tilu, tete o / wako na. Awoiu dapa ka li-abu kia viri.”
La-koie pon ini i-vio i-labu visone, wako kuo i-le i-sai.
La-sai ponu, dapa li-abu li-ka.
Li-ka ponu, li-ko [ive?] Li-wokobe da.
Pon la-ka la-koie la-sai.
Li-ko “Ia oo!” Dapa li-ko “Oo!”
Teliki iadapa semame dapa li-abu li-ka, li-wokobe da po la-sai kuo.
Wako, ka li-vete / teliki iadapa i-vete “Kupa na kupa mwaliko tae. Ka kaipa mwaliko na ia kupa na ngatene nga na, na ba-romo kupa na!
Wako, kape pe-loko dapa gete enone nga pon, da meliko viñevi, le-loko temamene iamela le-le moe pon i-vio.”
La-loko ngaten’ ada ka li-le ne moe wako ka li-elele kuo iada i-vene.
La-le ponu ka lai-te pon. Ka pon dapa moro abia ponu, Tamate pon pe li-te ñi pe li-mako li-mako, nedemo, tomoro, nedemo, tomoro…
Li-mako li-mako, ne, po li-pinoe.
Ka basakulumoe ponu, temotu apilaka pon, vilo pe i-vio ene pon, vilo tamwaliko tae. Pon vilo pe li-e ñoko. Ne temotu pon.
Nga vewo, bale, iliro, luro, teno, takalamu, doko…: wonone pe li-e, vilo iote tae. Ne basakulumoe pon, o temotu pon.
La-te la-te pe ngiro mamote i-aka i-kamai Palapu: kape la-ka / la-tabo la-ka Teanu metae.
La-te ra ka labiou bwara metele tuo ka awoiu.
Awoiu pon, ngiro ka i-lubi. Ka i-lubi *amjaka* i-tabo i-lui *ko*…
Pon, ngiro ka wako ka la-viñi teliki iadapa: “O, keba ba-tab’ ba-le Teanu na pe ngiro ka wako.”
Ia teliki iadapa i-ko “Wako. Minga kape ba-le?” I-ko “Mobo.”
Pon. Ngasune nga pon.
Li-l’ li-odo ngatene ada.
Li-bi ua vilo nga pon, nganae nga bale, vewo, iliro, iuko, teno – nga pon, li-kamai.
Ka von’ i-sodo, ka pon teliki iadapa i-viñi da / mwalik’ iape / emele pon da mwalik’ iape i-ko “Ive? Ba-romo kupa wako we tamwaliko?”
“E! Ba-romo wako! Ba-rom’ kaipa wako!”
Ka teliki iadapa i-vet’ i-ko / teliki pine i-ko “Ive? Awa kela ne dapa gete kula ’none ba-ko ba-lui, we tae?”
Ka mwaliko pon i-ko “Nga eo u-re dapa! U-ko ne-la dapa kula ne-lui pe ni-romo wako ka ni-romo makone iaipa wako po pi-pinoe.
Me ne-lui me ne-wasi ñe dapa enone, Teanu.
Pe kupa ponu makone enga-kula ia na iote ni-romo ka wako tamwalikose!”
I-ko “Wako.”
Ka mobo kata kape la-ka ponu: li-elele kuo iada i-abu li-loko ngatene ada i-le awoiu, namol’ iada –
Wako, teliki iadapa i-ko “Kape ne-la / ne-viñi dapa teva. Kape le- / u-la u-lui. Ka tili ene, et’ adapa: Takulalevioe.”
Mwaliko pon i-ko “Wako.”
Dapa tieli’ adapa na li-vene ne kuo same da pon, bavede i-vio po ka li-ka!
Li-ka li-lui bavede kape la-ka ne kulumoe iada pon, la-ka Teanu.
La-ka la-ka la-ka la-ka – pe ngatene ponu, nga ebele ko, Tamate pon li-romo nga mwaliko. Ka nga tadoe i-ovei pe i-tomwoe.
La-ka la-ka la-ka pon, ka li-tomoe mina kuo iada! Ka li-tabo li-le ne temotu iadapa pon.
Io, ka kulumoe temotu iadapa ponu, enga ini Veluko. (Ka ni-mui pe ni-vete temotu ponu, enga ini Veluko.) Pon.
Ka tabo la-le! Li-le awoiu.
La-romo kuo iada moli.
“E! Menuko iakia ka li-tomoe!”
Mwalik’ iape i-ko, i-viñ’ emel’ iape, i-ko “E! La-tabo la-le! Ene awa ene ni-ko la-lui, pe teliki ka i-re se kia.”
La-bu bavede iada i-wene ponu la-tabo; la-wai i-le.
I-le i-vagasi Veluko ponu, teliki ka i-romo dapa : “E! Kaipa ka pi-tab’ pi-ka?” I-ko “Mm!”
– Ia po ini i-ovei. – I-ko “E! Ba-lui ponu dapa na ka li-tabo li-ka!
Dapa na ngatene nga tevie mwaliko, tevie nga li-romo nga tadoe.
Li-ovei pe li-tomoe, li-ovei pe li-tabo li-ka, nga ponu.
Ia eo, awa eo i-vian’ tamwase?” I-ko “Mm!”
Ka teliki iadapa i-ko “Wako. Na kape ne-tab’ ne-viñi dapa le-vene ne kuo teve kela, ka pe telepakau adapa telepakau pe na, i-dai kulumoe na, Teanu ka iote basakulumoe iote pine na.”
Nga, ive, da viñevi nga li-te ne manoko kape le-mokoiu nga pon, ne? Ngatene pon kape li-te / li-ka li-koie ne moe nga pon tae.
Ka i-viñi i-ko “Namolo i’ emel’ iono po va nga i-te ne manoko, kape i-la i-kawi ñe dapa, me kape le-tabo le-tomoe metae.”
Ka mwaliko po i-ko “Wako.”
Po li-vene ne kuo po i-viñi emel’ iape: i-la namolo iape iote po ra nga metele i-ka i-te ne manoko i-la i-kawi ñe dapa.
Pon bavede i-vio pon ka la-ka. La-ka la-ka ne basakulumoe iote aplaka re, la-koie Teanu la-koie ne Adie Vono. La-ka la-koie ne Aneve tae.
La-koie ne tevie ponu, la-koie, vele, Anboi.
La-koie ponu, la-lui Tamate ka et’ ada pon / et’ adapa pon, ae, Takulalevioe. Enga ini iote li-ko, ae, Takole. Takulalevioe, o Takole.
La-wamu ne bonge iote pon. La-wamu i-wene pon, awoiu da ka la-tab’ la-ka.
La-le, la-le la-koie ne kulumoe iada, Aneve. Ka li-te.
Li-te ra, wa-ini, li-ajau none, ka li-le ne toplau, li-anu kava. Li-anu kava awoiu, ka li-vongo viri.
Li-vongo awoiu ponu, ka mwaliko ponu i-ko “Uña teliki / teliki makumoso, ka uña teliki, ka dapa wopine peini kulumoe, ka dapa gete, ne-ko kape ne-viñi kiapa. Iote kape ne-viñi kaipa teliki na.”
Dapa teliki li-ko “Wako. Nganae a-ko u-vete?”
Ka pon ini i-ko “Ene awa ene ni-ko kape, ae, l-apilo sekele / me kape l-apilo sekele.
Uña teliki ka idi abia na, kiapa abia na ne kulumoe na. Dapa po li-kila emele, dapa wopine.”
Ponu. I-vete i-wene ponu, ka teliki i-ko “O, wako.”
Moro nga ne, pon, kape le-le li-apilo sekele ie mwaliko iote wako, mwaliko iote, mwaliko iote, nga pon.
Awoiu ra, awoiu pon li-tau.
Li-tau sekele ponu awoiu, moro iote li-le li-teli avtebe.
Ne sekele ie mwaliko iote, ie teliki iote, teliki iote, teliki iote, wako dapa wopine.
Wako dapa abia pon ra awoiu. Sekele peini jebute ka li-teli awoiu.
Ra ra i-le ne to ebieve, vongoro ka i-mote.
I-mote po, li-le li-bi vongoro adapa.
Li-bi vongoro we teliki iote, teliki iote, teliki iote, i-katau dapa awoiu, li-kamai, li-loko i-vene ne belemele li-sabisi li-maliawo boso.
Pon ra kokoro. Vongoro ka kokoro ponu, ka jebute / avtebe adapa ka i-maili i-vene kata ka vitoko kape moso.
Ka i-wene i-le i-le i-le, jebute ka moso. Nga ponu.
Li-teli avtebe, ia li-vo udo.
Udo, enga tilu: udo engaenga, abia na tae, na udo vaiene, ka udo vakaero. Udo peini kulumoe. Ponu.
Awoiu ponu, li-vete li-ko kape le-mini ngapiene.
Kape le-mini ngapiene ponu kape / vele, Aneve.
Ra jebute ka moso pon, pon.
Ka li-le, li-vokoiu longe. I-ka i-wene.
Longe i-katau dapa abia pon awoiu li-kamai i-wene awoiu, li-le li-toe tepapa.
Li-toe tepapa li-bo li-bo li-bo, awoiu. Li-kamai i-wene.
Ia jebute ka moso. Udo kata kape ka moso.
Moro iote, kata kape le-tetele pon, li-le li-toe blateno, vilo po li-ko blateno.
Li-kamai li-toe moboro peini, li-kamai pon i-wene ponu.
Vono i-sodo ponu, li-le / li-ae kie tepapa.
Li-ae kie tepapa i-dadai awoiu ponu, li-iu.
Li-iu tepapa i-dai awoiu, blateno ka li-toe li-kamai.
Moro iote pon, li-vesu blateno i-vio.
I-vio ka li-wabeiu ñe moboro teva: iote i-le nga ne, iote i-le nga ne, iote i-le nga ne, nga ne, me blateno i-vio, susuko, ne to.
Tepapa i-dai ka ne mane po, li-vo aero i-dai.
Li-vo aero i-dai, li-ngago bauluko i-dai, me kape le-mako ne to.
Pon li-le, vono i-sodo li-le li-au jebute.
Li-kamai ponu, i-wene ne kulumoe, kata kape le-tetele kape le-pinoe pon ta.
Li-kamai ne aeve ka i-le ponu, ka li-vo vongoro.
Da viñevi li-maliawo kape le-tau jebute.
Awoiu pon i-katau moe.
Awoiu pon, li-wete jebute li-wete vongoro awoiu pon, li-ejau mama.
I-katau dapa pon. Moe iote tekumete tilu, tete, nga ponu.
Awoiu, awoiu pon, i-le nga pon, aeve ka i-tavali ponu, dapa ka li-le li-vongo ne toplau.
Teliki, samame dap’ wopine, dapa gete; da viñevi, ne mwoe.
Ne mwoe ie amwaliko po i-vete piene ñe ngapiene pon / makone ponu. Pe utele i-viane ini. I-ko kape li-ejau / le-vesu makone, ngapiene.
Ponu ka li-vongo awoiu ponu ponu, li-ko “Na ta! Kata kape le-pinoe na ta.”
Pon li-le. Dapa kula li-vio li-dadai mane, i-katau uña tepapa ponu.
Dapa kula li-le, nga mane i-wene na, dapa kula kape le-le le-tetele i-ka re. Nga ne ole nga ne moe ie Kaluiki re.
Li-tamava ene i-ka. Li-tamava ene i-ka pon, buro pe li-oburo, kape le-ka pon le-ko:
Eie kio nupu / Ila vasongo kia e nupu / Ila vasongo kio o nupu / Ila vasongo kia e nupu / Ivo utele ke / Ivo utele ke iou nupu / Ila vasongo kia e nupu
Ponu. Li-tamava ene i-ka i-ka i-ka i-ka, i-vene i-ka i-le ne mane.
I-vene i-le ne mane ponu, li-wate tepapa.
Pe dapa ka li-vio i-dai tepapa nga pon, li-wate tepapa ponu, ka li-pinoe pon ta.
Li-tetele ka nga li-ko ngapiene po ka li-pinoe.
Ka ngapiene ponu, kape moro tilu me tete nga pon tae: kape metele iune!
Noma li-katau ñe metele po li-romo metele i-ka ra ra ra i-tomoe, li-ko “Ka metele iune pon!”
Ponu. Ae, ngapiene o makone po kape metele iune.
Ka mwaliko pon i-viñi dapa teliki, po i-kamai tamate pon, i-ko kape i-le po kape i-viane ebele ngapiene, i-ko / nga nanana, mobo ngapiene awoiu.
“Kape ene awa ene momobo, pe revo i-ma nedemo, ra momobo, revo i-ma;
kape idi abia ponu na Aneve na, li-abu li-le li-vio n’ ole: dapa wopine, da viñevi, uña teliki, da meliko, me kape le-romo kape keba ba-kila menuko iaba le-ke le-da noma re le-ka re, Nom’ Nomianu re.
Kape ba-woi okoro, bai-oburo, dapa ñepe na kape le-mako i-ka.”
Ka dapa li-ko “Nganae?” I-ko “Tae! Kape ba-vete mou, ka pe-romo, dapa ñepe kape le-mako i-ka, we le-pinoe i-ka.”
Ponu. Dapa abia ponu li-ab’ li-le n’ ole.
Revo i-ma, da po la-woi okoro, kape la-mede i-ka pon, ponu ka lai-oburo.
Buro pe li-mede i-ka pon li-ko:
Mule muleia / Mulablamateie
Mule muleia / Mulablamateie
Labiou tae, li-romo dapa ka li-mako i-ke, li-da noma iote pon, Nom’ Nomianu.
Li-ke pon ka li-romo ka dapa ka li-madau li-ko “Ponu nganae pine ponu? Pon tadoe? Pon tepakola? Kape i-e idi? O kape i-abu idi?!”
Ia li-romo wako. Li-romo dapa wako. Ui! Li-romo wako, ia idi li-madau.
Ponu. Ka li-ko kape le-tabo le-le le-koie ne moe iadapa nga pon, dameliko, da viñevi wopine, nga pon.
Ka da la-ko “Tae! Pe-madau etapu, ponu menuko iaba.
Pon tadoe tae. I-abu idi tae. Tepakola tae.
Pe-rom’ kape le-mako i-ka teve kiapa kape le-ven’ le-le le-mako, ne mane.”
I-ka i-ka i-ka ponu, dapa kula mo ka li-wo.
Li-le li-wamu dapa ne pwa moe, mata dapa / li-koie ne moe mata dapa i-ke, nga pon.
I-ka i-ka i-ven’ i-le, la-woi okoro ne mane. Li-le li-mako.
“E, io! Makone iote nga pon ne! Na la-viñi kiapa na –”
Awoiu pon ka mwaliko ponu ka i-atevo na “Ba-ko le-mini ngapiene pon, me kape pe-romo menuko iaba pe ba-kamai, ka kape dapa ñepe na le-ka le-mako ka li-romo makone ponu wako.”
Ka ponu makone ponu, peini tamate ponu, makone peini kulumoe tae. Ponu pe da la-la la-kamai.
Ka na kupa pi-ovei ra i-vagasi nanana.
Ka pon basavono pon awoiu, ka ngatene ponu ka i-tomoe. Tamate pon.
Ia dapa ka li-romo i-katau kape li-ejau ngapwae?
Ngaliko: kiñe tamate, lusa ini, temaka ene pe moloe, ene po koro, ene po nga-toloto, ene ka ene nga-toloto –
Be mata, pe noma, mata pon, be mata pon! Tilu.
Na ka li-tobo ponu pe ka mwaliko ka i-koene, mata ini i-ke me i-ro’ idi ne – po i-romo kape i-mako vele, ña i-tabau. Pon.
Ka po Tamate ka i-tomoe dapa ka li-ovei.
Ponu. Piene pein’ Tamate nga ponu. Mijaka nga ponu. Kuledi nga pon.
Kape ka li-ovei i-le ra ra ra nanana awoiu. Kupa pi-ovei pe li-ejau tamate.
Ka pi-ovei buro peini: buro peini pon, pe li-kamai.
Nga pon. Bwara ponu ka awoiu pon.
S1 stop écouter
Li-ko Tamate ponu: mwaliko iote da emel’ iape. Pe da-tilu pe Teanu. Kulumoe iada Aneve.

S2 stop écouter
Li-te li-te ra, ka la-ko kape la-le ne basakulumoe iote re, Tetevo. La-l’ la-romo dapa iada, dapa ne da: ai’ ada dapa, tili’ adapa dapa, gi’ adapa dapa, nga pon –

S3 stop écouter
La-ko kape la-le ponu, nga nanana: la-le, lai-odo ngaten’ ada.

S4 stop écouter
Lai-au jebute, la-kidi puluko ada, lai-ali buioe ada, la-kamai ponu.

S5 stop écouter
Vono i-sodo, lai-ejau / mwalik’ iape i-ven’ i-la vongoro ne belemele i-abu i-vo. Emel’ iape i-maili iawo i-tau jebute.

S6 stop écouter
I-tau jebute awoiu ponu, i-lu; mwalik’ iape i-vo vongoro awoiu pon i-wete.

S7 stop écouter
Awoiu pon, emel’ iape i-tau jebute moioe ponu, i-loko i-ka i-le ne monone ka i-wete. I-wete awoiu ka i-ejau mama ada.

S8 stop écouter
Awoiu ponu, ka emel’ iape ka i-wapono.

S9 stop écouter
Vono i-sodo, kape la-le Tetevo pon.

S10 stop écouter
Vono i-sodo pon, la-/ i-elele kuo iada i-abu, la-loko ngatene ada i-le: namolo iada, buioe ada me puluko, none ada, pon, mama po lai-ejau.

S11 stop écouter
Wako po ka la-viñi dapa iada pon, Aneve, la-ko “Keba ba-le Tetevo na!”

S12 stop écouter
La-la bavede i-vio pon, ka la-vesu bavede i-le.

S13 stop écouter
I-le, la-koie Tetevo. Kulumoe / La-l’ la-koie ne kulumoe pon, Tetevo.

S14 stop écouter
La-koie ka la-le teve dapa iada pon –

S15 stop écouter
La-te ra ra, bwara kata kape ebieve iune bwara metele tuo, nga pon.

S16 stop écouter
Pe ngiro mamote i-ka ne tevie ne / i-aka i-lui, li-ko ne ngiro Tangake *ma* i-vio tevie na.

S17 stop écouter
Lai-te Tetevo ra ra ra ra – ka i-le ne velesebe: ngiro ka i-kamai tevie ne Palapu.

S18 stop écouter
Ka la-vete la-viñi dapa iada pon Tetevo “Ia keba ka ba-tab’ ba-le na.” Dapa li-ko “O, wako.”

S19 stop écouter
Ponu ka li-le ne sekele li-au jebute, li-kidi puluko, li-ali buioe ada –

S20 stop écouter
Li-kamai ponu, li-wete mama ada. Wako li-wapono.

S21 stop écouter
Von’ i-sodo ponu pon, la-ko “O, keba na ka ba-tab’ ba-le kulumoe iaba na.” Li-ko “Wako.”

S22 stop écouter
Ponu. Li-loko ngaten’ ada i-le ne kuo wako ponu; la-la bavede iada i-vio, la-vesu ka la-ka.

S23 stop écouter
La-vesu bavede kape i-ka / la-ka la-ka la-ka –

S24 stop écouter
La-kovi vono basakulumoe na, ka la-kovi basakulumoe iot’ aplaka Teanu re la-ka la-ko “E! Kia na ka la-kovi basakulumoe iakia na ta!”

S25 stop écouter
La-le, mamote somu tae, bwara nga ne to ñe na ka Tekupie. Ka la-romo temotu iote apilaka.

S26 stop écouter
Ka pon. La-ko “E! Temotu iote apilaka pon!”

S27 stop écouter
Pon, ka kuo iada ka susuko se. I-le i-le i-le, kape la-koie / ka vitoko pe la-koie ponu la-lengi dapa.

S28 stop écouter
Pe kulumoe ponu, kulumoe iaidi mwaliko tae: ponu ngatene pon ñoko Tamate.

S29 stop écouter
Ia pon tadoe tae. Pon i-ovei pe i-vete piene samame idi mwaliko.

S30 stop écouter
Ponu kulumoe iadapa ñoko, temotu pon.

S31 stop écouter
La-ka la-koie *ka* vitoko pon, mwaliko iape ka i-madau i-ko “E, kape la-koie, dapa na kap’ li-abu kia!”

S32 stop écouter
Pon i-la visone iape i-ka i-ngago.

S33 stop écouter
I-ngago wako, i-la puro kula i-vio ne waluko. Tilu i-labu sam’ visone.

S34 stop écouter
Ka bavede iada, ka la-bu / lai-bu / la-bu.

S35 stop écouter
Ka i-la i-le i-abu i-wene, ne kuo.

S36 stop écouter
Ka i-viñ’ emel’ iape i-ko “U-wai i-ka! U-wai u-mabui! Kiane ’tapu!

S37 stop écouter
La-koie nga dapa li-ko li-abu kia, ene kap’ ne-korone n-abu iune we tilu, tete o / wako na. Awoiu dapa ka li-abu kia viri.”

S38 stop écouter
La-koie pon ini i-vio i-labu visone, wako kuo i-le i-sai.

S39 stop écouter
La-sai ponu, dapa li-abu li-ka.

S40 stop écouter
Li-ka ponu, li-ko [ive?] Li-wokobe da.

S41 stop écouter
Pon la-ka la-koie la-sai.

S42 stop écouter
Li-ko “Ia oo!” Dapa li-ko “Oo!”

S43 stop écouter
Teliki iadapa semame dapa li-abu li-ka, li-wokobe da po la-sai kuo.

S44 stop écouter
Wako, ka li-vete / teliki iadapa i-vete “Kupa na kupa mwaliko tae. Ka kaipa mwaliko na ia kupa na ngatene nga na, na ba-romo kupa na!

S45 stop écouter
Wako, kape pe-loko dapa gete enone nga pon, da meliko viñevi, le-loko temamene iamela le-le moe pon i-vio.”

S46 stop écouter
La-loko ngaten’ ada ka li-le ne moe wako ka li-elele kuo iada i-vene.

S47 stop écouter
La-le ponu ka lai-te pon. Ka pon dapa moro abia ponu, Tamate pon pe li-te ñi pe li-mako li-mako, nedemo, tomoro, nedemo, tomoro…

S48 stop écouter
Li-mako li-mako, ne, po li-pinoe.

S49 stop écouter
Ka basakulumoe ponu, temotu apilaka pon, vilo pe i-vio ene pon, vilo tamwaliko tae. Pon vilo pe li-e ñoko. Ne temotu pon.

S50 stop écouter
Nga vewo, bale, iliro, luro, teno, takalamu, doko…: wonone pe li-e, vilo iote tae. Ne basakulumoe pon, o temotu pon.

S51 stop écouter
La-te la-te pe ngiro mamote i-aka i-kamai Palapu: kape la-ka / la-tabo la-ka Teanu metae.

S52 stop écouter
La-te ra ka labiou bwara metele tuo ka awoiu.

S53 stop écouter
Awoiu pon, ngiro ka i-lubi. Ka i-lubi *amjaka* i-tabo i-lui *ko*…

S54 stop écouter
Pon, ngiro ka wako ka la-viñi teliki iadapa: “O, keba ba-tab’ ba-le Teanu na pe ngiro ka wako.”

S55 stop écouter
Ia teliki iadapa i-ko “Wako. Minga kape ba-le?” I-ko “Mobo.”

S56 stop écouter
Pon. Ngasune nga pon.

S57 stop écouter
Li-l’ li-odo ngatene ada.

S58 stop écouter
Li-bi ua vilo nga pon, nganae nga bale, vewo, iliro, iuko, teno – nga pon, li-kamai.

S59 stop écouter
Ka von’ i-sodo, ka pon teliki iadapa i-viñi da / mwalik’ iape / emele pon da mwalik’ iape i-ko “Ive? Ba-romo kupa wako we tamwaliko?”

S60 stop écouter
“E! Ba-romo wako! Ba-rom’ kaipa wako!”

S61 stop écouter
Ka teliki iadapa i-vet’ i-ko / teliki pine i-ko “Ive? Awa kela ne dapa gete kula ’none ba-ko ba-lui, we tae?”

S62 stop écouter
Ka mwaliko pon i-ko “Nga eo u-re dapa! U-ko ne-la dapa kula ne-lui pe ni-romo wako ka ni-romo makone iaipa wako po pi-pinoe.

S63 stop écouter
Me ne-lui me ne-wasi ñe dapa enone, Teanu.

S64 stop écouter
Pe kupa ponu makone enga-kula ia na iote ni-romo ka wako tamwalikose!”

S65 stop écouter
I-ko “Wako.”

S66 stop écouter
Ka mobo kata kape la-ka ponu: li-elele kuo iada i-abu li-loko ngatene ada i-le awoiu, namol’ iada –

S67 stop écouter
Wako, teliki iadapa i-ko “Kape ne-la / ne-viñi dapa teva. Kape le- / u-la u-lui. Ka tili ene, et’ adapa: Takulalevioe.”

S68 stop écouter
Mwaliko pon i-ko “Wako.”

S69 stop écouter
Dapa tieli’ adapa na li-vene ne kuo same da pon, bavede i-vio po ka li-ka!

S70 stop écouter
Li-ka li-lui bavede kape la-ka ne kulumoe iada pon, la-ka Teanu.

S71 stop écouter
La-ka la-ka la-ka la-ka – pe ngatene ponu, nga ebele ko, Tamate pon li-romo nga mwaliko. Ka nga tadoe i-ovei pe i-tomwoe.

S72 stop écouter
La-ka la-ka la-ka pon, ka li-tomoe mina kuo iada! Ka li-tabo li-le ne temotu iadapa pon.

S73 stop écouter
Io, ka kulumoe temotu iadapa ponu, enga ini Veluko. (Ka ni-mui pe ni-vete temotu ponu, enga ini Veluko.) Pon.

S74 stop écouter
Ka tabo la-le! Li-le awoiu.

S75 stop écouter
La-romo kuo iada moli.

S76 stop écouter
“E! Menuko iakia ka li-tomoe!”

S77 stop écouter
Mwalik’ iape i-ko, i-viñ’ emel’ iape, i-ko “E! La-tabo la-le! Ene awa ene ni-ko la-lui, pe teliki ka i-re se kia.”

S78 stop écouter
La-bu bavede iada i-wene ponu la-tabo; la-wai i-le.

S79 stop écouter
I-le i-vagasi Veluko ponu, teliki ka i-romo dapa : “E! Kaipa ka pi-tab’ pi-ka?” I-ko “Mm!”

S80 stop écouter
– Ia po ini i-ovei. – I-ko “E! Ba-lui ponu dapa na ka li-tabo li-ka!

S81 stop écouter
Dapa na ngatene nga tevie mwaliko, tevie nga li-romo nga tadoe.

S82 stop écouter
Li-ovei pe li-tomoe, li-ovei pe li-tabo li-ka, nga ponu.

S83 stop écouter
Ia eo, awa eo i-vian’ tamwase?” I-ko “Mm!”

S84 stop écouter
Ka teliki iadapa i-ko “Wako. Na kape ne-tab’ ne-viñi dapa le-vene ne kuo teve kela, ka pe telepakau adapa telepakau pe na, i-dai kulumoe na, Teanu ka iote basakulumoe iote pine na.”

S85 stop écouter
Nga, ive, da viñevi nga li-te ne manoko kape le-mokoiu nga pon, ne? Ngatene pon kape li-te / li-ka li-koie ne moe nga pon tae.

S86 stop écouter
Ka i-viñi i-ko “Namolo i’ emel’ iono po va nga i-te ne manoko, kape i-la i-kawi ñe dapa, me kape le-tabo le-tomoe metae.”

S87 stop écouter
Ka mwaliko po i-ko “Wako.”

S88 stop écouter
Po li-vene ne kuo po i-viñi emel’ iape: i-la namolo iape iote po ra nga metele i-ka i-te ne manoko i-la i-kawi ñe dapa.

S89 stop écouter
Pon bavede i-vio pon ka la-ka. La-ka la-ka ne basakulumoe iote aplaka re, la-koie Teanu la-koie ne Adie Vono. La-ka la-koie ne Aneve tae.

S90 stop écouter
La-koie ne tevie ponu, la-koie, vele, Anboi.

S91 stop écouter
La-koie ponu, la-lui Tamate ka et’ ada pon / et’ adapa pon, ae, Takulalevioe. Enga ini iote li-ko, ae, Takole. Takulalevioe, o Takole.

S92 stop écouter
La-wamu ne bonge iote pon. La-wamu i-wene pon, awoiu da ka la-tab’ la-ka.

S93 stop écouter
La-le, la-le la-koie ne kulumoe iada, Aneve. Ka li-te.

S94 stop écouter
Li-te ra, wa-ini, li-ajau none, ka li-le ne toplau, li-anu kava. Li-anu kava awoiu, ka li-vongo viri.

S95 stop écouter
Li-vongo awoiu ponu, ka mwaliko ponu i-ko “Uña teliki / teliki makumoso, ka uña teliki, ka dapa wopine peini kulumoe, ka dapa gete, ne-ko kape ne-viñi kiapa. Iote kape ne-viñi kaipa teliki na.”

S96 stop écouter
Dapa teliki li-ko “Wako. Nganae a-ko u-vete?”

S97 stop écouter
Ka pon ini i-ko “Ene awa ene ni-ko kape, ae, l-apilo sekele / me kape l-apilo sekele.

S98 stop écouter
Uña teliki ka idi abia na, kiapa abia na ne kulumoe na. Dapa po li-kila emele, dapa wopine.”

S99 stop écouter
Ponu. I-vete i-wene ponu, ka teliki i-ko “O, wako.”

S100 stop écouter
Moro nga ne, pon, kape le-le li-apilo sekele ie mwaliko iote wako, mwaliko iote, mwaliko iote, nga pon.

S101 stop écouter
Awoiu ra, awoiu pon li-tau.

S102 stop écouter
Li-tau sekele ponu awoiu, moro iote li-le li-teli avtebe.

S103 stop écouter
Ne sekele ie mwaliko iote, ie teliki iote, teliki iote, teliki iote, wako dapa wopine.

S104 stop écouter
Wako dapa abia pon ra awoiu. Sekele peini jebute ka li-teli awoiu.

S105 stop écouter
Ra ra i-le ne to ebieve, vongoro ka i-mote.

S106 stop écouter
I-mote po, li-le li-bi vongoro adapa.

S107 stop écouter
Li-bi vongoro we teliki iote, teliki iote, teliki iote, i-katau dapa awoiu, li-kamai, li-loko i-vene ne belemele li-sabisi li-maliawo boso.

S108 stop écouter
Pon ra kokoro. Vongoro ka kokoro ponu, ka jebute / avtebe adapa ka i-maili i-vene kata ka vitoko kape moso.

S109 stop écouter
Ka i-wene i-le i-le i-le, jebute ka moso. Nga ponu.

S110 stop écouter
Li-teli avtebe, ia li-vo udo.

S111 stop écouter
Udo, enga tilu: udo engaenga, abia na tae, na udo vaiene, ka udo vakaero. Udo peini kulumoe. Ponu.

S112 stop écouter
Awoiu ponu, li-vete li-ko kape le-mini ngapiene.

S113 stop écouter
Kape le-mini ngapiene ponu kape / vele, Aneve.

S114 stop écouter
Ra jebute ka moso pon, pon.

S115 stop écouter
Ka li-le, li-vokoiu longe. I-ka i-wene.

S116 stop écouter
Longe i-katau dapa abia pon awoiu li-kamai i-wene awoiu, li-le li-toe tepapa.

S117 stop écouter
Li-toe tepapa li-bo li-bo li-bo, awoiu. Li-kamai i-wene.

S118 stop écouter
Ia jebute ka moso. Udo kata kape ka moso.

S119 stop écouter
Moro iote, kata kape le-tetele pon, li-le li-toe blateno, vilo po li-ko blateno.

S120 stop écouter
Li-kamai li-toe moboro peini, li-kamai pon i-wene ponu.

S121 stop écouter
Vono i-sodo ponu, li-le / li-ae kie tepapa.

S122 stop écouter
Li-ae kie tepapa i-dadai awoiu ponu, li-iu.

S123 stop écouter
Li-iu tepapa i-dai awoiu, blateno ka li-toe li-kamai.

S124 stop écouter
Moro iote pon, li-vesu blateno i-vio.

S125 stop écouter
I-vio ka li-wabeiu ñe moboro teva: iote i-le nga ne, iote i-le nga ne, iote i-le nga ne, nga ne, me blateno i-vio, susuko, ne to.

S126 stop écouter
Tepapa i-dai ka ne mane po, li-vo aero i-dai.

S127 stop écouter
Li-vo aero i-dai, li-ngago bauluko i-dai, me kape le-mako ne to.

S128 stop écouter
Pon li-le, vono i-sodo li-le li-au jebute.

S129 stop écouter
Li-kamai ponu, i-wene ne kulumoe, kata kape le-tetele kape le-pinoe pon ta.

S130 stop écouter
Li-kamai ne aeve ka i-le ponu, ka li-vo vongoro.

S131 stop écouter
Da viñevi li-maliawo kape le-tau jebute.

S132 stop écouter
Awoiu pon i-katau moe.

S133 stop écouter
Awoiu pon, li-wete jebute li-wete vongoro awoiu pon, li-ejau mama.

S134 stop écouter
I-katau dapa pon. Moe iote tekumete tilu, tete, nga ponu.

S135 stop écouter
Awoiu, awoiu pon, i-le nga pon, aeve ka i-tavali ponu, dapa ka li-le li-vongo ne toplau.

S136 stop écouter
Teliki, samame dap’ wopine, dapa gete; da viñevi, ne mwoe.

S137 stop écouter
Ne mwoe ie amwaliko po i-vete piene ñe ngapiene pon / makone ponu. Pe utele i-viane ini. I-ko kape li-ejau / le-vesu makone, ngapiene.

S138 stop écouter
Ponu ka li-vongo awoiu ponu ponu, li-ko “Na ta! Kata kape le-pinoe na ta.”

S139 stop écouter
Pon li-le. Dapa kula li-vio li-dadai mane, i-katau uña tepapa ponu.

S140 stop écouter
Dapa kula li-le, nga mane i-wene na, dapa kula kape le-le le-tetele i-ka re. Nga ne ole nga ne moe ie Kaluiki re.

S141 stop écouter
Li-tamava ene i-ka. Li-tamava ene i-ka pon, buro pe li-oburo, kape le-ka pon le-ko:

S142 stop écouter
Eie kio nupu / Ila vasongo kia e nupu / Ila vasongo kio o nupu / Ila vasongo kia e nupu / Ivo utele ke / Ivo utele ke iou nupu / Ila vasongo kia e nupu

S143 stop écouter
Ponu. Li-tamava ene i-ka i-ka i-ka i-ka, i-vene i-ka i-le ne mane.

S144 stop écouter
I-vene i-le ne mane ponu, li-wate tepapa.

S145 stop écouter
Pe dapa ka li-vio i-dai tepapa nga pon, li-wate tepapa ponu, ka li-pinoe pon ta.

S146 stop écouter
Li-tetele ka nga li-ko ngapiene po ka li-pinoe.

S147 stop écouter
Ka ngapiene ponu, kape moro tilu me tete nga pon tae: kape metele iune!

S148 stop écouter
Noma li-katau ñe metele po li-romo metele i-ka ra ra ra i-tomoe, li-ko “Ka metele iune pon!”

S149 stop écouter
Ponu. Ae, ngapiene o makone po kape metele iune.

S150 stop écouter
Ka mwaliko pon i-viñi dapa teliki, po i-kamai tamate pon, i-ko kape i-le po kape i-viane ebele ngapiene, i-ko / nga nanana, mobo ngapiene awoiu.

S151 stop écouter
“Kape ene awa ene momobo, pe revo i-ma nedemo, ra momobo, revo i-ma;

S152 stop écouter
kape idi abia ponu na Aneve na, li-abu li-le li-vio n’ ole: dapa wopine, da viñevi, uña teliki, da meliko, me kape le-romo kape keba ba-kila menuko iaba le-ke le-da noma re le-ka re, Nom’ Nomianu re.

S153 stop écouter
Kape ba-woi okoro, bai-oburo, dapa ñepe na kape le-mako i-ka.”

S154 stop écouter
Ka dapa li-ko “Nganae?” I-ko “Tae! Kape ba-vete mou, ka pe-romo, dapa ñepe kape le-mako i-ka, we le-pinoe i-ka.”

S155 stop écouter
Ponu. Dapa abia ponu li-ab’ li-le n’ ole.

S156 stop écouter
Revo i-ma, da po la-woi okoro, kape la-mede i-ka pon, ponu ka lai-oburo.

S157 stop écouter
Buro pe li-mede i-ka pon li-ko:

S158 stop écouter
Mule muleia / Mulablamateie

S159 stop écouter
Mule muleia / Mulablamateie

S160 stop écouter
Labiou tae, li-romo dapa ka li-mako i-ke, li-da noma iote pon, Nom’ Nomianu.

S161 stop écouter
Li-ke pon ka li-romo ka dapa ka li-madau li-ko “Ponu nganae pine ponu? Pon tadoe? Pon tepakola? Kape i-e idi? O kape i-abu idi?!”

S162 stop écouter
Ia li-romo wako. Li-romo dapa wako. Ui! Li-romo wako, ia idi li-madau.

S163 stop écouter
Ponu. Ka li-ko kape le-tabo le-le le-koie ne moe iadapa nga pon, dameliko, da viñevi wopine, nga pon.

S164 stop écouter
Ka da la-ko “Tae! Pe-madau etapu, ponu menuko iaba.

S165 stop écouter
Pon tadoe tae. I-abu idi tae. Tepakola tae.

S166 stop écouter
Pe-rom’ kape le-mako i-ka teve kiapa kape le-ven’ le-le le-mako, ne mane.”

S167 stop écouter
I-ka i-ka i-ka ponu, dapa kula mo ka li-wo.

S168 stop écouter
Li-le li-wamu dapa ne pwa moe, mata dapa / li-koie ne moe mata dapa i-ke, nga pon.

S169 stop écouter
I-ka i-ka i-ven’ i-le, la-woi okoro ne mane. Li-le li-mako.

S170 stop écouter
“E, io! Makone iote nga pon ne! Na la-viñi kiapa na –”

S171 stop écouter
Awoiu pon ka mwaliko ponu ka i-atevo na “Ba-ko le-mini ngapiene pon, me kape pe-romo menuko iaba pe ba-kamai, ka kape dapa ñepe na le-ka le-mako ka li-romo makone ponu wako.”

S172 stop écouter
Ka ponu makone ponu, peini tamate ponu, makone peini kulumoe tae. Ponu pe da la-la la-kamai.

S173 stop écouter
Ka na kupa pi-ovei ra i-vagasi nanana.

S174 stop écouter
Ka pon basavono pon awoiu, ka ngatene ponu ka i-tomoe. Tamate pon.

S175 stop écouter
Ia dapa ka li-romo i-katau kape li-ejau ngapwae?

S176 stop écouter
Ngaliko: kiñe tamate, lusa ini, temaka ene pe moloe, ene po koro, ene po nga-toloto, ene ka ene nga-toloto –

S177 stop écouter
Be mata, pe noma, mata pon, be mata pon! Tilu.

S178 stop écouter
Na ka li-tobo ponu pe ka mwaliko ka i-koene, mata ini i-ke me i-ro’ idi ne – po i-romo kape i-mako vele, ña i-tabau. Pon.

S179 stop écouter
Ka po Tamate ka i-tomoe dapa ka li-ovei.

S180 stop écouter
Ponu. Piene pein’ Tamate nga ponu. Mijaka nga ponu. Kuledi nga pon.

S181 stop écouter
Kape ka li-ovei i-le ra ra ra nanana awoiu. Kupa pi-ovei pe li-ejau tamate.

S182 stop écouter
Ka pi-ovei buro peini: buro peini pon, pe li-kamai.

S183 stop écouter
Nga pon. Bwara ponu ka awoiu pon.