Mer̄ëmpē, L'anguille de rivière


Continuous playing:

Transcription by sentence


Whole text transcription


Kön̄ së, tör̄öqate yog. Sör̄ö yöyöy, ne ten̄wën mi ne yeqën e na.
Sör̄ö yöy vë~n vën, sör̄ö r̄ak nösa megoye tuwë. Ne megoye, ne megoye ten̄wën.
Ne metëvönyö pe sise ve toge eye, në pwö kkë. Tekn̄wa në pusune.
Sör̄ö / sör̄ö mi ne megoye ten̄wën tuwë n̄wutuye.
Taketimer̄ën ne megoye ten̄wën in ve yyave me, nine ta tetō magëne.
Kön̄ së, wote nine tar̄ake tetō, kön̄ së nine tō ti r̄ōw e yo.
Tō r̄ōw me, yō ne qer̄on̄ pē n̄ot ve tu.
Patar̄’ i ne qer̄on̄ pē in, ne töt vot e n̄ot ve sag.
Nine sag, ne sag p’ ëne, ne sag ne gengon; ne tetr̄og ne n̄ë gengon ena yö qer̄on̄ pē.
R̄ak n̄wë ne vën vën, kön̄ së; nine tō me, ne sagsag wuyog ti, ne tr̄og ne gengon ena vën yö qer̄on̄ pē, ne yō: ne mer̄ëmpē ōy o me.
Ne mer̄ëmpē, pa në~~~~ kkë! Në kkë, në kkë r̄ēt!
Tamer̄ën nine yō n̄wë ne, r̄ak tom: voy-kön̄ ppa, voy-metave mi voy-r̄evr̄ov, n’ on oye gena gengon, ne tō ne sag, ne gengon e r̄ē töt vot. N̄wute pe ne qer̄on̄ pē ve tu ie.
R̄ak tom, ne n̄ë gengon ena, ne tr̄og vën e yö qer̄on̄ pē, mer̄ëmpē ōy o me, gengon.
R̄ak pe n̄wë ne.
R̄ak n̄wë ne, r̄ak n̄wë ne vë~n vën, mer̄ëmpē pwö.
Nine ver̄og tu nine ve yyave, ne megoye ten̄wën in ve yyave vë~n vën ~
Ne yyave r̄ak kkë vën me, kön̄ së, nine gatēt ti teta na: “Teta, ik’ on sōw ne gengon, gokye ike go yö wnot on pwö kkë.”
Teta na tom: “Ik’ oye ne gengon pwö n̄wë ëne, ike tat gon pa magē!”
Tom “Tego! Noke men̄men̄on ne mer̄ëmpē ie. Quy e kye, noke / r̄ōw tu, r̄ōw ōy yö qer̄on̄ pē kkë pener̄ë, noke tetr̄og ne n̄ë gengon se, pa ~ nëpe nine pwö piti, noke ne yök n̄is tom ik’ on sōw gok gë, r̄ak ne wnot in on pwö.”
Alë, r̄ak pe n̄wë ne, teta na r̄akr̄ak ur̄ tittöm e na.
Go gena gengon, tevog / oye se, ne tevog.
Tun̄ taye, nine gon takē, ne n̄ë gengon in nine tr̄og uw mi ne takē gengon; wötog uw e yö pē, mer̄ëmpē ōy ur̄ me, gon.
R̄ak pe n̄wë ne.
R̄ak n̄wë ne, taketimer̄ën nine ve pwö kkë, mer̄ëmpē ve pwö kkë weyog, gatēt ti / nine gatēt ti teta na tom “Tukn̄waëne, ik’ on go ne gengon, on në yyave kkë / on pwö kkë, at ton tōwtōw.”
Tom “Ur̄ n’ ave n̄wë ne?” Tom “Pa nëpe ququy e kye yaqe në mesō piti ie. Nine pwö piti!”
Teta na r̄ak ur̄ ne tömtöm e na.
Alë, vë~n vën, kön̄ së, nin’ oye ne wnot in, tō wate r̄ōw, tō r̄ōw, yō vën ne yumegov e n̄ot ve sag.
Sag tegtag r̄ē qayetë v/ r̄ē töt vot pe nine ve sag ve gengon ga r̄ëne.
Ne tō me, ne tu tegtag r̄ē töt vot in, nine yë uw e yö qer̄on̄ pē. Yëar̄ i ququy e na naō.
Negōne ssa pe ssa! Nëpe nine tr̄og ne n̄ë gengon uw n̄wë ne, mer̄ëmpē gë yër̄e.
Ne yëar̄ yëar̄ yëar̄, yëar̄ pëk eye.
Ququy e na, mer̄ëmpē pe ve sag e r̄ē vot, yur̄: “Ququy! Ike yer̄yëar̄ n’ ave?”
Tom “Noke yër̄yëar̄ i ququy e kye!”
“Ququy e nome n’ ave?”
Tom “Ququy e kye pe ne mer̄ëmpē pe vē ēn ti yö qer̄on̄ pē pe ne, pa ~ Kn̄wa pe ne, ke tō r̄ōw me, k’ oye gema gë me, pa në yër̄e.”
Alë, r̄ak n̄wë ne, mer̄ëmpē r̄iwe. Nine tom “Pa ike r̄iwag n’ a?”
Tom “Noke r̄iwe nëpe ququy e nome pe ike getgatēt ëne, pe inoke! Noke wōg ne tayö piti ie!”
“Tir̄ gë wye nome?” Tom “E! Noke pe ike ve men̄men̄on inoke ti ëne! Noke tati ta ne mer̄ëmpē, noke ne tir̄ tayö! Noke wōg ne tayö piti ie.”
R̄ak tom nine r̄ōn̄ n̄wë ne, nine r̄ōn̄ meyekeyake pe meyekeyake.
Nine veyag n̄wuye. Gat tom “Teta! Ne yök n̄is tom ik’ oye së/ ik’ on tō ag tom ik’ on oye / ik’ on go gok gengon, ike go ne wnot on vir̄ö.”
Teta na tom “Tōwtōw, ne wnot në kkëkkë ti. Alë vë~n vën, ike gat tom mer̄ëmpē ve yyave, noke go ne wnot on mesō kkë. Pa qetukn̄waëne, ike gat tom go ne wnot vir̄ö.”
Tom “Ti n’ ave pe? Gokye së, go-n quy e kye së.”
Alë, teta na r̄ak ne tittöm e na.
R̄ak ne tittöm e na, ne tevog r̄ōw, nine sōw: gena ti-wnot, go-n mer̄ëmpē ti-wnot.
Nine gon pa, ne tō n̄wuye.
Alë, metave metave tōt vën, nine ta-ar̄ i temane mi r̄akn̄ane me, nine tom: “Noke tom noke yur̄ / tom noke gatēt yaqe kn̄wu gë ti kimir̄e.”
Tom “n’ ave?” Tom “Ne mer̄ëmpē pe noke men̄men̄on ti, ne mer̄ëmpē ta yaqe ne megoye piti ie! Ne yumegov.”
“Evo ne yumegov ëne?” ~ “R̄ōw sag ne! Ve sag n̄wute pe noke ve men̄on ie ti ie.”
Tom “Köö! Ike r̄ak në ssa se n̄wë ne tom ti n’ a? Nö-nome ne n̄wati-gë tego, ike tō ike ya ie me!”
Nine tom “Pa ~ noke ya ie ti me, kemi tat not ie?”
Temane mi r̄akn̄ane tom “Tego maqu! Tego r̄ēt wöttog! Kemar̄e tat not inine maqu. Tō wöt ya ie me, gatēt se tom nine tati metegtog!”
Nine ya ie me, sise toge.
Se toge pa ~ sör̄ö quyquy wu~~r̄og.
Sör̄ö tat tetō / Sör̄ö tat tō visevise ton i së. Sör̄ö tō ëtwë voy-kön̄. Tekn̄wa on vën ti ne r̄ekov’ i yöte, sör̄ö tō ëtwë.
R̄ak vë voygë: sör̄ö r̄ak voygë ëtwë tan̄wöy. Voy-kön̄ pa, sör̄ö r̄ak voygë ëtwë. Sör̄ö në teptëpyë-se.
R̄ak n̄wë ne vën vën ~
Sise toge, kön̄ së, sise vën se r̄iw ne yöte-n ne qin e n̄ot ti. Sör̄ö r̄iw n̄wë ne, sör̄ö tu i ne wōt tuwë.
Tamer̄ën sör̄ö on wut r̄ake ne tën n̄wë ne, tun̄wuyegë n̄weyen̄waye yō wye i sise n̄wë ne — r̄ak tom ne yōse n̄is tom sise tot tan̄wöy ne n̄wët en / tot tan̄wöy ne n̄wët en / tot tan̄wöy ne n̄wët en Mer̄ëmpē mi n̄watine.
Se r̄ak pe n̄wë ne. R̄ak n̄wë ne, pa r̄ak naō, oye ne yōysa ti tekn̄wa tamesō.
Tom “Ur̄ n’ a, ur̄ n’ a n̄wë ne?! Tör̄öqate pe ne, Mer̄ëmpē mi n̄watine, r̄ö tō gega mi-te, r̄ak tom qutukn̄waëne, tuwuyegë n̄weyen̄waye paëne vën vën ur̄-ise tan̄wöy pe! Tot tan̄wöy ne n̄wët e sa ~ ne n̄wët pe tite wutwut, tego pe!”
Alë, se r̄ak pe n̄wë ne. Se r̄ak pe n̄wë ne, kön̄ së, sise tr̄ēg ne n̄wute ssa se.
Sise gat tom: “Kö-kön̄, në pe n̄wë ne ve r̄ak wuyog, tite peon not mati Mer̄ëmpē.”
Sise tr̄ēg pa ne kön̄ in…
Kön̄ së, sise vën tom se r̄ekove yöte; sise vën vën ~ Tamer̄ën ne r̄ekove ppa, se tō n̄wöt r̄ō Mer̄ëmpē, se r̄ak ter̄og ie.
Se r̄ak ter̄og ie se not mase.
Se not mase, se vënn̄og wat’ uw yö-n̄we: teta na mi pepa na / temane mi r̄akn̄ane ve r̄ar̄ōn̄ pe r̄ar̄ōn̄! Mi n̄watine.
R̄ar̄ōn̄ mar̄i Mer̄ëmpē nëpe tom sise ve not mase.
Sise vënn̄og iy yö-n̄we, sise qite ne yite, vën me, tun̄wuyegë pyë n’ ov; alë ten̄war̄e var̄er̄age.
Tom vën, yëar̄ ne gengon; peon tor̄ mi ne mer̄ëmpē ~ alë viye ne ga ~ alë tun̄wuyegë toge tom tor̄ mer̄ëmpē.
Se ve toge, vor̄sasēr̄ēg, pa ~ ne / sise vën o ton n’ ēn̄we nëpe ne sov, ne sov, vënur̄ ne sov ~ ne sov yö-n̄we. Nëpe ne tayö tat menawe wr̄og.
Sise ve toge, toge waw ~ e toge mi ne vegevage, tuqunkë toge mi ne vor̄vegoy, payet-ēn̄we.
Toge vën vën, se r̄ōn̄ Mer̄ëmpē putput:
Tekn̄war̄ë ten̄ton̄ ë mëtmët/ Tekn̄war̄ë ten̄ton̄ ë mëtmët/ On tavesir̄ uw me ne wō mëtë pē/ On tav’ ino?/ On tor̄ ë no/ On yuv ë no ë
Tamer̄ën nine putput vager̄ö-on, ne yeqën tamesō n̄ot r̄ōn̄.
“Ēi! Tuwutgë! Noke r̄ōn̄ tom mer̄a-/ tom Mer̄ëmpē ve putput ne! Mer̄ëmpē woteye at n̄wuye wuyog piti!”
Tom “Mer̄ëmpē vo?! Mer̄ëmpē v’ iy ēn pe tom tite tor̄!”
“Pa kemi toge var̄ōn̄ që!” Alë nine / sise r̄ōn̄ i ne putput wuyog.
“Pa kemi toge var̄ōn̄ kemi r̄ōn̄ ne putput wuyog!”
Tekn̄war̄ë ten̄ton̄ ë mëtmët/ Tekn̄war̄ë ten̄ton̄ ë mëtmët/ On tavesir̄ uw me ne wō mëtë pē/ On tav’ ino?/ On tor̄ ë no/ On yuv ë no ë
“Tuqunkë! Kemi toge var̄ōn̄ te! R̄ōn̄ tom Mer̄a/ ne mer̄ëmpē putput!”
Taketimer̄ën sise r̄ōn̄ wuyog, sise voyi me, pa Mer̄ëmpē ve kay pe r̄ōw.
Kay o, kay yegë ne peyepaye. Kay r̄ōw e waw, temane mi r̄akn̄ane, r̄ö / mi n̄watine sise voyi me sise gat tom “O, Mer̄ëmpē, ike kay n̄wuye me yö-n̄we ta!”
Gat tom “Tego! Noke tër̄ö pe nëpe noke yöy wur̄og ti, tekn̄wa kayr̄ake me, not mat inoke. R̄ak tom tor̄ inoke, pa ~ Noke tat tōyōq n̄wuye wuyog me.”
Temane mi r̄akn̄ane r̄ö tō ur̄ie. Sör̄ö mi n̄watine se vën ur̄ie vë~ vën.
Ne ka~y kay, ne kay tevetavesir̄ uw yö pē pe nine ve wote ti ie, ne yër̄e p’ ëne.
Ne vegevag’ in ppa pe ne.
S1 stop écouter
Kön̄ së, tör̄öqate yog. Sör̄ö yöyöy, ne ten̄wën mi ne yeqën e na.

S2 stop écouter
Sör̄ö yöy vë~n vën, sör̄ö r̄ak nösa megoye tuwë. Ne megoye, ne megoye ten̄wën.

S3 stop écouter
Ne metëvönyö pe sise ve toge eye, në pwö kkë. Tekn̄wa në pusune.

S4 stop écouter
Sör̄ö / sör̄ö mi ne megoye ten̄wën tuwë n̄wutuye.

S5 stop écouter
Taketimer̄ën ne megoye ten̄wën in ve yyave me, nine ta tetō magëne.

S6 stop écouter
Kön̄ së, wote nine tar̄ake tetō, kön̄ së nine tō ti r̄ōw e yo.

S7 stop écouter
Tō r̄ōw me, yō ne qer̄on̄ pē n̄ot ve tu.

S8 stop écouter
Patar̄’ i ne qer̄on̄ pē in, ne töt vot e n̄ot ve sag.

S9 stop écouter
Nine sag, ne sag p’ ëne, ne sag ne gengon; ne tetr̄og ne n̄ë gengon ena yö qer̄on̄ pē.

S10 stop écouter
R̄ak n̄wë ne vën vën, kön̄ së; nine tō me, ne sagsag wuyog ti, ne tr̄og ne gengon ena vën yö qer̄on̄ pē, ne yō: ne mer̄ëmpē ōy o me.

S11 stop écouter
Ne mer̄ëmpē, pa në~~~~ kkë! Në kkë, në kkë r̄ēt!

S12 stop écouter
Tamer̄ën nine yō n̄wë ne, r̄ak tom: voy-kön̄ ppa, voy-metave mi voy-r̄evr̄ov, n’ on oye gena gengon, ne tō ne sag, ne gengon e r̄ē töt vot. N̄wute pe ne qer̄on̄ pē ve tu ie.

S13 stop écouter
R̄ak tom, ne n̄ë gengon ena, ne tr̄og vën e yö qer̄on̄ pē, mer̄ëmpē ōy o me, gengon.

S14 stop écouter
R̄ak pe n̄wë ne.

S15 stop écouter
R̄ak n̄wë ne, r̄ak n̄wë ne vë~n vën, mer̄ëmpē pwö.

S16 stop écouter
Nine ver̄og tu nine ve yyave, ne megoye ten̄wën in ve yyave vë~n vën ~

S17 stop écouter
Ne yyave r̄ak kkë vën me, kön̄ së, nine gatēt ti teta na: “Teta, ik’ on sōw ne gengon, gokye ike go yö wnot on pwö kkë.”

S18 stop écouter
Teta na tom: “Ik’ oye ne gengon pwö n̄wë ëne, ike tat gon pa magē!”

S19 stop écouter
Tom “Tego! Noke men̄men̄on ne mer̄ëmpē ie. Quy e kye, noke / r̄ōw tu, r̄ōw ōy yö qer̄on̄ pē kkë pener̄ë, noke tetr̄og ne n̄ë gengon se, pa ~ nëpe nine pwö piti, noke ne yök n̄is tom ik’ on sōw gok gë, r̄ak ne wnot in on pwö.”

S20 stop écouter
Alë, r̄ak pe n̄wë ne, teta na r̄akr̄ak ur̄ tittöm e na.

S21 stop écouter
Go gena gengon, tevog / oye se, ne tevog.

S22 stop écouter
Tun̄ taye, nine gon takē, ne n̄ë gengon in nine tr̄og uw mi ne takē gengon; wötog uw e yö pē, mer̄ëmpē ōy ur̄ me, gon.

S23 stop écouter
R̄ak pe n̄wë ne.

S24 stop écouter
R̄ak n̄wë ne, taketimer̄ën nine ve pwö kkë, mer̄ëmpē ve pwö kkë weyog, gatēt ti / nine gatēt ti teta na tom “Tukn̄waëne, ik’ on go ne gengon, on në yyave kkë / on pwö kkë, at ton tōwtōw.”

S25 stop écouter
Tom “Ur̄ n’ ave n̄wë ne?” Tom “Pa nëpe ququy e kye yaqe në mesō piti ie. Nine pwö piti!”

S26 stop écouter
Teta na r̄ak ur̄ ne tömtöm e na.

S27 stop écouter
Alë, vë~n vën, kön̄ së, nin’ oye ne wnot in, tō wate r̄ōw, tō r̄ōw, yō vën ne yumegov e n̄ot ve sag.

S28 stop écouter
Sag tegtag r̄ē qayetë v/ r̄ē töt vot pe nine ve sag ve gengon ga r̄ëne.

S29 stop écouter
Ne tō me, ne tu tegtag r̄ē töt vot in, nine yë uw e yö qer̄on̄ pē. Yëar̄ i ququy e na naō.

S30 stop écouter
Negōne ssa pe ssa! Nëpe nine tr̄og ne n̄ë gengon uw n̄wë ne, mer̄ëmpē gë yër̄e.

S31 stop écouter
Ne yëar̄ yëar̄ yëar̄, yëar̄ pëk eye.

S32 stop écouter
Ququy e na, mer̄ëmpē pe ve sag e r̄ē vot, yur̄: “Ququy! Ike yer̄yëar̄ n’ ave?”

S33 stop écouter
Tom “Noke yër̄yëar̄ i ququy e kye!”

S34 stop écouter
“Ququy e nome n’ ave?”

S35 stop écouter
Tom “Ququy e kye pe ne mer̄ëmpē pe vē ēn ti yö qer̄on̄ pē pe ne, pa ~ Kn̄wa pe ne, ke tō r̄ōw me, k’ oye gema gë me, pa në yër̄e.”

S36 stop écouter
Alë, r̄ak n̄wë ne, mer̄ëmpē r̄iwe. Nine tom “Pa ike r̄iwag n’ a?”

S37 stop écouter
Tom “Noke r̄iwe nëpe ququy e nome pe ike getgatēt ëne, pe inoke! Noke wōg ne tayö piti ie!”

S38 stop écouter
“Tir̄ gë wye nome?” Tom “E! Noke pe ike ve men̄men̄on inoke ti ëne! Noke tati ta ne mer̄ëmpē, noke ne tir̄ tayö! Noke wōg ne tayö piti ie.”

S39 stop écouter
R̄ak tom nine r̄ōn̄ n̄wë ne, nine r̄ōn̄ meyekeyake pe meyekeyake.

S40 stop écouter
Nine veyag n̄wuye. Gat tom “Teta! Ne yök n̄is tom ik’ oye së/ ik’ on tō ag tom ik’ on oye / ik’ on go gok gengon, ike go ne wnot on vir̄ö.”

S41 stop écouter
Teta na tom “Tōwtōw, ne wnot në kkëkkë ti. Alë vë~n vën, ike gat tom mer̄ëmpē ve yyave, noke go ne wnot on mesō kkë. Pa qetukn̄waëne, ike gat tom go ne wnot vir̄ö.”

S42 stop écouter
Tom “Ti n’ ave pe? Gokye së, go-n quy e kye së.”

S43 stop écouter
Alë, teta na r̄ak ne tittöm e na.

S44 stop écouter
R̄ak ne tittöm e na, ne tevog r̄ōw, nine sōw: gena ti-wnot, go-n mer̄ëmpē ti-wnot.

S45 stop écouter
Nine gon pa, ne tō n̄wuye.

S46 stop écouter
Alë, metave metave tōt vën, nine ta-ar̄ i temane mi r̄akn̄ane me, nine tom: “Noke tom noke yur̄ / tom noke gatēt yaqe kn̄wu gë ti kimir̄e.”

S47 stop écouter
Tom “n’ ave?” Tom “Ne mer̄ëmpē pe noke men̄men̄on ti, ne mer̄ëmpē ta yaqe ne megoye piti ie! Ne yumegov.”

S48 stop écouter
“Evo ne yumegov ëne?” ~ “R̄ōw sag ne! Ve sag n̄wute pe noke ve men̄on ie ti ie.”

S49 stop écouter
Tom “Köö! Ike r̄ak në ssa se n̄wë ne tom ti n’ a? Nö-nome ne n̄wati-gë tego, ike tō ike ya ie me!”

S50 stop écouter
Nine tom “Pa ~ noke ya ie ti me, kemi tat not ie?”

S51 stop écouter
Temane mi r̄akn̄ane tom “Tego maqu! Tego r̄ēt wöttog! Kemar̄e tat not inine maqu. Tō wöt ya ie me, gatēt se tom nine tati metegtog!”

S52 stop écouter
Nine ya ie me, sise toge.

S53 stop écouter
Se toge pa ~ sör̄ö quyquy wu~~r̄og.

S54 stop écouter
Sör̄ö tat tetō / Sör̄ö tat tō visevise ton i së. Sör̄ö tō ëtwë voy-kön̄. Tekn̄wa on vën ti ne r̄ekov’ i yöte, sör̄ö tō ëtwë.

S55 stop écouter
R̄ak vë voygë: sör̄ö r̄ak voygë ëtwë tan̄wöy. Voy-kön̄ pa, sör̄ö r̄ak voygë ëtwë. Sör̄ö në teptëpyë-se.

S56 stop écouter
R̄ak n̄wë ne vën vën ~

S57 stop écouter
Sise toge, kön̄ së, sise vën se r̄iw ne yöte-n ne qin e n̄ot ti. Sör̄ö r̄iw n̄wë ne, sör̄ö tu i ne wōt tuwë.

S58 stop écouter
Tamer̄ën sör̄ö on wut r̄ake ne tën n̄wë ne, tun̄wuyegë n̄weyen̄waye yō wye i sise n̄wë ne — r̄ak tom ne yōse n̄is tom sise tot tan̄wöy ne n̄wët en / tot tan̄wöy ne n̄wët en / tot tan̄wöy ne n̄wët en Mer̄ëmpē mi n̄watine.

S59 stop écouter
Se r̄ak pe n̄wë ne. R̄ak n̄wë ne, pa r̄ak naō, oye ne yōysa ti tekn̄wa tamesō.

S60 stop écouter
Tom “Ur̄ n’ a, ur̄ n’ a n̄wë ne?! Tör̄öqate pe ne, Mer̄ëmpē mi n̄watine, r̄ö tō gega mi-te, r̄ak tom qutukn̄waëne, tuwuyegë n̄weyen̄waye paëne vën vën ur̄-ise tan̄wöy pe! Tot tan̄wöy ne n̄wët e sa ~ ne n̄wët pe tite wutwut, tego pe!”

S61 stop écouter
Alë, se r̄ak pe n̄wë ne. Se r̄ak pe n̄wë ne, kön̄ së, sise tr̄ēg ne n̄wute ssa se.

S62 stop écouter
Sise gat tom: “Kö-kön̄, në pe n̄wë ne ve r̄ak wuyog, tite peon not mati Mer̄ëmpē.”

S63 stop écouter
Sise tr̄ēg pa ne kön̄ in…

S64 stop écouter
Kön̄ së, sise vën tom se r̄ekove yöte; sise vën vën ~ Tamer̄ën ne r̄ekove ppa, se tō n̄wöt r̄ō Mer̄ëmpē, se r̄ak ter̄og ie.

S65 stop écouter
Se r̄ak ter̄og ie se not mase.

S66 stop écouter
Se not mase, se vënn̄og wat’ uw yö-n̄we: teta na mi pepa na / temane mi r̄akn̄ane ve r̄ar̄ōn̄ pe r̄ar̄ōn̄! Mi n̄watine.

S67 stop écouter
R̄ar̄ōn̄ mar̄i Mer̄ëmpē nëpe tom sise ve not mase.

S68 stop écouter
Sise vënn̄og iy yö-n̄we, sise qite ne yite, vën me, tun̄wuyegë pyë n’ ov; alë ten̄war̄e var̄er̄age.

S69 stop écouter
Tom vën, yëar̄ ne gengon; peon tor̄ mi ne mer̄ëmpē ~ alë viye ne ga ~ alë tun̄wuyegë toge tom tor̄ mer̄ëmpē.

S70 stop écouter
Se ve toge, vor̄sasēr̄ēg, pa ~ ne / sise vën o ton n’ ēn̄we nëpe ne sov, ne sov, vënur̄ ne sov ~ ne sov yö-n̄we. Nëpe ne tayö tat menawe wr̄og.

S71 stop écouter
Sise ve toge, toge waw ~ e toge mi ne vegevage, tuqunkë toge mi ne vor̄vegoy, payet-ēn̄we.

S72 stop écouter
Toge vën vën, se r̄ōn̄ Mer̄ëmpē putput:

S73 stop écouter
Tekn̄war̄ë ten̄ton̄ ë mëtmët/ Tekn̄war̄ë ten̄ton̄ ë mëtmët/ On tavesir̄ uw me ne wō mëtë pē/ On tav’ ino?/ On tor̄ ë no/ On yuv ë no ë

S74 stop écouter
Tamer̄ën nine putput vager̄ö-on, ne yeqën tamesō n̄ot r̄ōn̄.

S75 stop écouter
“Ēi! Tuwutgë! Noke r̄ōn̄ tom mer̄a-/ tom Mer̄ëmpē ve putput ne! Mer̄ëmpē woteye at n̄wuye wuyog piti!”

S76 stop écouter
Tom “Mer̄ëmpē vo?! Mer̄ëmpē v’ iy ēn pe tom tite tor̄!”

S77 stop écouter
“Pa kemi toge var̄ōn̄ që!” Alë nine / sise r̄ōn̄ i ne putput wuyog.

S78 stop écouter
“Pa kemi toge var̄ōn̄ kemi r̄ōn̄ ne putput wuyog!”

S79 stop écouter
Tekn̄war̄ë ten̄ton̄ ë mëtmët/ Tekn̄war̄ë ten̄ton̄ ë mëtmët/ On tavesir̄ uw me ne wō mëtë pē/ On tav’ ino?/ On tor̄ ë no/ On yuv ë no ë

S80 stop écouter
“Tuqunkë! Kemi toge var̄ōn̄ te! R̄ōn̄ tom Mer̄a/ ne mer̄ëmpē putput!”

S81 stop écouter
Taketimer̄ën sise r̄ōn̄ wuyog, sise voyi me, pa Mer̄ëmpē ve kay pe r̄ōw.

S82 stop écouter
Kay o, kay yegë ne peyepaye. Kay r̄ōw e waw, temane mi r̄akn̄ane, r̄ö / mi n̄watine sise voyi me sise gat tom “O, Mer̄ëmpē, ike kay n̄wuye me yö-n̄we ta!”

S83 stop écouter
Gat tom “Tego! Noke tër̄ö pe nëpe noke yöy wur̄og ti, tekn̄wa kayr̄ake me, not mat inoke. R̄ak tom tor̄ inoke, pa ~ Noke tat tōyōq n̄wuye wuyog me.”

S84 stop écouter
Temane mi r̄akn̄ane r̄ö tō ur̄ie. Sör̄ö mi n̄watine se vën ur̄ie vë~ vën.

S85 stop écouter
Ne ka~y kay, ne kay tevetavesir̄ uw yö pē pe nine ve wote ti ie, ne yër̄e p’ ëne.

S86 stop écouter
Ne vegevag’ in ppa pe ne.