Le rocher des Torres doi


Lecture en continu :

Transcription par phrase
Autre
Transcription du texte complet



Tär ’og’og wël lē sele Wōlrēv, vunu: van N̄ere Pinimen e, ’ān vāli kēl me nē, pa ’et kal sag.
Tär ’og’og kēnē, ērge ’og’og, qön̄ vōwal tär wo “Ei! Kiri wö’, gät ’og’og kö-wö’, pa gät ē pigpig ’ä n-mōmō, pa kiri wö’ gät qēl sōw lë e, gät pili’. Gät ’ār’ār gāt mōmō.”
Wo “Ge itōk.” Tär van.
Kē m-revrev, lo m-van row e ’ān vögö lām, alē tär qēl.
Qēl sōw e, tär ’ār n-vë’ë.
Tär ’ār n-vë’ë ’ā~ ’ār, ’ār qē’ n-vë’ë tär van me, pōl. Pō–pōl, pōl qē’, tär ’al.
Tär ’al ’a–’al, ’al qē’, wa kē e n-mälägläg.
Kē m-mälägläg nē e tär sin̄. Sin̄ e tär van ’ān me’ va’a gēn.
Tär pili’ row. Van van van, tär van pili’ pili’, pili’ row pili’ row vavavan – Sōw, ērge na ti nē m-van qēl kēl sar mäkä wö’, tär van sōw.
Pa n-’ān̄sār vōwal e m-van row e pa n-ve’ e māl van sar e pu’ ’i e.
E sōw e, ti m-van row, van kal row rān ve’ e, ti m-tët e wā n-me’.
Van row nē, van ’ān vāli gēn.
Van me van me, van, van van, tän̄ row e, ti n-van kēl ’ān vālgi.
Vanvan kēl me ’ān vālgi nē, pa n-ve’ e māl qē’ēg van rāk.
Māl vanvan ti n-vanvan row ēgēn.
Kēl sar e, lē / n̄ere me’ e mal rës.
Tär van / Ti ne van row, van row, va–van e… ti ne va–van kēl me wö’: “O, kö-wö’ n-lām! Kö-wö’ n-lām la’i.”
Ti n-van kēl ’ān vālgi. Van vavavan nē, n-tän̄ row e: “Oo! Ekē na wö’ n-lām!”
Ewa ti n-van kēl. Vavavan ’ān vālgi: “Oo! Ekē na wö’ n-lām.” Ewa ti n-van kēl.
Ti n-van van kēl ekē nē wa ti ne-’et e, ērge e nev mōr e wa lē aqiiit e!
Wā n-ve’ e va’a row e. Va’a row e.
Ti n-van row, van row… Va–van a, ti m-’et e wa “Uu!” Ē ge e m-’en̄. ’Ān̄sār e m-’en̄.
Ti n-’en̄, ’e’e’e~ ’en̄ e, n-ve’ e n-tek mi ti e va’a gēn.
Ti n-tek mi ti wā “Ey! Näk ’en ’en̄’en̄! Näk ’ogrën̄! Näk ’ogrën̄, pa näk pu’ kal sag ’ān kē ge māmās.
Si në wë m-van qēl kē ge rërër, sōwlē näk ’asem me mē në, wā: ‘O, n-kē ge rërër! Naw e / naw e m-tän̄ në ēgēn. Sōw e, në k-van kal sag. Në k-van kal sag ’en naw!’…”
Sōwlē, ti n-van. Van van van va– van, qēl kē ge rërër e, ’ān̄sār e n-’asem sōw mi-ti wā “Ekē, naw e m-tän̄ në ēgēn!” Ewā ti n-varkal.
Varkal sag me kö-wö’ e naw e n-māmās ’en ti.
Täru van van va– van wā kē n-meren, wā täru van tän̄ sōw a Torēs e.
Van tän̄ sōw a Tores e, ti n-van sar – van pu’ sar ’ān n̄ere me’ e, van sar e, pu’ lav sar ’ān me’ – Wā ti n-tek mēn e n-’ān̄sār / ’ān̄sār nē wā “Näk wë m-van kal sar, näk ’og’og, näk vasn̄ē n-qin̄im. N-qin̄im e wë m-vavavan wā m-tän̄ m̄eltöl, sōw e näk van kēl me näk ’asem mē në, gätru ’ö’ kēl näk.” Wë “Itōk.”
Ti m-van sar nē, van kal sar lē vunu, mē ērge nē, ’og’og –
Sōw wa, ti m-vasvasn̄ē n-qön̄ mōn: n-qön̄ vōwal e, ti m-vasn̄ē vasn̄ē vasn̄ē vasn̄ē vasn̄ē va–vavavan, tän̄ n-qön̄ san̄wul / n-qön̄ m̄eltöl mäkä ’alōw; sōwlē –
Kiri wö’ ti n-van row me, ti n-tek mēn e / ti n-vasem kēl wël sā n-tektek mōn e. So “N-qin̄ik e, n-m̄eltöl e ’alōw.”
Sōw ti n-’asem kēl wël mi-ti.
So “’Alōw lē mā’āv, näk van me. Näk van me lē mā’āv la’i.”
Sōwlē, ti m-van row, ’asem qē’ mē ti, n-van kal kēl.
Kē m-qön̄ sōw, kē m-meren row ne, ti m-qēl kēl row me, ti (n-ve’ e) māl pu’ ’örma’.
Ti m-van row, van kal rān ti, täru m-van wël, ti m-’aw n-wes rār.
Ti m-sisn̄ē sisn̄ē sisn̄ē si–sisn̄ē: n-qä’än e wënwën qē’ mi n-wes rār.
“Sōwlē! Gätru ēgēn.”
Täru kālrāk nē, täru van van van van van van van van va– van, tän̄ sōw ’ān N̄ere-pinimen e, van sar e ti n-saet sar a n-qen̄ ve’ e (ti n-gar marmar wël) – wa ērge ta’isag lē n-vunu e, tär ta n-qān̄ris lowo!
Tär ta n-qān̄ris lowo, so n-gengen sir n-qön̄ m̄eltöl mun e ’am̄an ow.
So “Kēh!”
Ti n-row kal sag nē so n-van sar e m-saet sar a lē qen̄ ve’ e: sōwlē, ti n-van kal. Ti n-van kal, van sar e: “O! Lēlqön̄!”
Ērge ne e qäs ’i sag e, n-lāklāk lowo!
Tär m-ta e, n-lāklāk lowo.
O tär lāk lāk lā–k, lāk ewa, na nē m-qē’; e tär qäs rāk e, tär lāk lu.
Ti n-van sar ne, m-’är pa’. ’Är pa’ wël kē ge mälägläg.
’Är pa’ wël kē ge mälägläg ne, ti n-/ tär qäs rāk lik sag nē e, ti n-/ tär lāk lu ne e, ti n-lāk lu rek.
Lāk lāk lāk lā–k ewa ti n-qē’ ewā ti n-van wël e n-’är pa’ kē ge mälägläg. Ewā ti n-van rāk.
Tär wë qäs rāk ewā tär lāk sur ewā ti n-lāk sur rek.
Va–va–van e, e n-ren̄e, n-pulsālān e, n-’et.
’Et ’et ’et ’et e wa: “Lāklāk ’i ne, n-pulsëlëk, pa ti n-van me mäkävä ne? Wa n-qön̄ m̄eltöl mōn, kiri wö’. Pa lāklāk ’i wö’, n-pulsëlëk së lāklāk ’i now.”
Sōwlē, ti n-qē’ lāklāk, n-ren̄e e n-qē’ lāklāk ēgēn.
Ti n-’är pa’ kē ge mälägläg e ti n-’et sā: n-’ān̄sār e, wā n-’am̄an e kävä ne, ti n-lāklāk e n-’är’är pa’ e kävä.
Ti ne van van va– van e, ti ne-/ tär qäs rāk kēl e, ti n-lāk lu.
E van, van va va van, n-ren̄e e n-van me n-van me, n-’är pa’ ekē nē van va– van e, ewā “Óòó! Kö-wö’ ti e vanvan me qäl’ä kö-wö’! Ti n-’är’är pa’ e, kävä ne kiri?”
Ewā tär qäs rāk lik ewa ti n-lāk lu.
Ewa “Óòó! Ti n-’är’är pa’ ekē gēn.”
Sōwlē ti n-van wël van wël van wël vavavan: kal qēl wël ekē ge mälägläg ekē ēge e n-’är’är pa’ lon e wa –
Lāklāk e n-qē’ sōw van e wā n-’am̄an e m-vala wël e wā n-row pa’ kēl sar ekē ge mälägläg ewa: gōnōn en °m-gorva an̄° wël en n-gis / ’ör varge ti ewā ti n-’en̄.
M-’en̄ me ekē nē: (tär wo) “Ēi! N-sāv ne?” – “’Ān̄sār e n-’en̄’en̄ e gä wël gēn.”
Tär qē’ n-lāklāk ne, van wël, wo “M-sāv’ē?”
Wo “Óòó, n-pulsëlëk e m-qälän̄ ’i, pa ti e ti wow.” Tär wë “Ei! ’Irgi? Ti m-mōl kēl me?!”
E ti wë “Näk m-van ’i, m-’og ’i kävä ne?” – “Në m-van ’i, m-’og ’i Torēs.
Sōwlē – wā n-ve’ e, ti n-le kēl ti sar e ti n-vala kal wā, n-ve’ e n-sēptēm rāk row mäkä nē: wa n-to e n-tëtrāg!”
To m-tëtrāg nē, ti m-pu’ lav wal ekē nē. Ti m-pu’ lav wal ekē nē –
Tär wā: “Pa näk m-mōl me rān sāv ne?”
“Ami van row rān N̄ereqā’āg’āg e pa kimi ’et qēl row lē naw e. Kimi ’et qēl row lē naw e, kimi ’et sōw wa n-naw mele’ ’i rān n-ve’, pa ti e ti now, në m-mōl me rān n-ve’ e.”
Sōw, n-ve’ e pu’ la’i rān ’ān vegi wö’: tän̄ kiri wö’, n-sān e n-M̄altëtrāg.
Pu’ ’i. Sōw ’ān N̄ere Pinimen e, pōt vala me en, vala lu sar wö’. Pōt vala me en, vala lu row wö’. Vala lu sar wö’.
Tär ge ōl wā ‘Lē li Awaw’. ‘Lē li Awaw’.
Pa n-ve’ e pu’ ’i row me ne, ve’ e ’a Torēs. M̄altëtrāg.
Sōwlē. Kaka ’apän e wöte ti m-qē’ sōw kē gēn. Kaka pän e m-qē’ ēgēn.

S1 doi

stop écouter
Tär ’og’og wël lē sele Wōlrēv, vunu: van N̄ere Pinimen e, ’ān vāli kēl me nē, pa ’et kal sag.

S2 doi

stop écouter
Tär ’og’og kēnē, ērge ’og’og, qön̄ vōwal tär wo “Ei! Kiri wö’, gät ’og’og kö-wö’, pa gät ē pigpig ’ä n-mōmō, pa kiri wö’ gät qēl sōw lë e, gät pili’. Gät ’ār’ār gāt mōmō.”

S3 doi

stop écouter
Wo “Ge itōk.” Tär van.

S4 doi

stop écouter
Kē m-revrev, lo m-van row e ’ān vögö lām, alē tär qēl.

S5 doi

stop écouter
Qēl sōw e, tär ’ār n-vë’ë.

S6 doi

stop écouter
Tär ’ār n-vë’ë ’ā~ ’ār, ’ār qē’ n-vë’ë tär van me, pōl. Pō–pōl, pōl qē’, tär ’al.

S7 doi

stop écouter
Tär ’al ’a–’al, ’al qē’, wa kē e n-mälägläg.

S8 doi

stop écouter
Kē m-mälägläg nē e tär sin̄. Sin̄ e tär van ’ān me’ va’a gēn.

S9 doi

stop écouter
Tär pili’ row. Van van van, tär van pili’ pili’, pili’ row pili’ row vavavan – Sōw, ērge na ti nē m-van qēl kēl sar mäkä wö’, tär van sōw.

S10 doi

stop écouter
Pa n-’ān̄sār vōwal e m-van row e pa n-ve’ e māl van sar e pu’ ’i e.

S11 doi

stop écouter
E sōw e, ti m-van row, van kal row rān ve’ e, ti m-tët e wā n-me’.

S12 doi

stop écouter
Van row nē, van ’ān vāli gēn.

S13 doi

stop écouter
Van me van me, van, van van, tän̄ row e, ti n-van kēl ’ān vālgi.

S14 doi

stop écouter
Vanvan kēl me ’ān vālgi nē, pa n-ve’ e māl qē’ēg van rāk.

S15 doi

stop écouter
Māl vanvan ti n-vanvan row ēgēn.

S16 doi

stop écouter
Kēl sar e, lē / n̄ere me’ e mal rës.

S17 doi

stop écouter
Tär van / Ti ne van row, van row, va–van e… ti ne va–van kēl me wö’: “O, kö-wö’ n-lām! Kö-wö’ n-lām la’i.”

S18 doi

stop écouter
Ti n-van kēl ’ān vālgi. Van vavavan nē, n-tän̄ row e: “Oo! Ekē na wö’ n-lām!”

S19 doi

stop écouter
Ewa ti n-van kēl. Vavavan ’ān vālgi: “Oo! Ekē na wö’ n-lām.” Ewa ti n-van kēl.

S20 doi

stop écouter
Ti n-van van kēl ekē nē wa ti ne-’et e, ērge e nev mōr e wa lē aqiiit e!

S21 doi

stop écouter
Wā n-ve’ e va’a row e. Va’a row e.

S22 doi

stop écouter
Ti n-van row, van row… Va–van a, ti m-’et e wa “Uu!” Ē ge e m-’en̄. ’Ān̄sār e m-’en̄.

S23 doi

stop écouter
Ti n-’en̄, ’e’e’e~ ’en̄ e, n-ve’ e n-tek mi ti e va’a gēn.

S24 doi

stop écouter
Ti n-tek mi ti wā “Ey! Näk ’en ’en̄’en̄! Näk ’ogrën̄! Näk ’ogrën̄, pa näk pu’ kal sag ’ān kē ge māmās.

S25 doi

stop écouter
Si në wë m-van qēl kē ge rërër, sōwlē näk ’asem me mē në, wā: ‘O, n-kē ge rërër! Naw e / naw e m-tän̄ në ēgēn. Sōw e, në k-van kal sag. Në k-van kal sag ’en naw!’…”

S26 doi

stop écouter
Sōwlē, ti n-van. Van van van va– van, qēl kē ge rërër e, ’ān̄sār e n-’asem sōw mi-ti wā “Ekē, naw e m-tän̄ në ēgēn!” Ewā ti n-varkal.

S27 doi

stop écouter
Varkal sag me kö-wö’ e naw e n-māmās ’en ti.

S28 doi

stop écouter
Täru van van va– van wā kē n-meren, wā täru van tän̄ sōw a Torēs e.

S29 doi

stop écouter
Van tän̄ sōw a Tores e, ti n-van sar – van pu’ sar ’ān n̄ere me’ e, van sar e, pu’ lav sar ’ān me’ – Wā ti n-tek mēn e n-’ān̄sār / ’ān̄sār nē wā “Näk wë m-van kal sar, näk ’og’og, näk vasn̄ē n-qin̄im. N-qin̄im e wë m-vavavan wā m-tän̄ m̄eltöl, sōw e näk van kēl me näk ’asem mē në, gätru ’ö’ kēl näk.” Wë “Itōk.”

S30 doi

stop écouter
Ti m-van sar nē, van kal sar lē vunu, mē ērge nē, ’og’og –

S31 doi

stop écouter
Sōw wa, ti m-vasvasn̄ē n-qön̄ mōn: n-qön̄ vōwal e, ti m-vasn̄ē vasn̄ē vasn̄ē vasn̄ē vasn̄ē va–vavavan, tän̄ n-qön̄ san̄wul / n-qön̄ m̄eltöl mäkä ’alōw; sōwlē –

S32 doi

stop écouter
Kiri wö’ ti n-van row me, ti n-tek mēn e / ti n-vasem kēl wël sā n-tektek mōn e. So “N-qin̄ik e, n-m̄eltöl e ’alōw.”

S33 doi

stop écouter
Sōw ti n-’asem kēl wël mi-ti.

S34 doi

stop écouter
So “’Alōw lē mā’āv, näk van me. Näk van me lē mā’āv la’i.”

S35 doi

stop écouter
Sōwlē, ti m-van row, ’asem qē’ mē ti, n-van kal kēl.

S36 doi

stop écouter
Kē m-qön̄ sōw, kē m-meren row ne, ti m-qēl kēl row me, ti (n-ve’ e) māl pu’ ’örma’.

S37 doi

stop écouter
Ti m-van row, van kal rān ti, täru m-van wël, ti m-’aw n-wes rār.

S38 doi

stop écouter
Ti m-sisn̄ē sisn̄ē sisn̄ē si–sisn̄ē: n-qä’än e wënwën qē’ mi n-wes rār.

S39 doi

stop écouter
“Sōwlē! Gätru ēgēn.”

S40 doi

stop écouter
Täru kālrāk nē, täru van van van van van van van van va– van, tän̄ sōw ’ān N̄ere-pinimen e, van sar e ti n-saet sar a n-qen̄ ve’ e (ti n-gar marmar wël) – wa ērge ta’isag lē n-vunu e, tär ta n-qān̄ris lowo!

S41 doi

stop écouter
Tär ta n-qān̄ris lowo, so n-gengen sir n-qön̄ m̄eltöl mun e ’am̄an ow.

S42 doi

stop écouter
So “Kēh!”

S43 doi

stop écouter
Ti n-row kal sag nē so n-van sar e m-saet sar a lē qen̄ ve’ e: sōwlē, ti n-van kal. Ti n-van kal, van sar e: “O! Lēlqön̄!”

S44 doi

stop écouter
Ērge ne e qäs ’i sag e, n-lāklāk lowo!

S45 doi

stop écouter
Tär m-ta e, n-lāklāk lowo.

S46 doi

stop écouter
O tär lāk lāk lā–k, lāk ewa, na nē m-qē’; e tär qäs rāk e, tär lāk lu.

S47 doi

stop écouter
Ti n-van sar ne, m-’är pa’. ’Är pa’ wël kē ge mälägläg.

S48 doi

stop écouter
’Är pa’ wël kē ge mälägläg ne, ti n-/ tär qäs rāk lik sag nē e, ti n-/ tär lāk lu ne e, ti n-lāk lu rek.

S49 doi

stop écouter
Lāk lāk lāk lā–k ewa ti n-qē’ ewā ti n-van wël e n-’är pa’ kē ge mälägläg. Ewā ti n-van rāk.

S50 doi

stop écouter
Tär wë qäs rāk ewā tär lāk sur ewā ti n-lāk sur rek.

S51 doi

stop écouter
Va–va–van e, e n-ren̄e, n-pulsālān e, n-’et.

S52 doi

stop écouter
’Et ’et ’et ’et e wa: “Lāklāk ’i ne, n-pulsëlëk, pa ti n-van me mäkävä ne? Wa n-qön̄ m̄eltöl mōn, kiri wö’. Pa lāklāk ’i wö’, n-pulsëlëk së lāklāk ’i now.”

S53 doi

stop écouter
Sōwlē, ti n-qē’ lāklāk, n-ren̄e e n-qē’ lāklāk ēgēn.

S54 doi

stop écouter
Ti n-’är pa’ kē ge mälägläg e ti n-’et sā: n-’ān̄sār e, wā n-’am̄an e kävä ne, ti n-lāklāk e n-’är’är pa’ e kävä.

S55 doi

stop écouter
Ti ne van van va– van e, ti ne-/ tär qäs rāk kēl e, ti n-lāk lu.

S56 doi

stop écouter
E van, van va va van, n-ren̄e e n-van me n-van me, n-’är pa’ ekē nē van va– van e, ewā “Óòó! Kö-wö’ ti e vanvan me qäl’ä kö-wö’! Ti n-’är’är pa’ e, kävä ne kiri?”

S57 doi

stop écouter
Ewā tär qäs rāk lik ewa ti n-lāk lu.

S58 doi

stop écouter
Ewa “Óòó! Ti n-’är’är pa’ ekē gēn.”

S59 doi

stop écouter
Sōwlē ti n-van wël van wël van wël vavavan: kal qēl wël ekē ge mälägläg ekē ēge e n-’är’är pa’ lon e wa –

S60 doi

stop écouter
Lāklāk e n-qē’ sōw van e wā n-’am̄an e m-vala wël e wā n-row pa’ kēl sar ekē ge mälägläg ewa: gōnōn en °m-gorva an̄° wël en n-gis / ’ör varge ti ewā ti n-’en̄.

S61 doi

stop écouter
M-’en̄ me ekē nē: (tär wo) “Ēi! N-sāv ne?” – “’Ān̄sār e n-’en̄’en̄ e gä wël gēn.”

S62 doi

stop écouter
Tär qē’ n-lāklāk ne, van wël, wo “M-sāv’ē?”

S63 doi

stop écouter
Wo “Óòó, n-pulsëlëk e m-qälän̄ ’i, pa ti e ti wow.” Tär wë “Ei! ’Irgi? Ti m-mōl kēl me?!”

S64 doi

stop écouter
E ti wë “Näk m-van ’i, m-’og ’i kävä ne?” – “Në m-van ’i, m-’og ’i Torēs.

S65 doi

stop écouter
Sōwlē – wā n-ve’ e, ti n-le kēl ti sar e ti n-vala kal wā, n-ve’ e n-sēptēm rāk row mäkä nē: wa n-to e n-tëtrāg!”

S66 doi

stop écouter
To m-tëtrāg nē, ti m-pu’ lav wal ekē nē. Ti m-pu’ lav wal ekē nē –

S67 doi

stop écouter
Tär wā: “Pa näk m-mōl me rān sāv ne?”

S68 doi

stop écouter
“Ami van row rān N̄ereqā’āg’āg e pa kimi ’et qēl row lē naw e. Kimi ’et qēl row lē naw e, kimi ’et sōw wa n-naw mele’ ’i rān n-ve’, pa ti e ti now, në m-mōl me rān n-ve’ e.”

S69 doi

stop écouter
Sōw, n-ve’ e pu’ la’i rān ’ān vegi wö’: tän̄ kiri wö’, n-sān e n-M̄altëtrāg.

S70 doi

stop écouter
Pu’ ’i. Sōw ’ān N̄ere Pinimen e, pōt vala me en, vala lu sar wö’. Pōt vala me en, vala lu row wö’. Vala lu sar wö’.

S71 doi

stop écouter
Tär ge ōl wā ‘Lē li Awaw’. ‘Lē li Awaw’.

S72 doi

stop écouter
Pa n-ve’ e pu’ ’i row me ne, ve’ e ’a Torēs. M̄altëtrāg.

S73 doi

stop écouter
Sōwlē. Kaka ’apän e wöte ti m-qē’ sōw kē gēn. Kaka pän e m-qē’ ēgēn.