Le rocher des Torres


Continuous playing:

Transcription by sentence


Whole text transcription


Tär ’og’og wël lē sele Wōlrēv, vunu: van N̄ere Pinimen e, ’ān vāli kēl me nē, pa ’et kal sag.
Tär ’og’og kēnē, ērge ’og’og, qön̄ vōwal tär wo “Ei! Kiri wö’, gät ’og’og kö-wö’, pa gät ē pigpig ’ä n-mōmō, pa kiri wö’ gät qēl sōw lë e, gät pili’. Gät ’ār’ār gāt mōmō.”
Wo “Ge itōk.” Tär van.
Kē m-revrev, lo m-van row e ’ān vögö lām, alē tär qēl.
Qēl sōw e, tär ’ār n-vë’ë.
Tär ’ār n-vë’ë ’ā~ ’ār, ’ār qē’ n-vë’ë tär van me, pōl. Pō–pōl, pōl qē’, tär ’al.
Tär ’al ’a–’al, ’al qē’, wa kē e n-mälägläg.
Kē m-mälägläg nē e tär sin̄. Sin̄ e tär van ’ān me’ va’a gēn.
Tär pili’ row. Van van van, tär van pili’ pili’, pili’ row pili’ row vavavan – Sōw, ērge na ti nē m-van qēl kēl sar mäkä wö’, tär van sōw.
Pa n-’ān̄sār vōwal e m-van row e pa n-ve’ e māl van sar e pu’ ’i e.
E sōw e, ti m-van row, van kal row rān ve’ e, ti m-tët e wā n-me’.
Van row nē, van ’ān vāli gēn.
Van me van me, van, van van, tän̄ row e, ti n-van kēl ’ān vālgi.
Vanvan kēl me ’ān vālgi nē, pa n-ve’ e māl qē’ēg van rāk.
Māl vanvan ti n-vanvan row ēgēn.
Kēl sar e, lē / n̄ere me’ e mal rës.
Tär van / Ti ne van row, van row, va–van e… ti ne va–van kēl me wö’: “O, kö-wö’ n-lām! Kö-wö’ n-lām la’i.”
Ti n-van kēl ’ān vālgi. Van vavavan nē, n-tän̄ row e: “Oo! Ekē na wö’ n-lām!”
Ewa ti n-van kēl. Vavavan ’ān vālgi: “Oo! Ekē na wö’ n-lām.” Ewa ti n-van kēl.
Ti n-van van kēl ekē nē wa ti ne-’et e, ērge e nev mōr e wa lē aqiiit e!
Wā n-ve’ e va’a row e. Va’a row e.
Ti n-van row, van row… Va–van a, ti m-’et e wa “Uu!” Ē ge e m-’en̄. ’Ān̄sār e m-’en̄.
Ti n-’en̄, ’e’e’e~ ’en̄ e, n-ve’ e n-tek mi ti e va’a gēn.
Ti n-tek mi ti wā “Ey! Näk ’en ’en̄’en̄! Näk ’ogrën̄! Näk ’ogrën̄, pa näk pu’ kal sag ’ān kē ge māmās.
Si në wë m-van qēl kē ge rërër, sōwlē näk ’asem me mē në, wā: ‘O, n-kē ge rërër! Naw e / naw e m-tän̄ në ēgēn. Sōw e, në k-van kal sag. Në k-van kal sag ’en naw!’…”
Sōwlē, ti n-van. Van van van va– van, qēl kē ge rërër e, ’ān̄sār e n-’asem sōw mi-ti wā “Ekē, naw e m-tän̄ në ēgēn!” Ewā ti n-varkal.
Varkal sag me kö-wö’ e naw e n-māmās ’en ti.
Täru van van va– van wā kē n-meren, wā täru van tän̄ sōw a Torēs e.
Van tän̄ sōw a Tores e, ti n-van sar – van pu’ sar ’ān n̄ere me’ e, van sar e, pu’ lav sar ’ān me’ – Wā ti n-tek mēn e n-’ān̄sār / ’ān̄sār nē wā “Näk wë m-van kal sar, näk ’og’og, näk vasn̄ē n-qin̄im. N-qin̄im e wë m-vavavan wā m-tän̄ m̄eltöl, sōw e näk van kēl me näk ’asem mē në, gätru ’ö’ kēl näk.” Wë “Itōk.”
Ti m-van sar nē, van kal sar lē vunu, mē ērge nē, ’og’og –
Sōw wa, ti m-vasvasn̄ē n-qön̄ mōn: n-qön̄ vōwal e, ti m-vasn̄ē vasn̄ē vasn̄ē vasn̄ē vasn̄ē va–vavavan, tän̄ n-qön̄ san̄wul / n-qön̄ m̄eltöl mäkä ’alōw; sōwlē –
Kiri wö’ ti n-van row me, ti n-tek mēn e / ti n-vasem kēl wël sā n-tektek mōn e. So “N-qin̄ik e, n-m̄eltöl e ’alōw.”
Sōw ti n-’asem kēl wël mi-ti.
So “’Alōw lē mā’āv, näk van me. Näk van me lē mā’āv la’i.”
Sōwlē, ti m-van row, ’asem qē’ mē ti, n-van kal kēl.
Kē m-qön̄ sōw, kē m-meren row ne, ti m-qēl kēl row me, ti (n-ve’ e) māl pu’ ’örma’.
Ti m-van row, van kal rān ti, täru m-van wël, ti m-’aw n-wes rār.
Ti m-sisn̄ē sisn̄ē sisn̄ē si–sisn̄ē: n-qä’än e wënwën qē’ mi n-wes rār.
“Sōwlē! Gätru ēgēn.”
Täru kālrāk nē, täru van van van van van van van van va– van, tän̄ sōw ’ān N̄ere-pinimen e, van sar e ti n-saet sar a n-qen̄ ve’ e (ti n-gar marmar wël) – wa ērge ta’isag lē n-vunu e, tär ta n-qān̄ris lowo!
Tär ta n-qān̄ris lowo, so n-gengen sir n-qön̄ m̄eltöl mun e ’am̄an ow.
So “Kēh!”
Ti n-row kal sag nē so n-van sar e m-saet sar a lē qen̄ ve’ e: sōwlē, ti n-van kal. Ti n-van kal, van sar e: “O! Lēlqön̄!”
Ērge ne e qäs ’i sag e, n-lāklāk lowo!
Tär m-ta e, n-lāklāk lowo.
O tär lāk lāk lā–k, lāk ewa, na nē m-qē’; e tär qäs rāk e, tär lāk lu.
Ti n-van sar ne, m-’är pa’. ’Är pa’ wël kē ge mälägläg.
’Är pa’ wël kē ge mälägläg ne, ti n-/ tär qäs rāk lik sag nē e, ti n-/ tär lāk lu ne e, ti n-lāk lu rek.
Lāk lāk lāk lā–k ewa ti n-qē’ ewā ti n-van wël e n-’är pa’ kē ge mälägläg. Ewā ti n-van rāk.
Tär wë qäs rāk ewā tär lāk sur ewā ti n-lāk sur rek.
Va–va–van e, e n-ren̄e, n-pulsālān e, n-’et.
’Et ’et ’et ’et e wa: “Lāklāk ’i ne, n-pulsëlëk, pa ti n-van me mäkävä ne? Wa n-qön̄ m̄eltöl mōn, kiri wö’. Pa lāklāk ’i wö’, n-pulsëlëk së lāklāk ’i now.”
Sōwlē, ti n-qē’ lāklāk, n-ren̄e e n-qē’ lāklāk ēgēn.
Ti n-’är pa’ kē ge mälägläg e ti n-’et sā: n-’ān̄sār e, wā n-’am̄an e kävä ne, ti n-lāklāk e n-’är’är pa’ e kävä.
Ti ne van van va– van e, ti ne-/ tär qäs rāk kēl e, ti n-lāk lu.
E van, van va va van, n-ren̄e e n-van me n-van me, n-’är pa’ ekē nē van va– van e, ewā “Óòó! Kö-wö’ ti e vanvan me qäl’ä kö-wö’! Ti n-’är’är pa’ e, kävä ne kiri?”
Ewā tär qäs rāk lik ewa ti n-lāk lu.
Ewa “Óòó! Ti n-’är’är pa’ ekē gēn.”
Sōwlē ti n-van wël van wël van wël vavavan: kal qēl wël ekē ge mälägläg ekē ēge e n-’är’är pa’ lon e wa –
Lāklāk e n-qē’ sōw van e wā n-’am̄an e m-vala wël e wā n-row pa’ kēl sar ekē ge mälägläg ewa: gōnōn en °m-gorva an̄° wël en n-gis / ’ör varge ti ewā ti n-’en̄.
M-’en̄ me ekē nē: (tär wo) “Ēi! N-sāv ne?” – “’Ān̄sār e n-’en̄’en̄ e gä wël gēn.”
Tär qē’ n-lāklāk ne, van wël, wo “M-sāv’ē?”
Wo “Óòó, n-pulsëlëk e m-qälän̄ ’i, pa ti e ti wow.” Tär wë “Ei! ’Irgi? Ti m-mōl kēl me?!”
E ti wë “Näk m-van ’i, m-’og ’i kävä ne?” – “Në m-van ’i, m-’og ’i Torēs.
Sōwlē – wā n-ve’ e, ti n-le kēl ti sar e ti n-vala kal wā, n-ve’ e n-sēptēm rāk row mäkä nē: wa n-to e n-tëtrāg!”
To m-tëtrāg nē, ti m-pu’ lav wal ekē nē. Ti m-pu’ lav wal ekē nē –
Tär wā: “Pa näk m-mōl me rān sāv ne?”
“Ami van row rān N̄ereqā’āg’āg e pa kimi ’et qēl row lē naw e. Kimi ’et qēl row lē naw e, kimi ’et sōw wa n-naw mele’ ’i rān n-ve’, pa ti e ti now, në m-mōl me rān n-ve’ e.”
Sōw, n-ve’ e pu’ la’i rān ’ān vegi wö’: tän̄ kiri wö’, n-sān e n-M̄altëtrāg.
Pu’ ’i. Sōw ’ān N̄ere Pinimen e, pōt vala me en, vala lu sar wö’. Pōt vala me en, vala lu row wö’. Vala lu sar wö’.
Tär ge ōl wā ‘Lē li Awaw’. ‘Lē li Awaw’.
Pa n-ve’ e pu’ ’i row me ne, ve’ e ’a Torēs. M̄altëtrāg.
Sōwlē. Kaka ’apän e wöte ti m-qē’ sōw kē gēn. Kaka pän e m-qē’ ēgēn.
S1 stop écouter
Tär ’og’og wël lē sele Wōlrēv, vunu: van N̄ere Pinimen e, ’ān vāli kēl me nē, pa ’et kal sag.

S2 stop écouter
Tär ’og’og kēnē, ērge ’og’og, qön̄ vōwal tär wo “Ei! Kiri wö’, gät ’og’og kö-wö’, pa gät ē pigpig ’ä n-mōmō, pa kiri wö’ gät qēl sōw lë e, gät pili’. Gät ’ār’ār gāt mōmō.”

S3 stop écouter
Wo “Ge itōk.” Tär van.

S4 stop écouter
Kē m-revrev, lo m-van row e ’ān vögö lām, alē tär qēl.

S5 stop écouter
Qēl sōw e, tär ’ār n-vë’ë.

S6 stop écouter
Tär ’ār n-vë’ë ’ā~ ’ār, ’ār qē’ n-vë’ë tär van me, pōl. Pō–pōl, pōl qē’, tär ’al.

S7 stop écouter
Tär ’al ’a–’al, ’al qē’, wa kē e n-mälägläg.

S8 stop écouter
Kē m-mälägläg nē e tär sin̄. Sin̄ e tär van ’ān me’ va’a gēn.

S9 stop écouter
Tär pili’ row. Van van van, tär van pili’ pili’, pili’ row pili’ row vavavan – Sōw, ērge na ti nē m-van qēl kēl sar mäkä wö’, tär van sōw.

S10 stop écouter
Pa n-’ān̄sār vōwal e m-van row e pa n-ve’ e māl van sar e pu’ ’i e.

S11 stop écouter
E sōw e, ti m-van row, van kal row rān ve’ e, ti m-tët e wā n-me’.

S12 stop écouter
Van row nē, van ’ān vāli gēn.

S13 stop écouter
Van me van me, van, van van, tän̄ row e, ti n-van kēl ’ān vālgi.

S14 stop écouter
Vanvan kēl me ’ān vālgi nē, pa n-ve’ e māl qē’ēg van rāk.

S15 stop écouter
Māl vanvan ti n-vanvan row ēgēn.

S16 stop écouter
Kēl sar e, lē / n̄ere me’ e mal rës.

S17 stop écouter
Tär van / Ti ne van row, van row, va–van e… ti ne va–van kēl me wö’: “O, kö-wö’ n-lām! Kö-wö’ n-lām la’i.”

S18 stop écouter
Ti n-van kēl ’ān vālgi. Van vavavan nē, n-tän̄ row e: “Oo! Ekē na wö’ n-lām!”

S19 stop écouter
Ewa ti n-van kēl. Vavavan ’ān vālgi: “Oo! Ekē na wö’ n-lām.” Ewa ti n-van kēl.

S20 stop écouter
Ti n-van van kēl ekē nē wa ti ne-’et e, ērge e nev mōr e wa lē aqiiit e!

S21 stop écouter
Wā n-ve’ e va’a row e. Va’a row e.

S22 stop écouter
Ti n-van row, van row… Va–van a, ti m-’et e wa “Uu!” Ē ge e m-’en̄. ’Ān̄sār e m-’en̄.

S23 stop écouter
Ti n-’en̄, ’e’e’e~ ’en̄ e, n-ve’ e n-tek mi ti e va’a gēn.

S24 stop écouter
Ti n-tek mi ti wā “Ey! Näk ’en ’en̄’en̄! Näk ’ogrën̄! Näk ’ogrën̄, pa näk pu’ kal sag ’ān kē ge māmās.

S25 stop écouter
Si në wë m-van qēl kē ge rërër, sōwlē näk ’asem me mē në, wā: ‘O, n-kē ge rërër! Naw e / naw e m-tän̄ në ēgēn. Sōw e, në k-van kal sag. Në k-van kal sag ’en naw!’…”

S26 stop écouter
Sōwlē, ti n-van. Van van van va– van, qēl kē ge rërër e, ’ān̄sār e n-’asem sōw mi-ti wā “Ekē, naw e m-tän̄ në ēgēn!” Ewā ti n-varkal.

S27 stop écouter
Varkal sag me kö-wö’ e naw e n-māmās ’en ti.

S28 stop écouter
Täru van van va– van wā kē n-meren, wā täru van tän̄ sōw a Torēs e.

S29 stop écouter
Van tän̄ sōw a Tores e, ti n-van sar – van pu’ sar ’ān n̄ere me’ e, van sar e, pu’ lav sar ’ān me’ – Wā ti n-tek mēn e n-’ān̄sār / ’ān̄sār nē wā “Näk wë m-van kal sar, näk ’og’og, näk vasn̄ē n-qin̄im. N-qin̄im e wë m-vavavan wā m-tän̄ m̄eltöl, sōw e näk van kēl me näk ’asem mē në, gätru ’ö’ kēl näk.” Wë “Itōk.”

S30 stop écouter
Ti m-van sar nē, van kal sar lē vunu, mē ērge nē, ’og’og –

S31 stop écouter
Sōw wa, ti m-vasvasn̄ē n-qön̄ mōn: n-qön̄ vōwal e, ti m-vasn̄ē vasn̄ē vasn̄ē vasn̄ē vasn̄ē va–vavavan, tän̄ n-qön̄ san̄wul / n-qön̄ m̄eltöl mäkä ’alōw; sōwlē –

S32 stop écouter
Kiri wö’ ti n-van row me, ti n-tek mēn e / ti n-vasem kēl wël sā n-tektek mōn e. So “N-qin̄ik e, n-m̄eltöl e ’alōw.”

S33 stop écouter
Sōw ti n-’asem kēl wël mi-ti.

S34 stop écouter
So “’Alōw lē mā’āv, näk van me. Näk van me lē mā’āv la’i.”

S35 stop écouter
Sōwlē, ti m-van row, ’asem qē’ mē ti, n-van kal kēl.

S36 stop écouter
Kē m-qön̄ sōw, kē m-meren row ne, ti m-qēl kēl row me, ti (n-ve’ e) māl pu’ ’örma’.

S37 stop écouter
Ti m-van row, van kal rān ti, täru m-van wël, ti m-’aw n-wes rār.

S38 stop écouter
Ti m-sisn̄ē sisn̄ē sisn̄ē si–sisn̄ē: n-qä’än e wënwën qē’ mi n-wes rār.

S39 stop écouter
“Sōwlē! Gätru ēgēn.”

S40 stop écouter
Täru kālrāk nē, täru van van van van van van van van va– van, tän̄ sōw ’ān N̄ere-pinimen e, van sar e ti n-saet sar a n-qen̄ ve’ e (ti n-gar marmar wël) – wa ērge ta’isag lē n-vunu e, tär ta n-qān̄ris lowo!

S41 stop écouter
Tär ta n-qān̄ris lowo, so n-gengen sir n-qön̄ m̄eltöl mun e ’am̄an ow.

S42 stop écouter
So “Kēh!”

S43 stop écouter
Ti n-row kal sag nē so n-van sar e m-saet sar a lē qen̄ ve’ e: sōwlē, ti n-van kal. Ti n-van kal, van sar e: “O! Lēlqön̄!”

S44 stop écouter
Ērge ne e qäs ’i sag e, n-lāklāk lowo!

S45 stop écouter
Tär m-ta e, n-lāklāk lowo.

S46 stop écouter
O tär lāk lāk lā–k, lāk ewa, na nē m-qē’; e tär qäs rāk e, tär lāk lu.

S47 stop écouter
Ti n-van sar ne, m-’är pa’. ’Är pa’ wël kē ge mälägläg.

S48 stop écouter
’Är pa’ wël kē ge mälägläg ne, ti n-/ tär qäs rāk lik sag nē e, ti n-/ tär lāk lu ne e, ti n-lāk lu rek.

S49 stop écouter
Lāk lāk lāk lā–k ewa ti n-qē’ ewā ti n-van wël e n-’är pa’ kē ge mälägläg. Ewā ti n-van rāk.

S50 stop écouter
Tär wë qäs rāk ewā tär lāk sur ewā ti n-lāk sur rek.

S51 stop écouter
Va–va–van e, e n-ren̄e, n-pulsālān e, n-’et.

S52 stop écouter
’Et ’et ’et ’et e wa: “Lāklāk ’i ne, n-pulsëlëk, pa ti n-van me mäkävä ne? Wa n-qön̄ m̄eltöl mōn, kiri wö’. Pa lāklāk ’i wö’, n-pulsëlëk së lāklāk ’i now.”

S53 stop écouter
Sōwlē, ti n-qē’ lāklāk, n-ren̄e e n-qē’ lāklāk ēgēn.

S54 stop écouter
Ti n-’är pa’ kē ge mälägläg e ti n-’et sā: n-’ān̄sār e, wā n-’am̄an e kävä ne, ti n-lāklāk e n-’är’är pa’ e kävä.

S55 stop écouter
Ti ne van van va– van e, ti ne-/ tär qäs rāk kēl e, ti n-lāk lu.

S56 stop écouter
E van, van va va van, n-ren̄e e n-van me n-van me, n-’är pa’ ekē nē van va– van e, ewā “Óòó! Kö-wö’ ti e vanvan me qäl’ä kö-wö’! Ti n-’är’är pa’ e, kävä ne kiri?”

S57 stop écouter
Ewā tär qäs rāk lik ewa ti n-lāk lu.

S58 stop écouter
Ewa “Óòó! Ti n-’är’är pa’ ekē gēn.”

S59 stop écouter
Sōwlē ti n-van wël van wël van wël vavavan: kal qēl wël ekē ge mälägläg ekē ēge e n-’är’är pa’ lon e wa –

S60 stop écouter
Lāklāk e n-qē’ sōw van e wā n-’am̄an e m-vala wël e wā n-row pa’ kēl sar ekē ge mälägläg ewa: gōnōn en °m-gorva an̄° wël en n-gis / ’ör varge ti ewā ti n-’en̄.

S61 stop écouter
M-’en̄ me ekē nē: (tär wo) “Ēi! N-sāv ne?” – “’Ān̄sār e n-’en̄’en̄ e gä wël gēn.”

S62 stop écouter
Tär qē’ n-lāklāk ne, van wël, wo “M-sāv’ē?”

S63 stop écouter
Wo “Óòó, n-pulsëlëk e m-qälän̄ ’i, pa ti e ti wow.” Tär wë “Ei! ’Irgi? Ti m-mōl kēl me?!”

S64 stop écouter
E ti wë “Näk m-van ’i, m-’og ’i kävä ne?” – “Në m-van ’i, m-’og ’i Torēs.

S65 stop écouter
Sōwlē – wā n-ve’ e, ti n-le kēl ti sar e ti n-vala kal wā, n-ve’ e n-sēptēm rāk row mäkä nē: wa n-to e n-tëtrāg!”

S66 stop écouter
To m-tëtrāg nē, ti m-pu’ lav wal ekē nē. Ti m-pu’ lav wal ekē nē –

S67 stop écouter
Tär wā: “Pa näk m-mōl me rān sāv ne?”

S68 stop écouter
“Ami van row rān N̄ereqā’āg’āg e pa kimi ’et qēl row lē naw e. Kimi ’et qēl row lē naw e, kimi ’et sōw wa n-naw mele’ ’i rān n-ve’, pa ti e ti now, në m-mōl me rān n-ve’ e.”

S69 stop écouter
Sōw, n-ve’ e pu’ la’i rān ’ān vegi wö’: tän̄ kiri wö’, n-sān e n-M̄altëtrāg.

S70 stop écouter
Pu’ ’i. Sōw ’ān N̄ere Pinimen e, pōt vala me en, vala lu sar wö’. Pōt vala me en, vala lu row wö’. Vala lu sar wö’.

S71 stop écouter
Tär ge ōl wā ‘Lē li Awaw’. ‘Lē li Awaw’.

S72 stop écouter
Pa n-ve’ e pu’ ’i row me ne, ve’ e ’a Torēs. M̄altëtrāg.

S73 stop écouter
Sōwlē. Kaka ’apän e wöte ti m-qē’ sōw kē gēn. Kaka pän e m-qē’ ēgēn.