Toyöë et Wor̄tötë


Continuous playing:

Transcription by sentence


Whole text transcription


Tuwtōw, taketimer̄ën r̄ossë, ne temët / ne temët en̄ot ve qētqētn̄og i tekn̄wa ti.
Tamer̄ën pe nine tēur̄i tekn̄wa n̄wë ne, nine r̄otevog ise, ne qur̄ ise. Temët in në qur̄qur̄.
Vën vën, kön̄ së, ne qin tamesō / ne yeqën tamesō n̄ot, mi ne megoye na vir̄ö.
Wotewote-ten̄wog, ne yane Toyöë; wotewote-vir̄öon, Wor̄tötë.
Sise vën sise toge ti pē yo; tör̄öqate mi n̄watise Toyöë mi Wor̄tötë sör̄ö në n̄is tom sör̄ö tō r̄e r̄evr̄ / sör̄ö tō r̄e ōyōy.
sör̄ö tō r̄e ōyōy, ōy vog nëw yö yame, pa sör̄ö töm pēn r̄akn̄ase, tom: yëtōur̄ ti sör̄ö tō ti, ne mowe sör̄ö ve yër̄e, temët pe ve qur̄qur̄ i tekn̄wa peon qur̄ i r̄akn̄ase.
Pavën, sör̄ö kayr̄ake me r̄e giy ne qer̄on̄ tën, giy tëvëkqö, giy yan̄evog ne vane, r̄e sur̄ i r̄akn̄ase uw yōne, viye nön r̄akn̄ase yite, ne gengon, voygë pa pe n̄wëne, viye vën e yö vë / yö qer̄on̄ tën.
Sör̄ö var̄er̄age sör̄ö / pa ti sör̄ö take tō sör̄ö tom / gatēt ti teta sa tom: tomn̄wëtom ne temët on tō me, on qur̄ ie, n’ on petput n’ on öyar̄ i sör̄ö.
Alë sör̄ö tō. Te/ Pa ti sör̄ö take tō, sör̄ö qōr̄ōg ne qer̄on̄ tën, sör̄ö mok ne r̄ër̄ë, mok ne ti r̄ër̄ë, r̄ak n̄wesaye tom / r̄ak nëpe tom ne temët on tat yō vegyaye tom ne tayö giy ne tën ti.
Sör̄ö tō r̄e ōyōy. Sör̄ö ōyōy ōyōy ōyōy ōyōy vë–n vën, pper̄o!
Per̄o ti vën wat’ i yö wegate r̄evr̄ov n̄wë ne, sör̄ö tar̄ake ti yö metave, vën wat’ i yö wegate r̄evr̄ov –
Ne temët tō me. Qnoven̄i ne sov / ne sov en r̄akn̄ase, nine ve vr̄evr̄ov.
Tō wate me: nine viyviye n̄wotn̄wot ne r̄ër̄ë, mi ne tigë, tom ne vën uw, ne qur̄ i r̄akn̄an Toyöë mi Wor̄tötë.
Tamer̄ën / Tör̄öqate vir̄ö ve ōyōy: sör̄ö öyevog ne nëw i n’ oyin̄e pe tom:
R̄ē nëw me, r̄ē nëw me, r̄ē nëw te pe tiqö ë, ē ë ē ë…
Së on ōyvog ppa nëw së, së sur̄:
R̄ē nëw me, r̄ē nëw me, r̄ē nëw te pe tiqö ë, ē ë ē ë…
Alë, së ōyvog weyog ne nëw.
Sör̄ö r̄ak n̄wë ne vën vën, sör̄ö r̄ōn̄ / wotewote-n̄wō r̄ōn̄ r̄akn̄ase ve putput.
Putput, nine ve sur̄ ne putput pe tom:
Toyöë mi Wor̄tötë, noke n̄wuye r̄ē ave? Noke n̄wuye r̄ē nëwnëw…
Wotewote-n̄wō r̄ōn̄, gatēt ti wotewote tir̄ig Wor̄tötë / Toyöë r̄ōn̄, gatēt ti Wor̄tötë tom: “N̄watik! Ike r̄ōn̄ në ti pe noke ve r̄ōn̄r̄ōn̄ ne?”
Tom “Tawe! Noke tati r̄ōn̄.”
“Noke r̄ōn̄ n̄wesaye tom r̄akn̄ate putput. Togevar̄ōn̄ te tör̄ö r̄ōn̄ te tom në vöwye noke ve r̄ōn̄ ti, titom ne tör̄?”
Sör̄ö ve tu që, sör̄ö r̄ōn̄ ne putput wuyog:
Toyöë mi Wor̄tötë, noke n̄wuye r̄ē ave? Noke n̄wuye r̄ē nëwnëw…
Tom “E! Tir̄ gë wye! Ne temët qur̄qur̄ i r̄akn̄ate pe!”
Wotewote n̄wō gat tom “Pa, noke ōyvog n̄wō ne nëw, ike take ōy me tir̄ig.”
Tom “Wye.” Nine yaw r̄ake r̄ē nëw en̄ot, nin’ ōyvog.
Nin’ ōyvog, tati per̄o ti n̄watine pe wotewote tir̄ig pe ne yane Wor̄tötë, ōyvog ne nëw.
Sör̄ö ōy ōy wat’ ag, wöttog ne tape vën, tetr̄og ne tape sa vën, sör̄ö vëyag.
Sör̄ö vëya–g vëyag wate me, ne temët ve giy wr̄og piti ne qer̄on̄ tën tom iw ti r̄akn̄ase, sör̄ö tom:
“Ike tevetav’ i r̄akn̄a ma?”
Tom “Tego, noke giygiy ne/ ke mar̄ie nëpe nine magëne: nine magëne ve sag, kemir̄e r̄ak ne vogmamer̄ö se ne tayö segsag vog-ye ve tego; noke tō me tom noke sag tom kamar̄e vegevage.”
Alë r̄akn̄ase tom “Ne tör̄, tok! Ne tör̄!”
“Tamer̄ën nine ve yan̄e r̄ake ne tir̄ër̄ë mi ne viye r̄aker̄ake ne qot r̄ër̄ë ton ne qer̄on̄ tën n̄wë ne, nine ve gatēt tom ‘Kn̄wa pe genome ne! Kn̄wa pe genome noke qur̄ yër’ ike ne!’”
Ne temët gat tom: “Ne tör̄, tok! Noke tati gatēt që, noke tom ‘Köö, ne vogmamer̄ö! Tör̄öqate megoye nome r̄ak sa ike, r̄ak vogmamer̄ö tike ike sag vogmamer̄ö magē, ne tayö ve sag tovike tego! Noke tō uw tör̄ö / Noke tō uw noke sag tovike.’”
Sör̄ö oyoye që, Toyöë gat tom “Tego, ne tör̄!” Gatēt ti ne temët tom “Ne tör̄ nëne! Ike vën tom ike qur̄ i r̄akn̄a ma nëne, kn̄wa pe noke ve not matike ne!”
Alë nine myö n̄wot ne qr̄ög en Mer̄ëmpē, ne yan̄w’ i ne temët eye, ne temët mët.
Yan̄we mase, ne sō p’ uw ëne, sör̄ö oye r̄ake sör̄ö wotog.
Ne vegevag’ in tan̄wöy pene. Yöywye tike.
S1 stop écouter
Tuwtōw, taketimer̄ën r̄ossë, ne temët / ne temët en̄ot ve qētqētn̄og i tekn̄wa ti.

S2 stop écouter
Tamer̄ën pe nine tēur̄i tekn̄wa n̄wë ne, nine r̄otevog ise, ne qur̄ ise. Temët in në qur̄qur̄.

S3 stop écouter
Vën vën, kön̄ së, ne qin tamesō / ne yeqën tamesō n̄ot, mi ne megoye na vir̄ö.

S4 stop écouter
Wotewote-ten̄wog, ne yane Toyöë; wotewote-vir̄öon, Wor̄tötë.

S5 stop écouter
Sise vën sise toge ti pē yo; tör̄öqate mi n̄watise Toyöë mi Wor̄tötë sör̄ö në n̄is tom sör̄ö tō r̄e r̄evr̄ / sör̄ö tō r̄e ōyōy.

S6 stop écouter
sör̄ö tō r̄e ōyōy, ōy vog nëw yö yame, pa sör̄ö töm pēn r̄akn̄ase, tom: yëtōur̄ ti sör̄ö tō ti, ne mowe sör̄ö ve yër̄e, temët pe ve qur̄qur̄ i tekn̄wa peon qur̄ i r̄akn̄ase.

S7 stop écouter
Pavën, sör̄ö kayr̄ake me r̄e giy ne qer̄on̄ tën, giy tëvëkqö, giy yan̄evog ne vane, r̄e sur̄ i r̄akn̄ase uw yōne, viye nön r̄akn̄ase yite, ne gengon, voygë pa pe n̄wëne, viye vën e yö vë / yö qer̄on̄ tën.

S8 stop écouter
Sör̄ö var̄er̄age sör̄ö / pa ti sör̄ö take tō sör̄ö tom / gatēt ti teta sa tom: tomn̄wëtom ne temët on tō me, on qur̄ ie, n’ on petput n’ on öyar̄ i sör̄ö.

S9 stop écouter
Alë sör̄ö tō. Te/ Pa ti sör̄ö take tō, sör̄ö qōr̄ōg ne qer̄on̄ tën, sör̄ö mok ne r̄ër̄ë, mok ne ti r̄ër̄ë, r̄ak n̄wesaye tom / r̄ak nëpe tom ne temët on tat yō vegyaye tom ne tayö giy ne tën ti.

S10 stop écouter
Sör̄ö tō r̄e ōyōy. Sör̄ö ōyōy ōyōy ōyōy ōyōy vë–n vën, pper̄o!

S11 stop écouter
Per̄o ti vën wat’ i yö wegate r̄evr̄ov n̄wë ne, sör̄ö tar̄ake ti yö metave, vën wat’ i yö wegate r̄evr̄ov –

S12 stop écouter
Ne temët tō me. Qnoven̄i ne sov / ne sov en r̄akn̄ase, nine ve vr̄evr̄ov.

S13 stop écouter
Tō wate me: nine viyviye n̄wotn̄wot ne r̄ër̄ë, mi ne tigë, tom ne vën uw, ne qur̄ i r̄akn̄an Toyöë mi Wor̄tötë.

S14 stop écouter
Tamer̄ën / Tör̄öqate vir̄ö ve ōyōy: sör̄ö öyevog ne nëw i n’ oyin̄e pe tom:

S15 stop écouter
R̄ē nëw me, r̄ē nëw me, r̄ē nëw te pe tiqö ë, ē ë ē ë…

S16 stop écouter
Së on ōyvog ppa nëw së, së sur̄:

S17 stop écouter
R̄ē nëw me, r̄ē nëw me, r̄ē nëw te pe tiqö ë, ē ë ē ë…

S18 stop écouter
Alë, së ōyvog weyog ne nëw.

S19 stop écouter
Sör̄ö r̄ak n̄wë ne vën vën, sör̄ö r̄ōn̄ / wotewote-n̄wō r̄ōn̄ r̄akn̄ase ve putput.

S20 stop écouter
Putput, nine ve sur̄ ne putput pe tom:

S21 stop écouter
Toyöë mi Wor̄tötë, noke n̄wuye r̄ē ave? Noke n̄wuye r̄ē nëwnëw…

S22 stop écouter
Wotewote-n̄wō r̄ōn̄, gatēt ti wotewote tir̄ig Wor̄tötë / Toyöë r̄ōn̄, gatēt ti Wor̄tötë tom: “N̄watik! Ike r̄ōn̄ në ti pe noke ve r̄ōn̄r̄ōn̄ ne?”

S23 stop écouter
Tom “Tawe! Noke tati r̄ōn̄.”

S24 stop écouter
“Noke r̄ōn̄ n̄wesaye tom r̄akn̄ate putput. Togevar̄ōn̄ te tör̄ö r̄ōn̄ te tom në vöwye noke ve r̄ōn̄ ti, titom ne tör̄?”

S25 stop écouter
Sör̄ö ve tu që, sör̄ö r̄ōn̄ ne putput wuyog:

S26 stop écouter
Toyöë mi Wor̄tötë, noke n̄wuye r̄ē ave? Noke n̄wuye r̄ē nëwnëw…

S27 stop écouter
Tom “E! Tir̄ gë wye! Ne temët qur̄qur̄ i r̄akn̄ate pe!”

S28 stop écouter
Wotewote n̄wō gat tom “Pa, noke ōyvog n̄wō ne nëw, ike take ōy me tir̄ig.”

S29 stop écouter
Tom “Wye.” Nine yaw r̄ake r̄ē nëw en̄ot, nin’ ōyvog.

S30 stop écouter
Nin’ ōyvog, tati per̄o ti n̄watine pe wotewote tir̄ig pe ne yane Wor̄tötë, ōyvog ne nëw.

S31 stop écouter
Sör̄ö ōy ōy wat’ ag, wöttog ne tape vën, tetr̄og ne tape sa vën, sör̄ö vëyag.

S32 stop écouter
Sör̄ö vëya–g vëyag wate me, ne temët ve giy wr̄og piti ne qer̄on̄ tën tom iw ti r̄akn̄ase, sör̄ö tom:

S33 stop écouter
“Ike tevetav’ i r̄akn̄a ma?”

S34 stop écouter
Tom “Tego, noke giygiy ne/ ke mar̄ie nëpe nine magëne: nine magëne ve sag, kemir̄e r̄ak ne vogmamer̄ö se ne tayö segsag vog-ye ve tego; noke tō me tom noke sag tom kamar̄e vegevage.”

S35 stop écouter
Alë r̄akn̄ase tom “Ne tör̄, tok! Ne tör̄!”

S36 stop écouter
“Tamer̄ën nine ve yan̄e r̄ake ne tir̄ër̄ë mi ne viye r̄aker̄ake ne qot r̄ër̄ë ton ne qer̄on̄ tën n̄wë ne, nine ve gatēt tom ‘Kn̄wa pe genome ne! Kn̄wa pe genome noke qur̄ yër’ ike ne!’”

S37 stop écouter
Ne temët gat tom: “Ne tör̄, tok! Noke tati gatēt që, noke tom ‘Köö, ne vogmamer̄ö! Tör̄öqate megoye nome r̄ak sa ike, r̄ak vogmamer̄ö tike ike sag vogmamer̄ö magē, ne tayö ve sag tovike tego! Noke tō uw tör̄ö / Noke tō uw noke sag tovike.’”

S38 stop écouter
Sör̄ö oyoye që, Toyöë gat tom “Tego, ne tör̄!” Gatēt ti ne temët tom “Ne tör̄ nëne! Ike vën tom ike qur̄ i r̄akn̄a ma nëne, kn̄wa pe noke ve not matike ne!”

S39 stop écouter
Alë nine myö n̄wot ne qr̄ög en Mer̄ëmpē, ne yan̄w’ i ne temët eye, ne temët mët.

S40 stop écouter
Yan̄we mase, ne sō p’ uw ëne, sör̄ö oye r̄ake sör̄ö wotog.

S41 stop écouter
Ne vegevag’ in tan̄wöy pene. Yöywye tike.