kolu sʊːli thamyi nom ɩxtse - ithara xʊː̃ta le gotyi.
mi thamyi ko ithara xʊː̃ta le gotyi to ɩt dakmi.
- mima ko.
ithara xʊː̃ta le gotyi nom ɩxtse.
mii sʊːli thamnoŋ thamnoŋ pʊkhʊli bhandā mi xʊː̃ta dŭmi ɩxtse.
pʊkhʊli bhandā xʊː̃ta dumnoŋ mi pʊkhʊli-ha mɩtsɩ paːkom ɩtkhen - mi pʊkhʊli-ha, " lau ! gon aba - …
…
aː̃kithikmʊ na siŋtoŋ-ha ithara beŋta noktshuŋ poːyi -
notmʊ bhaeko thikmʊ siŋtoŋ na tara ithara beŋta noktshuŋ poːyi a -
noktshuŋ poːyimʊ -
muʔluŋ mɩtsɩ ɩtmʊ?
- muʔluŋ na ɩt dak.
aː̃kithikmʊ siŋtoŋ na tara noktshuŋ pʊpʊt-ha noktshuŋ na waxcaŋ poːyi, aː̃kithikmʊ siŋtoŋ dzoːyi -
tehi mʊ muʔluŋ-hemʊ siŋwomʊ ithara xʊː̃ta -
siŋwo muʔluŋ mɩtsɩ ɩtmʊ aba ?
- siŋwo muʔluŋ ɩtkhen hok.
siŋwo muʔluŋmʊ - siŋwo muʔluŋmʊ - mi noktshuŋ pʊʔluŋ ṭhāum̐ - noktshuŋ - noktshuŋ -
noktshuŋ na pʊtyi noktshuŋ na watyimʊ siŋwo muʔluŋnoŋ, noktshuŋ-he siktaŋ - noktshuŋ-he siktaŋnoŋ, yeksa okyi - mi thʊŋto gon-ha!
mikhen dzɩ, mikhen uŋ jīu goːmi," ɩxtom ɩxtse.
"uŋ jīu goːmi."
aba mi ko pʊkhʊli-ha ko mi ko mi ma thʊŋto nom ko mi pʊkhʊli-ha ko mi ko yʊkto - mi pʊkhʊli-ha yʊkyi bho .
mi laxtse. lalat-ha laʔnoŋ laʔnoŋ laʔnoŋ laʔnoŋ mii - mi sʊːli thamtham-ha mii pʊkhʊli bhandā mii gotyi -
laʔnoŋ laʔnoŋ laʔnoŋ kolu muʔluŋ ṭhāum̐ noŋ doŋ laxtsem ɩxtse. minoŋ muxtsem ɩxtse.
mumut-ha minoŋ na - minoŋ na xwaptso - minoŋ na xwaptso mi-ha - minoŋ na xwaptso pheri thʊŋtom ɩxtse.
minoŋ na xwaptso thʊŋtom, minoŋ na aba …
…
minoŋ na xwaptso thʊŋta, minoŋ na muxtse.
nikai din minoŋ muxtse. muxtse.
mumut-ha " lau ! gu ko, pixpi kixki, gu ko xʊː̃ta pʊkhʊli-ha ima ɩɩt-ha noːŋo - yehi imamʊ thʊŋmʊ ɩɩt-ha noːŋomi gu ko.
laːŋo," paha mii laxtse.
lalat-ha laxtse ta ani pheri doŋ laxtsem, kolu - kolu din - kolu … ek din mʊ lom lalat-ha pheri minoŋ le xwaptso na mi-ha thʊŋto.
a xwaptso na thʊŋto minoŋ le.
minoŋ le muxtse.
minoŋ le mumut-ha - xwaptso thʊŋthʊ-ha minoŋ muxtse, amʊ ko lomnoŋ lomnoŋ na nakpu xwaptso dum -
kem-he kolu xwaptso no, lomnoŋ nakpu xwaptso dum,
jamma ko tshukpu dŭme.
minkhen laʔnoŋ laʔnoŋ laʔnoŋ -
mi thekluŋ mɩtsɩ ɩtmʊ aba ?
- thekluŋ.
thekluŋ nai ɩtmʊ?
aː! xʊː̃ta nom ɩxtse thekluŋ - xʊː̃ta.
imamʊ yeksa ko cha yeksaboŋ boː̃caŋ poːyi-ha bobon-ha thek dakta nom ɩxtse.
mimamʊnoŋmʊ ba piŋta xʊː̃ta pʊkhʊli-ha mii sʊːli thamyi.
minkhen ko kolu boː̃caŋ poːyi - arū boː̃caŋ poːyi cāhim̐ dzaː̃tsimem ɩxtse ekdam lhumutulhut mii mexta, kolu boː̃caŋ poːyi cāhim̐ wolta nom ɩxtse.
mi wolta cāhim̐ u wathe muxtsem ɩxtse.
u wathe mumut-ha sʊksa-ha hʊt ma phaphat-ha muxtsem ɩxtse.
mi alik … onyi onyi dzaː̃tsim, maaŋ onyi wolta wotoŋ mumu-ha taːkome dza ma biːtome.
mikhen ko mii sʊːli thamyi minoŋ doŋ laxtse.
"e gon wolta miskan mine muxtse?
mi-ha dzaː-he gon le ta dzaː̃tse de no !"
"dza ma biːŋome guu.
ima wol lăsuŋ.
dza maaŋ bitkhen gu haŋa dzaː̃tsuŋ ro?"
"gon-ha aŋ ɩxta ṭhāum̐ -he thʊ̆ŋo to, ga gon umbe dza - mine dza gon piŋnomi.
xwan-xwan dzaː̃tse gon!
ga mi jamma topto-ha tonmem," ɩxtom ɩxtse mii sʊːli thamyi-ha.
" lau ! ga thʊŋnomi gon - mine.
mine na thʊŋnomi, gu dza biːsuŋ ta !"
mii sabai janā toptop-ha toxto mii.
toptop-ha totot-ha nʊntaːlik mumut-ha mi wolta xwan-xwan dza piː̃ko.
"xwaː̃tse gon?"
"xwaː̃tsuŋmi."
" lau ! gu thʊŋsuŋ aba !"
"aŋ leːle-he tshʊːsuŋ - gon-ha tara aŋ leːle tha tet hai !" ɩxtom ɩxtse mi wolta-ha.
huncha .
mi-ha leːle - komi xwaː̃tse - leːlenoŋ tshʊtshʊt-ha lexku-lexku-ha bobon-ha - lexku-lexku-ha bobon-ha wotoŋ -
i haŋa ɩtmʊ aba ?
- "lhererelhet-ha laʔnoŋ laʔnoŋ" ɩxto de.
lhererelhet lhererelhet-ha laʔnoŋ laʔnoŋ laʔnoŋ laʔnoŋ laʔnoŋ laʔnoŋ …
lhererelhet-ha laʔnoŋ laʔnoŋ laʔnoŋ laʔnoŋ wotoŋ thʊŋto.
wotoŋ thʊŋto. taːko minoŋ.
taːko - "nukun le gu itha belā na phiːŋomi.
gon ine na muxtse hai !
ga gon pheri xwan-xwan dza piŋnom."
" huncha ."
laxtse.
mimʊ ko a taːmi maaŋ phaphat-ha mĕdaŋ mĕdaŋ-ha nom ɩxtse. …
dawaŋbaŋa khokyi cʊcʊt-ha nom ɩxtse a taːmi - a taːmi ko.
- bheḍā nai ɩxto de!
bheḍā cʊcʊt-ha mumut-ha nom ɩxtse taːmi.
minkhen ko - minkhen ko minoŋ doŋ laxtsem mii. doŋ laxtse.
a taːmi lhek yʊktom ɩxtse mi-ha - mi sʊːli thamyi-ha.
mikhen tehi -ha taːmi-ha cupta cuwakhata na cuxpom ɩxtse.
cupcup-ha a taːmi ɩmluŋnoŋ na mi ɩmtsem ɩxtse.
ɩmɩm-ha yeksa doŋmi ɩxtse a umukhata.
yeksa doŋdoŋ-ha a taːmi khamtom ɩxtse.
a taːmi paːsina - a taːmi hʊ̆sina hʊnmi ɩxtse mi sʊːli thamyi.
khokhot-ha "phi nānī dzaː̃tse" ɩxtom ɩxtse.
a taːmi hʊ̆sina "ma dzaː̃tsuŋmi āmai gu nukun dzɩ dzaː̃tsuŋmi" ɩxtom ɩxtse mi-ha.
ɩʔnoŋ "mine taːsuŋ. nukun dzɩ dzaː̃tsuŋmi āmai ," ɩxtom ɩxtse mi sʊːli thamyi-ha.
minkhen ko a umu-ha taːto minoŋ a taːluŋ-he - "taːsuŋ" ɩxta ṭhāum̐ noŋ na taːto a umu-ha.
nukunbaŋ aba daŋdaŋ dumsiŋ le dum.
mi - a umu khok laxtse pheri .
khok laxtse.
"siŋwo muʔluŋ" -
- pʊː̃gu.
"pʊː̃gu - siŋwo muʔluŋ pʊː̃gu woni coŋta - coŋtamʊ -"
imamʊ coŋta mɩtsɩ ɩtmʊ?
- coŋta nai ɩtmʊ.
coŋta nai ?
- coŋta nai .
"imamʊ coŋta-he noːmi.
yeksa okyi mi khɩː̃tsɩ-ha rumru-ha noːmi.
siŋwo muʔluŋ mi - kemanikhen noːmi.
mi latmemi!
cʊxto hai nānī !"
minkhen "mii noktshuŋ-he siktaŋ mi - hoːcaŋ-he noːmi.
mi thotho-ha latmem ani !" paha umu arā -ha khok laxtsem ɩxtse.
mi-ha ko - mi sʊːli thamyi-ha ko jamma sɩːko ine ine nom paha.
a umu khok laxtse.
khok laxtse a umu.
a umu khokkhen daŋdaŋ le dum.
mi siŋwo muʔluŋ pʊː̃gu le thoxto - imamʊ lʊxta ṭhāum̐ noŋno le thoxto.
mi yeksa okyi khɩː̃tsɩ-ha rumta le thoxto.
mi ima aː̃ki noktshuŋ-he siktaŋ mii imamʊ hʊŋcaŋ ṭhāum̐ noŋno thoxto.
mi thothot-ha khoktse. phi.
phiʔnoŋ phiʔnoŋ phiʔnoŋ minoŋ na doŋ.
…
mikhen mi sʊːli thamyi - sʊːli thamyi phiphi-ha minoŋ na mi wolta nom ɩxtse - a taːluŋ ṭhāum̐ noŋ na.
hanoŋdum hoː̃ku ʊxtom, minoŋ na mi wolta toton-ha mumut-ha nom ɩxtse - mi boː̃caŋ poːyi.
- grampali.
grampali.
muʔnoŋ mii a ɩxta - pʊkhʊli-ha ɩxta khʊli - phi mii.
" lau ! aba tshʊːko!" mikhen. " lau ! tshʊːsuŋ gon-ha! tha tetŋo ani aba !" pheri .
mikhen pheri buxtse mii a pixtaboŋ.
mikhen pheri tehi mi boː̃caŋ poːyinoŋ na a leːlenoŋ tshʊtshʊt-ha itha hoː̃ba na lhererelhet-ha lhererelhet lhererelhet-ha itha hoː̃banoŋ na lhak thekto mi boː̃caŋ poːyi-ha - mi wolta-ha.
thekthek-ha mikhen pheri mi - mi alik onyi onyi cāhim̐ toptop-ha totot-ha tehi wolta na pheri xwan-xwan dza piː̃ko.
dza piŋpiŋ-ha - dza piŋpiŋ-ha xwan-xwan dza piː̃ko.
"xwaː̃tse?"
"xwaː̃tsuŋmi.
gu ima wolta siŋtoŋ - wolta boː̃caŋ poːyi dza ma biːsuŋmi.
gon-ha gu ima tɩː̃tsoŋ le tɩrɩ le ima xwan-xwan dza - xwan-xwan dza piŋsuŋ.
uŋmʊ cāhim̐ dherai jīu goːyu gon," pa mi boː̃caŋ poːyi-ha ɩxtom ɩxtse.
" lau ! gona le imamʊkhen gona theksuŋ gon le dherai jīu goːyu," pa nakpuya goːtshikyu pa haː-ha poːtshe -
āsik haː-ha poːtshe, minkhen mi khoktse, mi wolta le -
mi khokkhen mi wolta miskan dza biːtome ro?
toxtome arū -ha tuptup-ha. toxtome.
komi phi. phiʔnoŋ phiʔnoŋ phiʔnoŋ a noŋna bihā poːta xwaptso kemnoŋ doŋ.
doŋ.
a noŋna bihā poːta xwaptso kemnoŋ doŋdoŋ-ha muxtse.
minoŋ muxtse. mikhen a tsaːpimi tsaːkhi-ha - eː! - sahanai topyikhata - imamʊ topcaŋ poːyi topyikhata - ekdam bui -
- thupro ta ɩt dakmi.
… noxtaboŋ butyi khʊli piː̃ko a tsaːpimi tsaːkhi-ha mii.
kolu a bekcaŋ le haːto noŋna mi a tsaːpimi tsaːkhi kemnoŋ doŋ - doŋnoŋ.
pheri mima phi a noŋnamʊ tsaːpimi tsaːkhi kem mima phiphit-ha pheri a hoː̃kumʊ tsaːpimi tsaːkhimʊ kemnoŋ doŋ.
a hoː̃ku bihā poːta ṭhāum̐ noŋ doŋ.
doŋdoŋ-ha "eː! noŋna bihā poːta ima paːko, ga le tei ima ha dakmi,"
paha pheri minoŋ le mitha na butyi alɩːsi nauŋ bekluŋ paːpa-ha ekdam sita pixtomi.
mi bubut-ha topnitop komi ko bekluŋanikhen ekdam bekbek-ha phi.
butyikhata hoː̃kuna noŋnana pʊkhʊli bhandā le xʊː̃tathik a kemnoŋ doŋ.
nukunbaŋ mi pʊkhʊli-ha a noŋnakhen hoː̃kukhen mutyi piː̃komi.
"mi-ha thʊŋtomi ki makhɩ cʊt laːne!" paha piŋnoŋ, thʊŋto rahecha mi-ha ko.
mi pʊkhʊli na laxtse.
mi pʊkhʊli na lalat-ha "thʊŋto?"
"thʊŋtuŋmi, pʊkhʊli," ɩxtom ɩxtse.
"eː! mima no nom aba gona - lau ! - yei ma thʊŋto nom gon pheri ma goːmi," ɩxtom ɩxtse mikhen. ma goːmi.
ma goːmi.
mikhen pheri " aba yeksa tamyimʊ pelta thʊŋ piŋpiŋ-ha noŋom.
mi haŋa thʊŋtuŋ holā ?" pa a man noŋ yiː̃tse.
laxtse pheri .
lalat-ha laʔnoŋ laʔnoŋ lala-ha ko imamʊ a yeksa tamyi muʔluŋ ko phoku poː̃tse.
mi phokunoŋ doŋ laxtsem ɩxtse.
a tsoʔla nom ɩxtse mi yeksa tamcaŋ poːyimʊ tsoʔla.
"gon mɩtsɩ pa?" ɩʔnoŋ, "uŋ umumʊ pelta ba phixta," ɩxtom ɩxtse.
"gon aŋ umu-ha dzoːmi.
u wathe - wone bekbek-ha muxtse," ɩxtom ɩxtse tsoʔla-ha.
khalip-ha lala-ha - mi-ha cayimʊ piʔluŋ laxta no.
mi cayimʊ - cayimʊ-he pelpel-ha pit dakta.
"mi cāhim̐ taːko, gon cāhim̐ laʔla wathe!"
wothe muʔ laxtsem ɩxtse mi taːta-ha wotoŋ muʔ laxtsem.
a umu doŋ.
a umu doŋkhen mi peltaŋ tuː̃tsime, mine le peltome, pelpel-ha taːkome mii. taːko mii.
a umu pheri khok laxtse.
khoxkhen mi laxtse pheri mii.
laxtse, mikhen mi-ha tsoʔla-ha mi haːtomi.
haːkhen pheri khalip-ha phi a kemnoŋ na.
mi-ha thʊŋto.
mi pʊkhʊli-ha thʊŋ piŋta thʊŋto.
thʊŋthʊŋ-ha nukunbaŋ pheri mi pʊkhʊli-ha "mi-ha thʊŋto ki makhɩ? lau cʊt laːne!" pa piː̃kome a noŋnakhen hoː̃kukhen mutyikhata.
"thʊŋtom rahecha ," paha mi-ha noŋnakhen hoː̃kukhen mutyi-ha mi pʊkhʊlinoŋ ɩxtome. pʊkhʊli phi.
"thʊŋto?"
"thʊŋtuŋmi, pʊkhʊli."
"mi-ha no nom gon aba gaa -
lau aba xʊː̃ta bleŋta - bleŋtabe gona imamʊ aŋ muʔluŋthikmʊ yɩxpo!
aŋ muʔluŋthikmʊ yɩxpo!
mi yɩpyɩp-ha le phukamʊ ḍorī gona sipsip-ha - tin payā mʊ gona sipsip-ha gikto mine!"
aŋmʊ ko khās daːbʊ na ta laʔla holā . …
tshuuŋ gotmʊ mine ḍorī yin dakta phukamʊ sipsip-ha.
yin dakta - "mithama tɩrɩ yeksa kheri -he gona ma yɩp nom gon yʊknom," paha pʊkhʊli-ha ɩxto.
" nārāyaṇ ! aba haŋa ga mi-ha paŋ holā ?" paha mi a man noŋ dherai ram.
ram. mikhen a noŋna bihā poːta xwaptso-ha, " lau ! buti dza phi!" ɩt. ma phi.
mima na man noŋ ram. ramnoŋ, "tha le ram, gon phi lau !" ɩxtom ɩxtse.
mikhen lala-ha buti dzaːko.
"nukun aba kokori ma oksa gon yei sita laʔla!" pa itha xʊː̃ta paĩtulum haːtom ɩxtse.
paĩtulum haːtom ɩxtse a noŋna bihā poːta xwaptso-ha.
mi ti doʔluŋ-he lala-ha uptse.
upup-ha "mi hanoŋdum mi pʊkhʊli-ha ɩɩt-ha nom tei be thapakka taːta-ha khalip-ha tha cʊt gona!
komi-ha haŋadum ɩɩt-ha nom mima na ɩɩt-ha khalip phi!" pa ɩxtom ɩxtse noŋnamʊ-ha - a noŋna bihā poːta xwaptso-ha.
mikhen laxtse minekhen.
kokori oksiŋnoŋ upup-ha oḍāi -ha sararara lalat-ha tei -ha ɩxta ṭhāum̐ noŋ thapakka taːta-ha " lau ! itha bekluŋ poː̃tseyu!" pa thapakka taːta-ha khalip phi.
nukunbaŋ daŋdaŋnoŋ cʊʔnoŋ pʊkhʊli hathadum "bekluŋ muʔluŋ paːko!" ɩɩt-ha nom mitha na ekdam cāhim̐ dzoŋta dawaŋbahaŋ tshuuŋ ena tin payā mʊ le sipsip-ha phukamʊ ḍorī sipsip-ha mine na yiyin-ha no.
kem le mitha na dzoŋta paːpa-ha no.
nukunbaŋ pheri mi pʊkhʊli le - pʊkhʊli-ha piː̃ko. a noŋnakhen hoː̃kukhen mutyi pʊkhʊli-ha piː̃ko.
"po ki makhɩ?" pa, "paːpa-ha no."
pʊkhʊli-ha phiphi-ha - phiphit-ha cʊxto -
aː! a ɩxta ṭhāum̐ -he ko ekdam imamʊ na duptaŋ daŋdaŋ-ha ɩxta ko phukamʊ ḍorī le tshuuŋ yiyin-ha taːta-ha -
" lau gon dzolmi," ɩxtom ɩxtse.
…
mi le cʊxto pʊkhʊli-ha le, " aba gon-ha yei be lalat-ha yei ṭhāum̐ be lalat-ha gona cayimʊ jaṅgal -
… kem thililina miskan no ro notmʊ ko - dokha ena
ek kos dokha ek kos itha ek kos yʊː̃kha ek kos loː̃khamʊ tɩrɩ yeksa kheri -he na gona - cayimʊ -
mi ko khas daːbʊ le laʔla ki haŋa?
- phum.
"cayimʊ phum paːko gona!"
mitha ma po nom gon ga yʊknom!" ɩxtom ɩxtse.
mi le - mima ɩxto pʊkhʊli-ha.
pʊkhʊli-ha mima ɩʔnoŋ amʊ le a xwaptsomʊ le - tɩrɩ kolumʊ khotmʊ nukun kolu-ha khotyi no rahecha ni .
mikhen a noŋna bihā poːta "dza yu" ɩt, ma - ma laʔla mi.
"miskan gona mima ram gon? buti dzaː̃tse! ga paŋmi," ɩxtom ɩxtse a noŋna bihā poːta xwaptso-ha.
ɩʔnoŋ mikhen lala-ha pheri dzaːko buti.
dzaː̃tse paː̃tse mikhen piptse piptaŋ.
"nukun gona mi yeksa okyi oksiŋ-he lalat-ha ii komi-ha hani-hedum ɩɩt-ha noːm tei -he lalat-ha yei gona i piːcaŋ - i cayimʊ thocik taːko.
itha itha na komi-ha ek ek kos ek kos ɩɩt-ha no. itha ek kos dokha ek kos ɩɩt-ha no.
mitha-he 'cayimʊ ghārī poː̃tseyu!' pa mi thapakka lʊlʊt-ha khalip ma cʊcʊt-ha sarasara kem-he phi!," ɩxtom ɩxtse.
mima na "diksana no, hai !" atshi ! dɩdɩn-ha paːpa-ha lalat-ha tei noŋ mi cayi thapakka coŋkom ɩxtse.
thapakka coŋcoŋ-ha khalip kemreksa phim ɩxtse.
nukunbaŋ daŋdaŋnoŋ cʊʔnoŋ mi pʊkhʊli phiphi-ha cʊʔnoŋ cayimʊ jaṅgal ɩxta - aː! - jaṅgal cayimʊ.
a ɩxtaboŋ-he cāhim̐ cayimʊ jaṅgal .
minoŋ le mi-ha mii sʊːli thamyi-ha mi-ha le oː̃to minoŋ le.
mikhen pheri , " lau ! aba gon-ha ine itha i nomo ko thɩpluŋboŋmʊ hani ma noxta tsixtsi gona mi cayi jaṅgal -he gona mi lo ma yeŋyeŋ-ha gona lheː̃bop thʊŋthʊŋ-ha taːko!
natra gon nukun ga yʊknom," ɩxtom ɩxtse.
mikhen pheri lau ! - a hoː̃kumʊ - a hoː̃kumʊ xwaptso-ha - mi din pheri a hoː̃kumʊ xwaptsomʊ khoʔluŋ khoxcaŋ mʊmcaŋ no rahecha mi din .
"dza phi!" ɩt. ma phi i.
"miskan ma phi? phi!
tha le ram!" pa xwaptso-ha ɩxtom ɩxtse.
mikhen phiphi-ha dzaː̃tsem ɩxtse.
dza dza oḍāi -ha pheri thapakka lala-ha muxtse a muʔluŋ ṭhāum̐ noŋ.
piptaŋ thapakka mi xwaptso-ha haːtom ɩxtse. piptsem ɩxtse.
"nukun gona - nukun gona yehi som sita laʔla lau ! gon.
hanoŋdum gon-ha hoː̃ku coŋta noːmi tehi coŋtamʊ a itha dokha laxta-he taːko thapakka !
mi coŋtamʊ - mi hoː̃ku coŋtamʊ phum-he thapakka gona taːko!
'i lo bhandā le sophop hani ma noxta tsixtsi ine gon lheː̃bop dumyu!' paha tei uŋ hoː̃ku coŋta-he thapakka taːta-ha khalip phi!" ɩxtsem ɩxtse a roːmi-ha.
mikhen lala-ha - dɩdɩn-ha paːpa-ha lala-ha.
"i cayimʊ bhandā lo sophop - cayimʊ lo bhandā tsixtsi sophop poː̃tseyu!
hani maaŋ - hani le maaŋ noxta tsixtsi ine sophop poː̃tseyu, i phum-ha ma kɩkɩn-ha," paha thapakka minoŋ taːta-ha khalip phim ɩxtse.
nukunbaŋ mi-ha - pʊkhʊli-ha dziːnoŋ, "paːkuŋmi," ɩxtom ɩxtse lau !
cʊʔnoŋ ko aː! mi cāhim̐ a ɩxtaboŋ ek ek kos mʊ bām̐s - ace ! - cayi jaṅgal noŋ ko tsixtsi ɩxta - mi cayimʊ lo bhandā sophopmʊ.
mi cayimʊ … - cayimʊ phum na jammai ima yʊː̃kha phumnoŋ konoŋ japhara-ha tsixtsi dzɩ lheː̃bop nom ɩxtse, ithara xʊː̃ta muktshu poːyi, hani ma noxta i, hani le maaŋ noxta tsixtsi jamma minoŋ lheː̃bop nom ɩxtse.
minkhen minoŋ le oː̃to mi sʊːli thamyi-ha.
minoŋ le oː̃to - " aba gon-ha mɩtsɩ ɩtkhen - "
" lau ! … aba cāhim̐ ga ma oː̃tuŋmi pʊkhʊli.
aŋmʊ … daʔ laxtse aŋ noxtaboŋ.
aŋmʊ aba mɩtsɩ le ma no, daʔ laxtsemi.
aba cāhim̐ aŋ noxtaboŋ gaa tshɩʔnomi.
uŋmʊ uŋ noŋnakhen hoː̃kukhen mutyi uŋmʊ jamma pixto aŋ kem-he - aŋ kem-he na pixto!
mikhen gon ga tshɩʔnomi," ɩxtom ɩxtse mi sʊːli thamyi-ha.
" lau , huncha ta . nukun ga pinmi," paha mi pʊkhʊli-ha ɩxtom ɩxtse mikhen -
nukunbaŋ jamma pixtome mi pʊkhʊli-ha a noŋnakhen hoː̃kukhen mutyikhata, itha dokha poːyikhata jamma wari - thililithit mut piː̃komem ɩxtse -
"gone aː̃kithik imamʊ cal-cali mutyi cāhim̐ , gone cāhim̐ dokha dokha laːne, ine tha muxtsine!
i pʊkhʊlimʊ dzɩ bhalā muxtsime ine," paha mi sʊːli thamyi-ha ɩxtomem ɩxtse.
aː̃kithikmʊ cāhim̐ ruʔ laxtsimem ɩxtse.
ruʔ laxtsime.
tei pʊkhʊlimʊ a noŋnakhen hoː̃kukhen mutyi jati cāhim̐ thililithil muxtsime.
mikhen itha na xʊː̃ta thoxtom ɩxtse mi-ha - mi sʊːli thamyi-ha.
thothot-ha "aŋmʊ ko yehi nom hai ! pʊkhʊli," phakakalak hʊŋnoŋ ekdam hʊː̃pʊː̃kimi loklok-ha nomo na tiŋtiŋ-ha loklok-ha mi-ha mi pʊkhʊli a noŋnakhen hoː̃kukhen mutyi jammai minoŋ na sɩsɩt-ha mikhen tehi pʊkhʊlimʊ - komi pʊkhʊli dŭmi.
aŋ kathā itha dzɩ nom e! sāheb .